Job
Ya meippanggep nunyan libluh e Job
Hi Job ey kamekangngu-unnud ni ingganah nan Apu Dios. Nem hakey ni aggew ey limmaw hi Satanas di kad-an Apu Dios di kabunyan et ehelen tun hi-gatu e mukun kamekangngu-unnud hi Job ni hi-gatu ey tep tuka benbendisyonin ingganah. Niya kan Satanas nan Apu Dios ey gullat ni i-abulut tun panhelheltap tu hi Job et nanna-ud ni iwwalleng Job hu tuka pengullug niya iddutan tu hi Apu Dios. Pinhed Apu Dios ni peang-ang e beken ni makulug huyya et iebulut tu hi Satanas ni mengippehelheltap nan Job. Niya in-abulut tun endien Satanas hu hipan wadan Job.
Yan nengamtaan idan tellun gagayyum Job e hi Eliphas, hi Bildad et hi Sophar humman idan ligat ni neipahding ni hi-gatu ey limmaw idan an menga-alluk ni hi-gatu. Nem entanni kumedek ey kanday wada impahding Job ni lawah et mukun kamanhelheltap. Tep kanday gullat ni endi lawah ni impahding tu, et eleg et iebulut Apu Dios ni an manhelheltap. Nem kan Job ey endi tu impahding ni an umhulun ni pengippehelheltapan Apu Dios ni hi-gatu. Sinaggan nan Job niyadda gagayyum tun himmenummangan meippanggep nunya. Entanni ey nakaddismayah hi Job et endi law petek tu hu tuka pannemnem ni nunyan ligat ni tuka helheltapa.
Lektattuy immehel hi Apu Dios nan Job et kantun hi-gatuy eleg kabaelin tuun ewwatan ni emin hu meippanggep ni pinhed tun pehding di tutu-u tu. Ya importanteh ni pehding ni tutu-u ey mandinnel idan Apu Dios ma-lat amtaen da e anin ni hipa meippahding ni hi-gada et nakappinhed tudda niya ippaptek tudda. (Hebrews 10:38 et yad Habakkuk 2:4) Inhel Apu Dios e hi-gatu keta-ta-geyyan niya hi-gatu hu wada kelebbengan tun mengippahding ni hipan pinhed tu niya limpiyuh ni emin tuka pehding.
Ya inedal Job di nanhelheltapan tu ey emin hu kai-abulut Apu Dios ni kameippahding idan neminhed ni hi-gatu ey mambalin ni panyaggudan da. (Romans 8:28 et yad James 5:11)
Ya neitudek eyad libluh:
1. Ya nengipehelheltapan Satanas nan Job et ya nengendian tun emin ni wadan hi-gatu. (chapters 1–2)
2. Ya nemangulun nanhuhhummanganan di Job et yadda gagayyum tu. (chapters 3–14)
3. Ya meikkadwan nanhuhhummanganan di Job et yadda gagayyum tu. (chapters 15–21)
4. Ya meikkatlun nanhuhhummanganan di Job et yadda gagayyum tu. (chapters 22–31)
5. Ya inhel nan Elihu. (chapters 32–37)
6. Ya humang Apu Dios nan Job et ya bendisyon tun hi-gatu. (chapters 38–42)
1
1 Wada hakey ni tuun hi Job hu ngadan tun nambebley di Us. Hi Apu Dios hu tuka daydayawa niya tuka pannananeng hu tuka pengullug ni hi-gatu. Kayyaggud ni peteg hu elaw tu niya tuka hellipat-i ma-lat endi lawah ni tu pehding. 2 Hampulu u-ungnga tu e pitudda laki niya telludda bii. 3 Wada pitun libun kalneroh tu, tellun libun kamel tu, hanlibun baketu niya limanggatut ni kebayyu tu. Ey dakel bega-en tu. Hi-gatu kekekkeddangyanan idan nambebley di appit ni kasimmilin aggew.
4 Yadda etan pitun lalakkin u-ungngan Job ey ida kamanhulluhullul ni mampehemmul. Daka eyyagidda etan tellun agi dan biin mekian-anlan hi-gada. 5 Hedin negibbuh ida u-ungnga tun nampahemul, man kaumbangun hi Job ni kamangkewa-wa ma-lat man-appit ni kagihheba, e humman elaw ni panlinnih tuddan emin ni u-ungnga tu. Huyya kapehding Job tep kantud nemnem tuy ‘Entanni ey nanliwat ida u-ungngak e eleg da lispituhen hi Apu Dios.’
