1 Yan laputu ey hakey ni ebuh hu ehel ni tuu. 2 Nem entanni et ida kamangkedakkel ey limmaw idad appit ni kasimmilin aggew, ey dinteng da nedeklan ni puyek di Babilonia, et mambebley idadman. 3-4 Et wada hakkeyey kanday “Mengapya itsun et-eteng ni bebley tayu. Ey behwaten tayu et-eteng niya eta-gey ni binattun baley et datengen tu kabunyan et mandingngel itsu niya eleg itsu mawehit eyad puyek.” Et ilepu dan mengapya.

5 Entanni ey immali Apu Dios et tu ang-angen hu daka pangkapyaan bebley niya etan eta-gey ni baley. 6 Ey kantuy “Huyyaddan tuu ey hakey ida niya hakey hu ehel da. Huyya keilleppuan ni pengippahdingan dan pinhed da. Et dammutun emin ali law hu pinpinhed dan pehding ey pehding da. 7 Itsuy, kelehbeng itsu et tayu pambakbaklang hu ehel da ma-lat eleg ida manhin-aawat!”

8 Et iwehit Apu Dios idad puyek et isiked dan mengapya etan ni daka pangkapyaan bebley. 9 Ya impangngadan dan nunman ni bebley ey Babel tep yadman nenimengan Apu Dios ni hi-gada e impambakbaklang tu ehel da et iwehit tudda eyad ta-pew ni puyek.

10 Huyyadda helag Shem. Yan eman ni nelabah hu dewwan toon neipalpun negibbuhan ni nalbengan ni puyek, eman ni hanggatut hu toon Shem ey nahlag et wada hi Arpachshad. 11 Nambiyag pay ni liman gatut ni toon et wadadda edum ni u-ungnga tu.

12 Nantoon hi Alpaksad ni telumpulut lima ey nahlag et wada hi Selah. 13 Nambiyag pay ni epat ni gatut et tellun toon et wadadda edum ni u-ungnga tu.

14 Nantoon hi Selah ni telumpulu ey nahlag et wada hi Eber. 15 Nambiyag pay ni epat ni gatut et tellun toon et wadadda edum ni u-ungnga tu.

16 Nantoon hi Eber ni telumpulut epat ey nahlag et wada hi Peleg. 17 Nambiyag pay ni epat ni gatut et telumpulun toon et wadadda edum ni u-ungnga tu.

18 Nantoon hi Peleg ni telumpulu ey nahlag et wada hi Reu. 19 Nambiyag pay ni dewanggatut et heyam ni toon et wadadda edum ni u-ungnga tu.

20 Nantoon hi Reu ni telumpulut dewwa ey nahlag et wada hi Serug. 21 Nambiyag pay ni dewanggatut et pitun toon et wadadda edum ni u-ungnga tu.

22 Nantoon hi Serug ni telumpulu ey nahlag et wada hi Nahor. 23 Nambiyag pay ni dewanggatut ni toon et wadadda pay edum ni u-ungnga tu.

24 Nantoon hi Nahor ni dewampulut heyam ey nahlag et wada hi Terah. 25 Nambiyag pay ni hanggatut et hampulut heyam ni toon et wadadda edum ni u-ungnga tu.

26 Nantoon hi Terah ni nepitu ey nahlag et wadadda u-ungnga tu e hi Abram, hi Nahor et hi Haran.

27 Huyyadda helag Terah e amad Abram, hi Nahor et hi Haran. Nahlag hi Haran et wada hi Lot. 28 Hi Haran ey netey di bebley dad Ur di Babilonia ey nanengtun mategu hi ametu e hi Terah. 29 Hi Abram ey inahwa tu hi Sarai. Hi Nahor ey inahwa tu hi Milkah e u-ungngan Haran. Wada agin Milkah ni bii e hi Iskah. 30 Hi Sarai ey nebasi et endi u-ungnga tu.

31 Hi Terah ey ingkuyug tu hi Abram e u-ungnga tu, hi Lot e inap-apu tu e u-ungngan Haran, hi Sarai e ahwan Abram et hi-yanen da hu Ur di Babilonia et lumaw idad Kanaan. Nem nanda-guh idad Haran et mambebley idadman. 32 Et yadman neteyyan Terah eman ni dewanggatut et lima toon tu.