1 Kan mewan Apu Dios ni hi-gak ey “Hi-gam e helag ni tuu, mu peamtaddan kedunduntug di Israel e kammuy: Dengel yu hu inhel Apu Dios e Eta-gey ni peteg. 2 Kantuy: ‘Kan idan buhul yun daka pemippihul ni hi-gayu ey ‘Hi-gami hu kan duntug idan duduntug yu.’

3 Et humman hu, mu peamta eya pinhed kun e-ehelen e kammuy: Kan Apu Dios e Eta-gey ni peteg ey ‘Yan nengubatan dakeyun buhul yud nambinbina-hil et mambalin kayun heni himbut idan tutu-ud edum ni bebley ey itek hu in-inhel dan meippanggep ni hi-gayu niya pinihupihul dakeyun hi-gada. 4 Et humman hu, hi-gayun duduntug, yadda nansigging, niyadda nangkedeklan niya hi-gayuddan nangkebahbah niya nangkebel-ah ni nan-inhihi-yanan dan bebley ni kapan-impipihuliddan kebebbebley di nanlinikweh, dengel yu eya e-helen ku e Eta-gey ni peteg ni Ap-Apu: 5 Nemahhig hu bunget kuddan tuudman e bebley, nema-madda hu iEdom tep ida kamampan-an-anla ni nanggepan dan bebley ku et da pan-alen hu wadaddad halun ku.’

6 Et humman hu, peamtam mewan idan emin di bebley di Israel, yaddad duduntug, yad nansiggingan tu niyad nandeklanan tu e hi-gak e Eta-gey ni peteg ni Ap-Apu ey kangkuy ‘Nemahhig hu bunget ku tep ya impahpahding idan tutu-ud kebebbebley e nan-impipihulan dakeyu niya bineibeing dakeyu.’ 7 Hi-gak e Apu Dios e Eta-gey ni peteg ey issapatah ku e kastiguen kudda humman ni bebley et helheltapen da dama pehding kun kebe-ingan da.

8 Nem hedin yadda tuuk ni iIsrael ni ngannganih law hu ennamutan da, man wada kennen dan keibbangngadan da, tep manlemmeh ida keyew ni kamekkan lameh tu. 9 Ippaptek dakeyun tutu-uk niya ang-angen ku ma-lat maeladu niya mateneman hu puyek yu. 10 Pedakkel dakeyun helag Israel niya manha-ad kayu eyad bebley yu ma-lat iyayyaggud yudda hu nangkebahbah ni bebley yu. 11 Em, pedakkel dakeyun tutu-uk niya umhegyab dama ippattul yu. Hehlagen kudda u-ungnga yu ma-lat ma-duman hu kadinakkel yun nunman. Pambebley dakeyu eyad bebley yu ngu dedan niya pekeddangyan dakeyu et pengamtaan yu e hi-gak hu Ap-Apu. 12 Ibbangngad tutu-uk et mambebley kayu eyad bebley yu. Hi-gayu mengippuyyek eyan puyek yu niya eleg idalli law meu-upa hu u-ungnga yu ey inap-apu yu.’

13 Hi-gak e Eta-gey ni peteg ni Ap-Apu ey kangkuy: Daka kapippihuladdan edum ni bebley e kanday ‘Ya bebley di Israel ey tuka kenna tuu tu niya tuka tellaka hu u-ungnga!’ 14 Nem meippalpun nunya ey eleg tellakan nunyan bebley hu u-ungnga ey eleg law mengngan ni tuu. Hi-gak e Dios e Eta-gey ni peteg hu nanghel idan nunya. 15 Eggak law i-abulut ni pippihulen idan tutu-ud kebebbebley niya da babbaingen huyyan bebley. Niya eggak law i-abulut ni an meapput di gubat huyyan bebley. Hi-gak e Eta-gey ni peteg ni Ap-Apu hu nanghel idan nunya.”

16 Entanni ey immehel mewan hi Apu Dios ey kantuy 17 “Hi-gam e helag ni tuu, yan eman ni kawedaddan helag Israel di bebley da ey impambalin da bebley dan anggebe-hel ku tep ya lawah ni impenahding da. Humman ni lawah ni elaw da ey nakka ibbilang ni nelugit e heni etan ni kamelpud annel ni biin kabulabulan. 18 Nemahhig hu bunget ku tep ya lawah ni peteg ni impenahding dad bebley da e pimmatepatey ida niya dinenaydayaw dadda hu dios ni kinapyan tuu, et humman hu nengastiguan kun hi-gada. 19 Kinastiguk ida et iwehit kuddad edum ni bebley, tep yadda humman ni lawah ni impenahding da. 20 Nem emin di kebebbebley ni neiwehitan da ey kameibabbaing hu ngadan ku tep kan idan katuutuu ey ‘Tutu-un Apu Dios ida huyya, nem endi hu kabaelan tun mengippaptek ni hi-gada et mukun dinegyun idan buhul dad bebley da.’ 21 Nakka ikakkaguh hu ngadan kun bineibeing idan tutu-uk di kebebbebley.

