Malachi
Ya meippanggep nunyan libluh nan Malachi
Hi Malachi ey prophet nan Apu Dios idan helag Israel eman ni pakelappu dad Babilon. Ya Tempol di Jerusalem ni nebahbah nunman ey neiyayyaggud law niya ida law kaman-appit meippuun di neitudek di Tugun. (Ang-ang yu hu libluh nan Ezra.)
Nem anin ni nambangngad idad Jerusalem et eleg da pannananeng hu daka pengu-unnudin Apu Dios. Lawah kapehding idan padi niya eleg da daydayawa hi Apu Dios, tep daka i-appit hu animal ni wada dipektoh tu. Ma-nut daka peang-ang-ang e kayyaggud ida, nem ya kakulugan tu ey lawah ida. Eleg da lispituha hi Apu Dios. Nambahul ida dama lalakki tep inaddum dadda hu bibi-in beken ni Jews et dayawen da dios ni kinapyan tuu e beken hi Apu Dios. Ya hakey mewan ni daka pehding ey daka hi-yana ahwa da e eleg da pannananeng hu insapatah da eman ni nelahinan da. Ya hakey mewan ni liwat da ey eleg da iddawat nan Apu Dios hu lebbengtun meidwat ni hi-gatun kapulun limmu da.
Ya neitudek eyad libluh:
1. Ya impeminhed nan Apu Dios idan tutu-ud Israel niya ya anggeba-ing ni daka pehpehding. (chapters 1:1–2:9)
2. Imbunget nan Malachi ida helag Israel tep ya liwat da niya ngehay dan Apu Dios. (chapter 2:10-17)
3. Impeamtan Apu Dios e anggegannu law hu ellian tun pengastiguan tuddan tutu-u tu. (chapters 3:1–4:6)
Nakappinhed nan Apu Dios ida tutu-u tu
1
Huyya inhel nan Apu Dios nan Malachi ni e-helen tuddan iIsrael.
Kan Apu Dios idan tutu-u tuy “Pininhed dakeyu dedan ni hi-gak.” Nem hinumang da et kanday “Inna-num ni nengipeang-ang ni neminhed mun hi-gami?”
Et kan Apu Dios ey “Han-agid Esau nan Jacob, nem ya eman la ammed yun hi Jacob niya hi-gayun helag tu hu pininhed ku. Eleggak pinheden hi Esau niyadda helag tun iEdom. * 1:3 [2-3a] Romans 9:13 Binahbah ku hu nambebleyan dan duduntug et mambalin hu bineltan dan bebley ni nambebleyan idan animal di desert, henin jackal.”
Hedin kan idan iEdom e helag Esau ey “Anin ni nangkebahbah hu bebley mi et iyayyaggud mi.”
Nem hummangen nan Apu Dios e Kabaelan tun emin et kantuy “Anin ni iyayyaggud da et bahbahek ali damengu. Mandingngel ali bebley dan ‘Bebley ni Liwat’ niya mengeddanan ali nampambebley diman ni ‘Tutu-un Kaibubbunget Apu Dios ni ingganah!’ Ang-angen idallin iIsrael hu nebahbahan nunman ni bebley et kandalliy ‘Impeang-ang nan Apu Dios hu et-eteng ni kabaelan tu, anin di edum ni bebley e beken ni ebuh eyad bebley tayun iIsrael.’ ”
Ya nengibungetan Apu Dios ida etan ni padin nengiappitan dan endi silbi tun kamei-appit
Kan Apu Dios e Kabaelan tun emin idan padi ey “Ya u-ungnga ey tuka lispituha ametu. Hanniman dama hu bega-en e tuka lispituha hu kan bega-en ni hi-gatu. Ey hedin hi-gayu, man hi-gak hu ameyu niya apu yu, nem eleg yuwak lispituha. Nginhay yuwak. Nem kanyuy ‘Hipa inna-nu min nangngehay ni hi-gam?’
Nginhay yuwak ni nengiappitan yuddan nakka bellawan in-appit yud altar ku. Kan yu mewan ey ‘Inna-nu tun eleg mi panlispituhan ni hi-gam?’ E-helek ni hi-gayu e eleg yuwak lispituhen, tep nginehhay hu impahding yun nan-appit ni hi-gak.
Hedin in-appit yu hu nekulap winu kamandedgeh, niya nepi-day ni animal yun hi-gak, kaw ya yuka pannemnem ey beken ni neihla impahding yu? Ipatna yun iddawat hu hanniman ni animal ni gobernor yu et ang-angen tayu hedin man-am-amleng winu hedin umbaddang di hipan mahapul yu! Hi-gak e Ap-Apu e Kabaelan tun emin hu nanghel nunya.
Imay, pandasal kayu pangngu et mampehemmehemmek kayun hi-gak! Kaw kan yu nem dedngelen dakeyu ey henin nuntan yuka i-appit ni hi-gak? Hi-gak e Ap-Apu e Kabaelan tun emin hu nanghel idan nunya. 10 Hamban wada hakey ni hi-gayun mengillekbin Tempol et eleg maiappit ida hu endi silbi tun kamei-enappit ey. Eggak ebbuluta hu yuka i-appit, tep eggak um-amleng ni hi-gayu. 11 Nem daydayawen idallin katuutuud kebebbebley hu ngadan kun kakkabbuhhan ingganah ni mahmahdem. Gihheben da bangbanglun i-appit dan hi-gak niya i-appit da hu nakka ebbulutan kamei-appit. Emin ida ey hi-gak daydayawen da, tep mandingngel ali ngadan kud kebebbebley. Hi-gak e Ap-Apu e Kabaelan tun emin hu nanghel idan nunya. 12 Nem hedin hi-gayu ey eleg yu deyyawa ngadan ku tep yuka i-appit di Tempol ku hu kamepihhul ni mekkan. Ya pinhed yun e-helen eyad yuka pengippahdingin nuntan ey endi silbin altar ku. 13 Kan yu mewan ey ‘Impeinglay mi huyyan kaippenahding!’ ni intangaw yu eleng yun ngehay yun hi-gak. Nemnem yu kedi, yuka i-appit ni hi-gak ida sinekew yu, ya nepi-day niya kamandedgeh ni animal yu. Kaw kan yu nem ebbulutek ida huttan ni i-appit yun hi-gak? Hi-gak e Ap-Apu e Kabaelan tun emin hu nanghel nunya. 14 Kastiguen kudda hu kamengi-appit ni hi-gak ni endi silbi tun animal e anin ni wada dedan hu kayyaggud ni animal dan inhel dan i-appit dan hi-gak, et beken humman ni daka i-appit. Tep nandingngellak ni patul niya kametekkuti ngadan kud kebebbebley, nem ay eleg yuwak ni-ngangu lispituha. Hi-gak e Ap-Apu e Kabaelan tun emin hu nanghel nunya.”
Ya nanliwatan idan padi nan Apu Dios ni ya nengipappangnguluan daddan tutu-un nanliwat

*1:3 1:3 [2-3a] Romans 9:13