1-2 Hini-yan idan helag Israel hu Repidim et lumaw idad Sinai e eleg mebebleyi et mangkampu ida etan di hengeg nunman ni duntug. Ey yan nunman ni dintengan dadman ey dewwan bulan hu nelabah neipalpun neni-yanan dan Egypt.

3 Entanni ey nanteyed hi Moses etan di duntug et an makihummangan nan Apu Dios. Ey kan Apu Dios ni hi-gatuy “Ehel muddan edum mun helag Israel e kammuy ‘Huyya hu kan Apu Dios: 4 Inang-ang yu impahding kuddan iEgypt et ya impahding kun nengi-lin hi-gayudya e heni dakeyu intayab ni tuldu. 5-6 Anin bagik emin eya wadad puyek ey hi-gayun ebuh ni helag Israel hu pillien kun pantu-uk *19:5 Ang-ang yu Titus 2:14. hedin u-unnuden yuwak et ippahding yu hu e-helen kun pehding yu. Ey mambalin kayun padik ni mengippahding ni pinhed ku.’ ” †19:5-6 Ang-ang yu 1 Peter 2:9 niya Revelation 1:6 et ya 5:10.

7 Nandayyu hi Moses et amungen tudda etan kamengipappangngulu et ehlen tun hi-gada hu inhel Apu Dios. 8 Ey kan idan emin ni tuuy “Ippahding min emin hu e-helen Apu Dios.”

Et manteyed mewan hi Moses et tu ehlen nan Apu Dios humman ni inhumang da. 9 Ey kan Apu Dios ni hi-gatuy “Um-ali-ak ni an menang-ang ni hi-gayu e ya ang-ang ku ey mahdel ni kulput et makihummangan nak ni hi-gam ma-lat meippalpun nunya ey kullugen dakaddan tuu. 10 Lakkay et mu ehlen ni hi-gada et mandaddan idan nunya et yan kabbuhhan ey mandeyyaw idan hi-gak. Ey ehel mun hi-gada e balbalan da balwasi da 11 ma-lat maidaddan idan bewahtun mandeyyaw ni hi-gak, tep um-ali-ak eyad tuktuk ni Duntug e Sinai et ang-angen da-ak ni hi-gadan emin. 12 Nem ha-adim ni kelteg hu nanlinikweh eyan duntug et ehlen mu e eleg ida meba-hil winu an umteyed tep hedin wada eleg mengu-unnud ey mettey. ‡19:12-19 Hebrews 12:18-20 13 Hedin wada mengippahding ni nunman, entan tu kaway nem pana yu winu tengba yun batu, et matey anin hedin tuu winu animal. Ey ehel mun hi-gada e hedin wada umtenul ni tangguyup ey umlaw idan emin etan di hengeg ni duntug.”

14-15 Et mandayyu mewan hi Moses et ehelen tudda etan ni tuu e kantuy “Pandaddan kayun menaydayaw nan Apu Dios ni bewahtu. Hedin hi-gayuddan nampengahwa, entan tu ni iulig hu ahwa yu.” Et ipahding idan tuu hu elaw ni panlinnih ni annel da ey imbalbal da babalwasi da.

16 Yan nunman ni kakkabbuhhan ni meikkatlun aggew ey kamangkikidul ey kamangkekedyam niya wada mahdel ni kulput etan di ta-pew ni duntug. Wada pay hu na-let ni tenul ni tangguyup. Ey emin ida helag Israel ey ida kamanggegeygey ni takut da. 17 Impangulun Moses idan an menammun Apu Dios, et lumaw idad hengeg etan ni duntug et umehneng idadman. 18 Hi Apu Dios ey apuy hu nampeang-angan tu, et mukun nehephepan etan duntug ni mahdel ni ahuk ni kamampellaw di ahpat e heni kamelpud et-eteng ni apuy. Ey nakkayyang e kamanyegyeg etan di duntug. 19 Entanni ey kamangke-let hu tenul ni tangguyup. Ey kamanhuhhummangan di Moses nan Apu Dios e hedin immehel hi Moses, hinumang nan Apu Dios ni kidul.

20 Entanni ey nelehbeng hi Apu Dios etan di tuktuk ni duntug et aygan tu Moses. 21 Kan Apu Dios nan Moses ey “Ehel muddan tuu e eleg ida meba-hil etan di kelteg ni um-alidyan menang-ang ni hi-gak tep hedin ippilit dan um-alidya, mettey ida. 22 Ey anin idan padin mei-ebbulut ni meihnup di kad-an ku ey mahapul ni ippahding da elaw ni panlinnih ni annel da. Tep hedin eleg da ipahding ey um-aliddadya, kastiguen kudda.”

23 Kan Moses nan Apu Dios ey “Eleg ida mantetyed hu tuu eyad duntug tep kammuy ha-adak ni kelteg eya nanlinikweh et endi an meba-hil di deya tep wada kadya.” 24 Ey kan Apu Dios ey “Lakkay et mulli ikuyug hi Aaron et umli kayun dewwadya. Nem yadda etan tuu niyadda padi ey eleg ida mabalin ni meba-hil di kelteg ni um-alidya tep hedin um-alidda, kastiguen kudda.”

25 Et mandayyu mewan hi Moses et tu ehelen humman ni inhel Apu Dios.