1 Netey hi Ehud ey nanliwat ida mewan hu helag Israel nan Apu Dios. 2 Et peapput nan Apu Dios idan etan ni patul di Kanaan e hi Jabin e nanha-ad di Hagor e bebley diman. Hi Sisera e nambebley di Haroshet Haggoyim hu ap-apuddan sindalu tu. 3 Heyam ni gatut ni kalesah ni gumek hu kaussalan Jabin ni mekiggubbat. Impanhelheltap tuddan peteg hu helag Israel ni dewampulu toon et mampehemmehemmek ida mewan nan Apu Dios.

4 Hi Deborah e biin prophet e ahwan Lappidot hu huwet idan helag Israel ni nunman. 5 Hi-gatu kapengillawiddan tuud Israel ni diklamuh da, et ipenuh tu etan di hengeg ni kandan Palmah nan Deborah e nambattanan ni Ramah niya Bethel di duntuduntug ni bebley di Epraim. 6 Hakey ni aggew ey impaeyag tu hi Barak e u-ungngan Abinoam e nambebley di Kedes di Naptali et kantun hi-gatuy “In-olden nan Apu Dios e Dios ni Israel e kantuy ‘Ikuyug mu hu hampulun libun sindalun helag Naptali nan Sebulun et ipengulum idad duntug di Tabor. 7 Teppangak ali hi Sisera e ap-apun sindalun Jabin e patul et i-li tudda kalesah tu niyadda sindalu tu et gubaten dakeyu etan di Wangwang e Kishon, nem baddangan dakeyun hi-gak et apputen yudda.’ ”

8 Himmumang hi Barak ey kantuy “U-unnuden ku et umlawwak hedin meki-li kan hi-gak. Nem eleggak umlaw hedin eleg ka mekillaw.”

9 Kan Deborah ey “Mekillawwak. Nem gapu tep henin nuntan hu pinhed mu ey beken ni hi-gam hu mengeddan ni meiddeyyaw ni pengapputan tayu tep peapput nan Apu Dios hi Sisera di hakey ni bii.” Et makilaw hi Deborah nan Barak di Kedes. 10 Ingkuyug Barak hu hampulun libun helag nan Sebulun et hi Naptali et ipengulu tuddad Kedes e nekilaw hi Deborah ni hi-gada.

11 Wada hakey ni Kenite e hi Heber e hini-yan tudda edum tun Kenite e helag Hobab e agin ahwan Moses et mengapyan kampud neihnup di Kedes etan di kad-an ni keyew ni oak di Saananim.

12 Yan nengamtaan Sisera e nanteyed hi Barak e u-ungngan Abinoam di Duntug e Tabor, 13 ey impaeyag tun emin hu sindalu tu et ya etan heyam ni gatut ni sindalu tun nampangkalesah ni wadad Haroshet Haggoyim et ipengulu tuddad Wangwang e Kishon.

14 Yan nunman dama ey kan Deborah nan Barak ey “Pandaddan kayu. Hi Apu Dios hu mengippengngulun hi-gayu et apputen yu hi Sisera nunyan aggew.” Et dumayyud Barak et hampulun libun sindalu tud Duntug e Tabor. 15 Ginubat idan sindalun Barak hu sindaluddan Sisera ey impatekut Apu Dios hi Sisera niyadda sindalu tu anin ida etan sindalun nampangkalesah. Entanniy dimmep-a hi Sisera di kalesah tu et bumsik. 16 Nampedug di Barak ida etan nampangkalesah et yadda sindalun Sisera ingganah di Haroshet Haggoyim et patyen daddan emin et endi hakey ni natdaan.

17 Hedin hi Sisera man bimmesik di kampun Jael e ahwan Heber e Kenite tep kayyaggud hu kapekiddagyumin pamilyah Heber nan hi Jabin e patul ni Hasor. 18 An dinammun Jael e ahwan Heber hi Sisera et kantuy “Hegep ka e Apu, eyad kampu mi. Entan takut.” Himmegep hi Sisera et likbutan Jael ni wangal. 19 Kan Sisera nan Jael ey “Ala kalli anhan ni danum tep na-wewwak.” Inukat Jael etan katat ni neiha-adan ni gatas et painuman tu et hantu mewan likbuti. 20 Kantun Jael ey “Ehneng ka eyad habyen ni kampu et hedin wada um-alin mengibbegga hedin wada tuudya, kammuy endi.”

21 Nem neuyeng hi Sisera tep neka-atu ey an inlan Jael hu paghek niya massilyo, et mambabbabbal ni limmaw di kad-an tu et ipa-pa tu hu paghek di pinigging ni ulu tu, et manhawwang lad puyek et matey. 22 Entanni ey immali hi Barak ni menemmak nan Sisera. An dinammun Jael et kantuy “Ikay et nak itudu etan tuun muka panhemmaka.” Himmegep hi Barak ey inang-ang tu hi Sisera e nepaghekan hu ulu tu e netey.

23 Yan nunman ni aggew ey inang-ang idan helag Israel e impaapput Apu Dios hi Jabin e patul ni Kanaan ni hi-gada. 24 Neipalpun nunman ey kamangkewedda dama law hu kabalinan idan helag Israel et lektattuy daka apputad gubat hi Jabin e patul et entanniy binahbah da hu nampatulan tu.