Joshua
Ya meippanggep nunyan libluh ni Joshua
Huyyan libluh ni Joshua ey impeamta tu nengipeamnuan nan Apu Dios ni insapatah tun Abraham e iddawat tu hu bebley e Kanaan idan helag tu e humman ida hu helag Israel. (Gen. 15:18-21 et yad 17:18) Intugun Apu Dios ni nunman idan helag Israel e gubbaten dadda tutu-ud Kanaan et pateyen dan emin hu nambebley diman. (Deut. 7:1-5) Huyyaddan iKanaan ey nemahhig hu kalwah da, tep daka petteya u-ungnga da e dadda kagihheba et iappit daddan dios da. (Leviticus 18:21-30)
Indawat nan Apu Dios hu kabaelan nan Joshua et yadda edum tun helag Israel ni mengapput idan tutu-un nambebley di Kanaan. Huyya keang-angan tu e hi Apu Dios hu makulug ni Dios niya et-eteng hu kabaelan tu nem yadda dios idan iKanaan. Ya mahapul ni amtaen idan helag Israel di deya ey pannenneng dan mengu-unnud nan Apu Dios. Ey mahapul ni hi-gatun ebuh daydayawen da niya pansilbian da, tep pinili tuddan tuu tu. (Deut. 7:6-11)
Ya neitudek eyad libluh:
1. Ya hinggepan idan helag Israel di Kanaan e bebley ni insapatah nan Apu Dios ni iddawat tun hi-gada. (chapters 1–5)
2. Ya nekigubatan idan helag Israel idan iKanaan et apputen dadda. (chapters 6–12)
3. Ya nengegedwaan idan helag Israel ni Kanaan. (chapters 13–22)
4. Ya nanggillig ni intugun nan Joshua idan helag Israel et ya neteyyan tu. (chapters 23–24)
1
Inhel Apu Dios nan Joshua e ippangulu tudda helag Israel et lumaw idad Kanaan
1 Yan eman ni endi law hi Moses e bega-en Apu Dios tep netey ey immehel hi Apu Dios nan Joshua e u-ungngan Nun, e kamemabbaddang lan nan Moses ni nunman. 2 Kantun hi-gatuy “Yan nunya tep endi law hi Moses e bega-en ku, ey pandaddan kayuddan emin eyan tutu-u et man-agwat kayud Wangwang e Jordan et lumaw kayud bebley ni iddawat kun hi-gayun helag Israel. 3 Inhel ku dedan lan Moses ni nunman e iddawat kun hi-gayun helag Israel emin hu bebley ni lawwan yu. 4 Ya pappeg ni iddawat kun pambebleyan yu, ey meippalpud desert di appit ni south ingganah di duntug di Lebanon di north, yad Wangwang e Euphrates di appit ni kasimmilin aggew et yad nampambebleyan idan Hittite, et mampalaw lad Baybay e Mediterranean di appit ni kelinnugin aggew. 5 E-helen kun hi-gam e Joshua e endi hu mabalin ni an mengapput ni hi-gam ni nunyan ketaggum, tep wada-ak ni ingganah ni memaddang ni hi-gam, henin nemenaddangan ku lan Moses. Eleg daka hi-yana niya eleg daka iwwalleng.
6 Pekedhel mu nemnem mu ey entan takut tep hi-gam mengippengnguluddan tuuk ni an mambebley etan di inhel kuddan aammed yun iddawat kun hi-gayu. 7 Nem mahapul ni pekedhel mu nemnem mu niya entan takut mu. Ey ang-ang mu et u-unnuden mu emin ida etan Tugun kun indawat Moses ni hi-gayu. Entan tu iwalleng anin ni hakey eyaddan Tugun et kayyaggud ni ingganah hu meippahding ni hi-gayu anin ni attu lawwan yu. 8 Mahapul ni ittuttuddum idan tuu hu neitudek di Tugun ku ey mahapul ni eddaeddalen mun kawwalwal niyan hileng. Ey mahapul ni u-unnuden mun emin hu neitudek diman ma-lat yumaggud ka ey kayyaggud pambalinan ni emin ni pehding mu. 9 Ey nemnem mu e hi-gak e Ap-Apu e Dios yu, ey wada-ak ni ingganah ni umbaddang ni hi-gam, anin ni attu lawwam. Et humman hu, entan kedismayah mu ey entan takut mu. Pekedhel mu nemnem mu ey pandinel kan hi-gak.”
Ya in-olden Joshua idan tuu
10 Entanni ey in-olden Joshua idan aap-apun 11 umlaw idad kampun emin ni tutu-u et da ehelen ni hi-gada e kanday “Pandaddan kayun kennen yu tep melebbah tellun aggew ey man-agwat itsud Wangwang e Jordan et itsu mambebley etan di indawat Apu Dios tayun hi-gatsu.”
12 Kan Joshua idan helag Reuben nan Gad et yadda kagedwah ni helag Manasseh ey 13 “Entan tu liwwan eman inhel lan Moses ni hi-gayu e iddawat Ap-Apu e Dios tayu eya bebley di Jordan di appit ni kasimmilin aggew et pambebleyan yu. 14 Anin manha-ad idadya hu aahwa yu, yadda u-ungnga yu, et yadda animal yu. Nem hedin hi-gayuddan sindalu, ipengulu yudda edum tayun helag Israel et man-agwat itsud Wangwang e Jordan et baddangan yudda aaggi yu 15 ingganah ellan tayu humman ni indawat Apu Dios ni hi-gada dama bebley di Jordan di appit ni kelinnugin aggew, ma-lat melinggep law emin helag Israel, et han dammutun mambangngad kayun mambebley kayu eyad appit ni kasimmilin aggew ni intudun Moses e bega-en Apu Dios ni hi-gayu.”
16 Hinumang idan tuu hi Joshua e kanday “Pehding min emin hu in-olden mu. Ey anin ni attu pengittu-dakan mun hi-gami et umlaw kami. 17 U-unnuden min emin hu e-helen mu henin nengu-unnudan min Moses. Hi Apu Dios tayu hu memaddang ni hi-gam henin nemenaddangan tun Moses. 18 Hedin wada mangngenghay ni e-helen mu winu eleg mengu-unnud ni olden mu ey mahapul ni pepettey. Entan panhelindewa, nem pandinel ka ey ipahding mu emin hu kabaelam.”