22 Et humman hu, mu ehel ida helag Israel et kammuy: Kan Apu Dios e Eta-gey ni peteg ey ‘Beken et ni lebbeng tun dakeyu ibbangngad di bebley yu, tep bineibeing yu ngadan kud kebebbebley ni linawwan yu, nem i-anemut dakeyu tep ya kakinayaggud kun hi-gayu niya ma-lat keidaydayawan ku. 23 Peang-ang ku hu kakinayyaggud kuddan tutu-ud kebebbebley ni nemabbaingan yun ngadan ku. Et yallin pengippeang-angan kun kakinayyaggud kun hi-gayu hu pengamtaan da e hi-gak hu Ap-Apu. Hi-gak e Eta-gey ni peteg ni Ap-Apu hu nanghel idan nunya.

24 Tep dakeyu ewwiten di kebebbebley ni neilawwan yu et ienamut dakeyud bebley yu. 25 Et heni dakeyu wakgihan ni malinih ni danum et maulahan hu heni lugit yun nengidaydayawan yuddan dios ni kinapyan tuu niya emin hu hipan lugit yu. 26 Hullulan ku hu wadad nemnem yu niyad puhu yu ma-lat yumaggud kayu e me-kal hu ngehay yu et mambalin kayun kamakangngu-unnud ni hi-gak. 27 Et u-unnuden yun emin hu tugun ku ey pehding yun emin hu immandal kun pehding yu, tep weddaek ni hi-gayu hu Ispirituh ku.

28 Et mambebley kayud Israel e bebley ni indawat kuddan aammed yu. Hi-gayulli meibbillang ni tuuk ey hi-gak hu Dios yu. 29 Eleg dakeyulli law i-abulut ni mengippahding ni umlugit ni hi-gayu. Peyaggud ku hu hipan ittanem yu ma-lat eleg kayu makulangan ni kennen yu. 30 Em pedakkel ku hu illameh idan keyew ni kamekkan lameh tu niyadda etan edum ni yuka ittanem ma-lat eleg kayu mabisil et eleg dakeyu babbaingan idan tutu-ud kebebbebley. 31 Et lektattuy igugguhu yu hu annel yu hedin ninemnem yudda etan lawah ni impenahding yun nunman ni nanliwtan yu. 32 Nem pinhed kun amtaen yu e hi-gayun tutu-uk ni iIsrael ey beken ni kelebbengan yu hu nak pengippahdingan idan nunya, nem ippahding ku ma-lat bumeing kayud lawah ni impahpahding yu. Hi-gak e Eta-gey ni peteg ni Ap-Apu hu nanghel idan nunya.’ ”

33 Kan mewan Apu Dios e Eta-gey ni peteg ey “Hedin negibbuh ni heni nak inulahan hu liwat yu, man pambebley dakeyu mewan di bebley yu dedan ma-lat iyayyaggud yudda etan nangkebahbah. 34 Ey tenneman yuddalli law hu papayyew yu et beken ali law ni henin nunman e nanlatang et kapanhin-aang-angin kamelebbah. 35 Yallin pengibbangngadan dakeyu ey emin ali law hu tutu-u ey kanday ‘Yan eman ni neiwallengan eyan bebley ey heni desert hu ang-ang tu, nem yan nunya ey heni garden di Eden. Anin idan nangkebahbah ni bebley ni nunman et nangkeiyayyaggud law ni neluhud niya nangkebebleyan ida.’ 36 Ey yaddalli etan natdaan ni tutu-ud bebley di nanlinikweh diman ey amtaen da e hi-gak e hi Apu Dios ey nakka iyayyaggud hu kamebahbah ni bebley niya nakka tennemin mangkateban kameitnem hu nebel-ah ni puyek. Tep hi-gak e Ap-Apu ey nakka ippahding hu inhel kun pehding ku.

37 Hi-gak e Eta-gey ni peteg ni Ap-Apu ey kangkuy: Nandaddannak ni mengidwat ni hipan kekdewen idan helag Israel ni hi-gak. Dedngelen ku hu dasal da et henin kadinakkel idan kalneroh hu dakkelan da tep pedakkel kudda. 38 Et mapnu law ni tutu-u hu nangkebahbah ni bebley dan nunman, et henin kakepnuin bebley di Jerusalem ni kalneroh hedin nedateng hu piyestah. Et yan nunman ali hu pengamtaan da e hi-gak hu Ap-Apu.”