Judges
Ya meippanggep nunyan libluh e Judges
Huyyan libluh hu mengippeamta e eleg peka-u-unnuden idan helag Israel hu intugun nan Apu Dios ni hi-gadan mahapul ni petteyen dan emin hu nambebley di Kanaan niya hi-gatun ebuh hu daydayawen da niya pansilbian da. Nem nei-dum ida kumedek idan iKanaan et daydayawen da dios idan nunman ni nambebley diman. Hedin impahding idan helag Israel huyya ni in-abulut Apu Dios idan iKanaan ni mengubbat ni hi-gada ni inapput dadda.
Hedin neapput ida et ida kamanhelheltap, man ida kamantuttuyyun eleg da pengu-unnudan nan Apu Dios ni nampehemmehemmek idan hi-gatu ma-lat ihwang tuddad buhul da. Hedin hinumang Apu Dios hu dasal da, ni pinutuk tu hakey ni edum dan mengipappangngulun hi-gada niya mambalin ni huwet da. Et humman ni huwet da hu kamengippengngulun hi-gadan mengubbat ni buhul dan kamengippehelheltap ni hi-gada. Et hedin nekigubat ida, man daka apputadda buhul da et ida kameihwang.
Nem hedin netey etan kamengipappangngulun hi-gada, liniwwan ida mewan ni helag Israel hi Apu Dios ni nei-dum idaddan iKanaan ni mansilbin dios da. E-eggel ni neipahding hu henin nunya. Pinutuk nan Apu Dios hu hampulut epat ni nanhuluhulul ni nengipappangngulun hi-gada niya nengihwang ni hi-gadad buhul da ni nunyan emin ni toon.
Endi hu patul ni nunyan tsimpuh ni nan-ap-apun hi-gadan helag Israel. Ey gapu tep eleg da pinhed ni u-unnuden hi Apu Dios ey wada hakkeyey impahding tu hu kantun kayyaggud di tuka pannemnem. (17:6)
Ya neitudek eyad libluh:
1. Nginhay idan helag Israel hi Apu Dios niya eleg da pinhed ni u-unnuden. (chapters 1:1–3:6)
2. Impangulun Otniel ida helag Israel di gubat et pappegen da nan-ap-apuan idan iAram ni hi-gada. (chapter 3:7-11)
3. Impangulun Ehud ida helag Israel di gubat et pappegen da nan-ap-apuan idan iMoab ni hi-gada. (chapter 3:12-30)
4. Impangulun Samgar ida helag Israel et ihwang tudda. (chapter 3:31)
5. Impangulud Deborah nan Barak ida helag Israel di gubat, et pappegen da nan-ap-apuan idan iKanaan ni hi-gada. (chapters 4–5)
6. Impangulun Gideon ida helag Israel di gubat et pappegen da nan-ap-apuan idan iMidian ni hi-gada. (chapters 6–8)
7. Ya nan-ap-apuan nan Abimelek, hi Tola, hi Jair, hi Jeptah, hi Ibsan, hi Elon et hi Abdon. (chapters 9–12)
8. Ya nengapputan nan Samson idan iPilistia. (chapters 13–16)
9. Ya nangngehayan idan edum ni helag Israel nan Apu Dios et dayawen da dios ni kinapyan tuu. (chapters 17–18)
10. Ya nengubatan idan edum ni helag Israel idan helag Benjamin. (chapters 20–21)
1
Ya nengubatan idan helag Israel idan natdaan ni iKanaan
1 Yan neteyyan Joshua ey kan idan helag Israel nan Apu Dios ey “Hipan hi-gami hu memengngulun mengubbat idan iKanaan?”
2 Hinumang Apu Dios e kantuy “Ya helag Judah hu memengngulu. Peapput kun hi-gada hu nambebley di Kanaan et mambebley idadman.”
3 Kan idan helag Judah idan aaggi dan helag Simeon ey “Pakilaw kayun hi-gami etan di neitudun hi-gamin bebley et mambabaddang itsun mengubbat idan iKanaan et han dakeyu dama baddangi etan di neitudun hi-gayun pambebleyan yu.”
4 Et makibaddang ida helag Simeon di helag Judah ni an nengubat idan iKanaan et yadda Perisite et peapput Apu Dios idan hi-gada. Pintey da hampulun libun sindaluddan nunman ni buhul dad Besek. 5 Yadman hu nenammuan dan Adoni Besek e patul diman et makigubat idan hi-gatu. 6 Bimmesik hi Adoni Besek nem pindug da et depapen da et putulen da am-ama-an ni ngamay tu et ya heli tu. 7 Kan Adoni Besek ey “Yan nunman la ey impaputul ku am-ama-an ni ngamay niya am-ama-an ni heli idan nepitun patul, et kamemi-pi-dit ni kennen ni kame-gah di nakka pengngani. Yan nunya ey imbale Apu Dios humman ni impahding kun hi-gada.” Inlaw dad Jerusalem hi Adoni Besek et matey diman.
Ya nanggepan idan helag Judah ni Jerusalem niya Hebron
8 Ginubat idan helag Judah hu Jerusalem et piliwen da. Pintey dadda hu nambebley diman et legaben da etan bebley. 9 Et da pay gubaten ida iKanaan ni nampambebley di duntug, yad Negeb, yad hengeg ni duntug niyaddad mamegan bebley di appit ni south. 10 Hinggep da mewan ida iKanaan e nambebley di Hebron e Kiriat Arbah ngadan tun nunman et apputen dadda helag Seshai, yadda helag Ahiman niyadda helag Talmai ni nambebley diman.
