Huyya Tudek ni Intudek Daddan Hebrew
1
1 Ya lan nunman, ey nambakbaklang ni elaw hu nengipeenamtaan Apu Dios ni ehel tuddan aammed tayun nebayag. Yadda prophets hu nengi-i-hel ni ehel tun hi-gada. 2 Nem yan nunya law, ey ya U-ungnga tu nengipeenamtan ehel tun hi-gatsu. Hi Jesus hu nengipekapyaan Apu Dios ni emin niya hi-gatu pinutuk tun memeltan ni emin. 3 Hi-gatu keang-angan ni kasina-gey Apu Dios e hi Ametu, tep emin hu wadan Apu Dios ey wada daman U-ungnga tu. Hi-gatu mewan hu kamengippaptek ni emin ni lintun Apu Dios niya wada kabaelan tun mengippahding ni nunman tep ya kabaelan ni ehel tu. Yan neneklaan tun liwat tayu, ey immanemut di kabunyan et yumudung di winannan Apu Dios et yadman nengipeta-geyan Apu Dios ni saad tun meihhayned ni hi-gatun man-ap-apu.
Neta-ta-gey hi Jesus nem yadda anghel
4 Et humman hu, neamta e hi Jesus Christo hu neta-ta-gey nem yadda anghel. Yan nanghelan Apu Dios ni U-ungnga tu hi Jesus ey humman keang-angan tun neta-ta-gey hi Jesus nem yadda anghel. 5 Tep eleg ehelen Apu Dios ni hipan anghel hu inhel tun Jesus e kantuy
“U-ungnga dakan hi-gak. E-helen kun nunya e hi-gak hi Amam.” *1:5 Ang-ang yu hu Psalms 2:7, Acts 13:33 niya Hebrews 5:5.
Ey beken ni yadda anghel hu nanghelan tun kantuy
“Hi-gak ali hi Ametu ey hi-gatulli hu U-ungngak.”
Nem ya nanghelan tun nunya ey hi Jesus Christo ni ebuh. 6 Et ya pay inhel tun meippanggep ni U-ungnga tu e pengulwan tayun kamengullug, eman ni ngannganih ni pengippeang-angan tuddan tuud puyek ni U-ungnga tu ey kantuy
“Emin ida anghel ku ey mahapul ni hi-gatu daydayawen da.” †1:6 Deut. 32:43 7 Ya inhel Apu Dios ni meippanggep idan anghel ey kantuy “Yadda anghel ey bega-en kuddan ebuh. Ida kamengu-unnud ni pinhed ku niya pambalin kuddan dibdib winu kamantettebbel ni apuy.” ‡1:7 Psalm 104:4
8 Nem ya inhel Apu Dios ni meippanggep ni U-ungnga tu ey kantuy
“Apu Dios, mannananeng ni ingganah hu nan-ap-apuan mu niya meandeng hu muka pan-ap-apu. 9 Ya kayyaggud ni elaw hu nakappinhed mu, nem anggebe-hel mu hu lawah ni elaw. Et humman hu, hi-gak e Dios ni muka u-unnuda ey pinutuk dakan medaydayaw nem yadda edum mu ma-lat man-am-amleng kan peteg.” §1:9 [8-9] Psalm 45:6-7
10 Ya hakey mewan ni inhel Apu Dios ni U-ungnga tu ey kantuy
“Yan eman ni laputu ey lintum e Apu hu puyek, ya kabunyan niyadda hipan wadadman. 11 Nem hedin hi-gam, man wada ka ngu dedan ni ingganah. Nem yadda humman ni lintum ey meendiddallin emin ni hakey ni aggew. Heniddan balwasin kamambalin ni layyut. 12 E-kalen muddalli humman ni lintum, et hululan muddan baluh. Nem hedin hi-gam, man eleg kan hekey melullumman niya endi pappeg ni biyag mu.” *1:12 [10-12] Psalm 102:25-27
13 Endin hekey hu anghel ni tu nanghelan eyan kantuy
“Yudung kad winannan ku †1:13 Ya keibbellinan tu ey wada lebbeng tun man-ap-apud emin. ingganah apputen kudda buhul mu et hi-gam hu pan-ap-apu da.”
Nem ya nanghelan tun nunya ey ebuh hi Jesus Christo e U-ungnga tu.
14 Tep yadda anghel ey ispirituh ida e lintuddan Apu Dios ni bega-en tun ebuh. Yadda etan kapanhellaknibin Apu Dios di liwat da ma-lat mekihha-ad idan hi-gatu ey humman ida tuka pemeggain anghel ni memaddang ni hi-gada.