Genesis
Ya Laputu
Ya meippanggep nunyan libluh e Genesis
Huyyan libluh ni Genesis hu neitudekan idan impahding nan Apu Dios ni nanletun kabunyan niya puyek niyaddan emin hu mategun wadadman. Yadya mewan ni libluh hu neitudekan ni eleg pengu-unnudan ida eman ni nemangulun laki niya bii nan Apu Dios. Nanliwat ida et mebahbah hu kayyaggud ni nekidagyuman Apu Dios ni hi-gada.
Nem anin ni hanniman hu neipahding, et pinhed Apu Dios ni meibbangngad hu kayyaggud ni nekidagyuman tun hi-gadan tuu. Et mukun hinammad tun inhel e ittu-dak tu hu menellaknib ni tutu-u. (3:15) Et ya impahding tu ma-lat umamnu huyyan inhel tu, ey pinili tu hi Abraham e gayyum tu, et bendisyonan tu, ma-lat wadalli hakey ni helag tun edum ni aggew ni menellaknib ni tuu eyad puyek. (12:1-3)
Huyyan libluh hu neitudekan ni kapemaptek niya impeminhed nan Apu Dios ni tutu-un lintu tu. Huyyan tuka pemaptek ey neipeang-ang di impahding tuddan tutu-u, yadda pamilyah, yadda helag niyadda bebley. Neipeang-ang huyyad nengipaptekan tun Abraham, hi Isaac, hi Jacob niyadda helag da.
Yadda neitudek eyad libluh:
1. Ya nanletuan nan Apu Dios ni kabunyan niya puyek. (chapters 1:1–2:25)
2. Ya nangngehayan ni nemangulun tuu et manliwat idan Apu Dios. (chapters 3:1-24)
3. Yadda nemangulun tutu-u niyadda helag da. (chapters 4:1–5:32)
4. Ya nengipaptekan nan Apu Dios nan Noah et ya nalbengan ni puyek. (chapters 6:1–9:26)
5. Yadda helag Noah et ya nengipatnaan idan tutu-un memehwat ni Tower e Babel. (chapters 10:1–11:26)
6. Yadda impahding nan Apu Dios nan Abraham. (chapters 11:27–25:11)
7. Yadda helag Ismael. (chapter 25:12-18)
8. Yadda impahding nan Apu Dios di biyag nan Isaac niyadda u-ungnga tu e di Jacob nan Esau. (chapters 25:19–36:43)
9. Yadda impahding nan Apu Dios di biyag nan Joseph. (chapters 37:1–50:26)
1
Ya nanletuan Apu Dios ni emin
(John 1:1-3, 10; Acts 4:24; Colossians 1:16; Hebrews 1:2; Revelation 4:11)
1 Yan laputu ey lintun Apu Dios hu kabunyan niya puyek. 2 Nem ya puyek ey eleg ni mapkel, ey endi nanha-ad diman. Edallem ni danum ni ebuh hu wadadman niya engeenget. Ey wada hu Ispirituh Apu Dios e heni dibdib di ta-pew ni danum.
Ya nemangulun aggew
3 Immehel hi Apu Dios et kantuy “Kaweda kan kawwalwal.” Ey tu-wangun newalwalan. 4 Ey inang-ang Apu Dios humman ni lintu tu ey kayyaggud. Impan-appil tu hu kawwalwal niya engeenget. 5 Et ngadanan tu hu kawwalwal ni aggew ey nginedanan tu hu engeenget ni hileng. Et mahileng nunman et mewa-wa ey humman hu nemangulun aggew.
Ya meikkadwan aggew
6-7 Kan mewan nan Apu Dios ey “Kaweda kan mengedwan danum et wadad ahpat edum ey wadad nandaul hu edum.” *1:6-7 Psalm 148:4 Ey humman neipahding. Ya etan wadad ahpat ey humman ida kulput ni kakelpuin udan, ey ya wadad nandaul ey humman danum eyad puyek. 8 Humman ni nengedwan danum di ahpat et yad nandaul ey nginedanan Apu Dios ni kabunyan. Et mahileng et mewa-wa ey humman hu neikadwan aggew.
