Jeremiah
Ya meippanggep ni libluh Jeremiah
Hi Jeremiah hu hakey ni prophet ni pinutuk Apu Dios ni mengippeamtaddan tutu-ud Judah niyad Jerusalem e kastiguen idallin Apu Dios tep ya liwat da. Dakel nanliwatan da, nema-ma hu nenaydayawan da niya nansilbian dan beken ni makulug ni dios ey beken hi Apu Dios ni inu-unnud da.
Nem yaddan tutu-ud Jerusalem ey eleg da pinhed ni dedngelen hu kae-e-helan Jeremiah tep eleg da pinhed ni mantuttuyyun liwat da. Lektattu law ey in-abulut nan Apu Dios ni hehgepen idan iBabilon hu bebley da et alen da dakel ni aap-apud Jerusalem et ilaw daddad Babilon e nambalin daddan balud. Neipahding huyya eman ni 594 B.C. (Ang-ang yu 2 Kings 24:8-17 niya Jeremiah 29:2)
Entanni et malebah hu hampulut dewwan toon (586 B.C.) ey hinggep mewan idan iBabilon hu Jerusalem et pateyen da dakel ni tuudman ey binahbah da bebley, yadda baballey niya Tempol. Ey dakel ida etan ni tutu-un natdaan hu inlaw daddan balud di Babilon. Et ebuh hu hahhakkey ni sigud ni nambebley di Judah ni natdaan diman. Entanni ey limmaw idad Egypt hu edum ni natdaan ni kamengipappangngulun tutu-ud Judah tep ida kaumtakut ni manha-ad diman. Impilit dan mekillaw hi Jeremiah. Yan kaweda dad Egypt ey intultuluy nan Jeremiah ni sinuttudduan ida etan edum tun iJudah ey impeenamta tu e kastiguen alin Apu Dios hu Egypt et yadda edum ni buhul ni Judah.
Ya neitudek eyad libluh:
1. Impeenamtan Jeremiah hu inhel Apu Dios ni hi-gatu e kastiguen tudda iJudah niya iJerusalem. (chapters 1–33)
2. Ya nanhelheltapan nan Jeremiah. (chapters 34–35)
3. Ya nengipeamtaan Jeremiah e mekastigudda bebley ni buhul ni Judah. (chapters 46–51)
4. Neipidwan neipeamta hu kebahbahan ni Jerusalem niya Tempol diman. (chapter 52)
1
1 Huyyan libluh ey meippanggep idan inhel niya inebig Jeremiah e u-ungngan Hilkiah e hakey ni padid Anathot e nambebleyan idan helag Benjamin. 2 Yan eman ni meikkehampulut tellun toon ni nampatulan Josiah e u-ungngan Amon di Judah ey immehel hi Apu Dios nan Jeremiah. 3 Immehel mewan ni hi-gatu eman ni nampatulan Jehoiakim e u-ungngan Josiah. Et mekihummangan law hi Apu Dios ni hi-gatu ingganah eman ni meikkelliman bulan ni meikkehampulut hakey ni toon ni nampatulan Sedekiah e hakey mewan ni u-ungngan Josiah. Yan nunman ey neilaw ida iJerusalem di edum ni bebley et mambalin idan himbut diman.
Ya inhel Apu Dios nan Jeremiah ni nemutukan tun hi-gatun mambalin ni prophet
4-5 Kan Apu Dios ni hi-gak ey “Yan eman ni eleg daka ni letuen ey pinili daka ngu dedan ni hakey ni prophet ma-lat mansilbi kad tutu-ud kebebbebley.”
6 Nem hinumang ku hi Apu Dios e kangkuy “Apu Dios e Eta-gey ni peteg, eggak amta e-e-helen ku, tep u-ungnga-ak pay ni.”
7 Kan Apu Dios ey “Entan tu ehel huttan. Lakkay kumad kad-an idan tutu-un pengittu-dakan kun hi-gam et mu ehelen ni hi-gadan emin hu e-helen kun hi-gam. 8 Entan takut mu tep wada-ak ni memaddang ni hi-gam niya mengippaptek ni hi-gam. Hi-gak e Dios hu nanghel nunya.”
9 Entanni ey kinepan Apu Dios hu bibil ku et kantun hi-gak “Dengel mu huyya, e-helen kudda law ni hi-gam hu mahapul ni e-helen mu. 10 Ey iddawat kun nunya hu kelebbengan mud kebebbebley, anin idad kapan-ap-apuin papatul ma-lat dammutun pe-kal mu ey pappegen mu hu pan-ap-apuan da winu apputen mudda niya bahbahen mu pan-ap-apuan da. Ey iddawat ku kelebbengan mun mengippeyaggud ni pan-ap-apuan da.”
11 Entanni ey kan mewan Apu Dios ni hi-gak ey “Jeremiah, hipa inang-ang mu?”
Hinumang ku et kangkuy “Inang-ang ku pangan almond.”
12 Kantuy “Neiptek hu inhel mu. Ang-angen ku ma-lat nanna-ud ni meippahding hu inhel kun pengastiguk.”
13 Entanni ey kan mewan Apu Dios ni hi-gak ey “Hipa inang-ang mu?”
Hinumang ku mewan e kangkuy “Inang-ang kud north hu neiba-nget ni danum ni kamanlelewwag e nesigging et ngannganih ni meidduyyag di appit nunya.”
14 Kantuy “Melpuddallid north hu memahbah idan tutu-un nambebley deya. 15 Ngannganih ni eyyagan kudda tutu-ud bebley di appit ni north et gubaten da Jerusalem et yadda edum ni bebley di Judah et bahbahen dadda luhud et hegepen da. Et iha-ad idallin patul dad heggeppan di deya Jerusalem hu yuddungan dan man-ap-apu. 16 Humman hu pengastiguk idan tutu-uk tep yadda lawah ni impahding da. Inwallengan da-ak et ya edum ni dios hu dayawen da. Em, nengapyaddan dios da, et humman ida law hu daka daydayawa.
17 Imay, pandaddan ka et mu ehelen ni hi-gadan emin eya e-helen ku. Entan takut mun hi-gada tep lektattuy petekkut daka anhan law ni hi-gak di hinangga da. 18-19 Dengel mu e Jeremiah! Emin ida hu tutu-ud Judah, anin idan papatul, yadda opisyal da niyadda papaddi ey anggebe-hel daka. Nem petuled dakan hi-gak ma-lat kabaelan mun mekihhanggan hi-gada. Mei-ellig kalli etan ni et-eteng ni bebley ni nakalluhud ey mei-ellig kalli etan ni gumek ni tukud niya giniling ni luhud et eleg daka kabaelan ni apputen, tep wada-ak ni memaddang ni hi-gam ey ippaptek dakan hi-gak. Hi-gak e Dios hu nanghel nunya.”