Hinggep Otniel hu Debir
11 Yan nalpuan dadman ey limmaw ida helag Judah di Debir e ya ngadan tun nunman la ey Kiriat Seper. 12 Entanni ey kan Kaleb ey “Iddawat ku hi Aksah e u-ungngak ni bii et ahwaen etan ni tuun menggep ni Kiriat Sepher.” 13 Et hi Otniel e u-ungngan udidyan Kaleb e hi Kenas hu nanggep nunman ni bebley et hi-gatu nengiahwan Aksah.
14 Nunman ni aggew ni pan-ahwaan da ey inhel Otniel nan Aksah e mambeggan ametun mei-dum ni payew ni beltanen tu. Limmaw hi Aksah nan ametu et kamenghep di kebayyu tu ey kan ametun hi-gatuy “Hipa ibbagam?” 15 Kan Aksah ey “Edumim anhan hu pebeltan mun hi-gak tep eleg medennumi etan puyek di Negeb ni indawat mu. Idwasi muwak anhan ni puyek ni wada hebwak tu.” Et idwat nan Kaleb ni hi-gatu hu hebwak di ahpat niyad ehpen.
Ya nengenapputan idan helag Judah et ya helag Benjamin
16 Yan neni-yanan idan helag Judah ni Jericho ey nekilaw ida Kenite e helag lan nan aman ahwan Moses, et ida mekibebley idan iAmalek etan di eleg mebebleyin neihnup di Arad di Negeb. 17 Entanni ey ida nei-dum hu helag Judah idan helag Simeon, et da gubaten ida iKanaan ni nambebley di Sephat, et apputen dadda et bahbahen da humman ni bebley. Nginedanan da humman ni bebley ni Hormah. 18 Sinekup da pay hu Gaza, ya Askelon, ya Ekron et yadda etan ekka-kut ni bebley di nanlinikweh. 19 Sinekup da pay duntuduntug ni bebley tep binaddangan nan Apu Dios ida. Nem eleg da degyunen etan ida nampambebley di nedeklan tep gumek hu kalesah da. 20 Neidwat hu Hebron nan Kaleb tep humman dedan la hu inhel Moses nunman. Hi Kaleb hu nenegyun idan tellun u-ungngan Anak. 21 Nem yadda helag Benjamin ey eleg dadda degyunen hu Jebusite ni nambebley di Jerusalem et ingganah nunya ey nekibebley idadman.
22 Binaddangan daman Apu Dios ida hu helag Epraim nan Manasseh et da gubaten hu Bethel. 23 Ya ngadan tun nunman lan nengitu-dakan dan an mansi-im ni nunman ni bebley ey Lus. 24 Yan nunman ey hina-kupan idan nunman ni an nansiim hu hakey ni lakin nalpullid etan di bebley et kandan hi-gatuy “Itudum hu dellanen min umhegep eyad bebley yu et hemken daka.” 25 Intudu tu dellanen da et lumaw ida helag Epraim nan Manasseh et patyen dan emin hu nampambebley diman nem eleg da ilegat hu pamilyah etan ni lakin nengitudun dellanen da. 26 Entanni ey limmaw huyyan lakin nekibebley di bebley idan Hittite et mengapyan et-eteng ni bebley et ngadanan tun Lus, et humman ngadan tu ingganah nunya.
27 Eleg degyunen idan helag Manasseh hu tuun nampambebley di Bet Shan, yad Taanak, yad Dor, yad Ibleam, yad Megiddo niyadda etan bebley di nanlinikweh, tep inhammad idan iKanaan ni nambebley diman et eleg ida medegyun.
Yadda etan tutu-un eleg degyunen idan helag Israel
28 Yan eman ni wada law kabaelan idan iIsrael ey pinilit dadda humman ni iKanaan ni mangngunnun neligat ni ngunu, nem eleg da pea-allaw idadman ni bebley.
29 Hanniman ida daman helag nan Epraim e eleg dadda degyunen hu iKanaan ni nambebley di Geser et mekibebley idan hi-gada.
30 Anin ida daman helag Sebulun et eleg da degyunen ida iKanaan ni nambebley di Kitron niya Nahalol, et mekibebley idan hi-gada nem pinilit daddan pangngunnun neligat ni ngunu.
31 Eleg dama handegyun idan helag Asher ida iKanaan ni nambebley di Akko, yad Ahlab, yad Aksib, yad Helbah, yad Apek, yad Sidon niyad Rehob, 32 et gapu tep eleg dadda degyunen ey hi-gada daddakkel nambebleyan da nem yadda helag Asher.
33 Eleg dama degyunen idan helag Naptali hu iKanaan ni nambebley di Bet Semes niyad Bet Anat. Nekibebley idan hi-gada et pambalin daddan pangngungngunnu da.
34 Yadda helag Dan man nambebley ida etan di duntuduntug tep kaikka-leg idan Amorite ni dayyuan dad nedeklan. 35 Yadda Amorite ey eleg ida medegyun tep inhammad dan nambebley di Aijalon, yad Saalbim et yad Duntug e Heres nem yan eman ni et-eteng law kabaelan idan helag Epraim et ya Manasseh ey pinilit dadda Amorite ni mangngunnu henin himbut. 36 Ya pappeg ni bebley idan Amorite ey meippalpu etan di Keltad ni Akrabbim ingganah melebbahan hu Sela.