Ya meikkatlun aggew
9 Kan Apu Dios ey “Kesiplud kan danum et meappil kad pangil ma-lat meang-ang hu puyek.” Ey humman neipahding.†1:9 Ang-ang yu hu 2 Peter 3:5 10 Ya etan mamega ey nginedanan tun puyek, ey ya siniplud tun danum ey nginedanan tun baybay. Ey humman ni lintu tu ey kayyaggud. 11-12 Immehel mewan hi Apu Dios et kantuy “Patmel mu e puyek emin hu nambakbaklang ni kameitnem niyadda keyew ni kaumlameh ni nebukelan ma-lat mannananeng ni wada henin nunman ni meitnem.” Ey neipahding humman. Ey kayyaggud humman ni lintun Apu Dios. 13 Nehileng et mewa-wa ey humman hu neikatlun aggew.
Ya meikka-pat ni aggew
14 Kan mewan Apu Dios ey “Kawedadda umbebnang di kabunyan ma-lat meappil hu kawwalwal di hileng et pengiimmatunan niya pengamtaan ni tsimpuh ni aggew niyadda tsimpuh ni toon. 15 Et humman idan umbebnang di kabunyan ey bebnangan da hu puyek.” Ey neipahding ida huyya. 16 Lintun Apu Dios hu dewwan et-eteng ni kaumbebnang e humman hu aggew e kaumbebnang ni kawwalwal et ya bulan e kaumbebnang ni hileng. Ey lintu tudda pay hu dakel ni bittuwen. 17 Inha-ad tudda huyyan kaumbebnang di kabunyan ma-lat mabnangan hu puyek 18 ni kawwalwal ni yan hileng, ey ma-lat meappil hu kawwalwal niya hileng. Ey inang-ang Apu Dios humman ni lintu tu ey kayyaggud. 19 Nehileng et mewa-wa ey humman neika-pat ni aggew.
Ya meikkelliman aggew
20 Kan Apu Dios ey “Kawedan emin hu nambakbaklang ni mategud danum niya kaweda dakel ni nambakbaklang ni mantayyatayyab di kabunyan.” 21 Et mawedan emin hu nambakbaklang ni mategud baybay e etta-teng ida edum. Ey lintu tu nambakbaklang ni sisit. Ey inang-ang Apu Dios ida humman ni lintu tu ey kayyaggud. 22 Binendisyonan tudda hu mategun wadad baybay ma-lat medakkel ida et mapnu hu baybay. Ey binendisyonan tudda dama hu sisit ma-lat medakkel ida. 23 Nehileng et mewa-wa ey humman neikeliman aggew.
Ya meikka-nem ni aggew
24-25 Kan mewan Apu Dios ey “Kaweda eyad puyek hu nambakbaklang ni animal ni kaman-impah, yadda maeyum niyadda beken, yadda kamambinulluh, yadda kamangkinaddap niyadda kamandinallan.” Ey tu-wangun newadadda. Ey inang-ang Apu Dios ida humman ni lintu tu ey kayyaggud.
26 Entanni ey kan Apu Dios ey “Yan nunya ey leltuen tayu law hu tuun henin‡1:26-27 Ang-ang yu hu 1 Corinthians 11:7 hi-gatsu ma-lat pan-ap-apun emin ni mategud puyek, yad kabunyan niyad baybay.” 27 Henin nunman hu impahding Apu Dios e lintu tu hu tuun mei-ingngeh hu elaw dad elaw tu. Ey lintu tuddan laki niya bii.§1:27 Matthew 19:4 Mark 10:6, James 3:9 28 Et bendisyonan tudda e kantuy “Kahlag kayu et medakkel kayu et mebebleyan ni emin eya puyek et hi-gayu hu ngenamung eyan puyek, anin idan deleg di baybay, yadda sisit niyaddan emin hu animal.”
29 Ey kantuy “Indaddan kun emin hu nambakbaklang ni kameitnem niyadda keyew ni kamekkan lameh da ma-lat wada kennen yu. 30 Ey winedak hu helek niyadda edum ni kameitnem ma-lat wada kennen idan animal niyadda sisit.” Emin ida huyya ey impahding tu ma-lat panyaggudan da. 31 Ey inang-ang nan Apu Dios ida humman ni lintu tu ey kayyaggud ni peteg. Nehileng et mewa-wa ey humman hu neika-nem ni aggew.