6 Hakey ni aggew ey limmaw ida anghel di kad-an Apu Dios ey nekilaw dama hi Satanas. 7 Et kan Apu Dios nan Satanas ey “Attu linallawwan mu?”
Ey kan Satanas ey “Nak ali nandaladalan di puyek.” 8 Kan mewan Apu Dios nan Satanas ey “Kaw inang-ang mu etan bega-en kun hi Job? Endi hu henin hi-gatud puyek. Kayyaggud ni peteg elaw tu niya tuka pannananeng hu tuka pengullug ni hi-gak. Tuwak kadaydayawa niya tuka hellipat-i ma-lat endi ipahding tun lawah.”
9 Hinumang Satanas ey kantuy “Kaw makulug makkaw ni tuka daydayawen hedin endi tu gungunahen? 10 Annagam nem muka paka-ippaptek idan hampamilyah, anin idan hipan wadan hi-gatu. Niya muka bendisyonin emin hu tuka pehding. Ang-ang mu kedi e kedangyan ni peteg! 11 Kedi nem endiem emin hu kinedangyan tu, ambeken lawah e-helen tun hi-gam!”
12 Kan Apu Dios ey “Ku anin, emin hu wadan hi-gatu ey ngenamung kan pinhed mun pehding. Nem entan tu lipusi.” Et hi-yanen nan Satanas hi Apu Dios et manglaw.
13 Hakey ni aggew ni kapanhahamuliddan u-ungngan Job di baley ni pengulwan ni lakin u-ungnga tu, 14 ey nambebessik ali hakey ni tuu et lumaw di kad-an Job et kantun hi-gatuy “Kami kaman-elladu e impangngunu midda etan lakkitun baka niya ida kamenge-ekkan etan di neihnup ni pattullan etan ida kebayyu, 15 ey entanniy wadadda immalin iSabeya et ibsik dan emin etan ida baka niyadda kebayyu. Niya pintey daddan emin hu bega-en mu et ebuhhak ni bimmesik, et deh e immali-ak ni mengippeamtan hi-gam.”
16 Eleg gibbuhen nunman ni bega-en hu tuka pan-e-hela ey dimmateng mewan hakey ni bega-en et kantuy “Linsitan ni kedyam ida kalneroh niyadda kamampattul et mangkatey ida. Ebuhhak ni natdaan, et deh e immali-ak ni an mengippeamtan hi-gam.”
17 Eleg gibbuhen nunman ni meikkadwan bega-en hu tuka pan-e-hela ey immali mewan hu hakey ni bega-en et kantuy “Immalidda tellun grupuh ni iKaldea et ibsik dadda kamel et pateyen dan emin hu bega-en mu. Ebuhhak ni natdaan et deh e immali-ak ni mengippeamtan hi-gam.”
18 Eleg tu gibbuhen hu tuka pan-e-hela ey immali mewan hu hakey ni bega-en tu et kantuy “Ida kamanhahamul hu u-ungngam di baley ni pengulwan mu, 19 ey immali na-let ni pewek ni nalpud eleg mebebleyi et tukkaden tu etan baley et matey idan emin. Hi-gak ni ebuh hu eleg matey, et deh e immali-ak ni mengippeamtan hi-gam.”
20 Imminah hi Job et bi-kien tu balwasi tu, tep nemahhig lemyung tu. Minukmukan tu ulu tu et lumukbub di puyek et dayawen tu hi Apu Dios. 21 Kantuy “Yan neiungngaak ey endin hekey intabin ku, ey henin nunman alin ketteyyan ku e endi nak ittabin. Hi Apu Dios hu nengidwat ni emin ni kinedangyan ku niya emin hu wadan hi-gak, ey hi-gatu mewan hu nemangngad. Medeyyaw hu ngadan Apu Dios!”
22 Anin ni neipahding ida huyyan ligat nan Job et eleg manliwat, tep eleg tu pabehul nan Apu Dios humman idan neipahding ni hi-gatu.