Nahum
Ya meippanggep nunyan libluh nan Nahum
Yadda iAssyria ey anggetakkut ida niya mabunget ida tep ya kapehding idan sindalu da ey daka bahbahadda kebebbebley ni nan-ala da hu hipan nebalol ni meelladman. Hin-addum mewan ni nealay ingkuku da buhul da, anin ni mategudda. Yan nunman ni tsimpuh ey sinekup law idan sindalu da hu edum ni bebley, anin ni ya north ni Israel (721 B.C.) niyadda edum ni bebley di Egypt. (663 B.C.) Pinatnaan da mewan ni sekkupen hu Judah, nem inapput idan Apu Dios hu sindalu da. (701 B.C. Ang-ang yu hu Isaiah 36-37) Nem anin ni henin nunman et nannaneng hu et-eteng ni kabaelan da niya hi-gada hu kametekkusin buhul idan tutu-un Apu Dios di Judah.
Nelabah hu hanggatut et neliman toon eman ni linawwan nan Jonah di Nineveh e capital ni Assyria ey nantuttuyyudda tutu-udman ni nangngelan dan impeamtan Jonah ni pemahbahan Apu Dios ni bebley da tep ya liwat da. Nem yan nunyan tsimpuh nan Nahum ey nambalin mewan ni lawah hu kapehpehding idan tutu-udman. Et mukun yan nunyan tsimpuh ey impeamtan Nahum ni hi-gada e mebahbah ida niya endi law hu namnamah ni bebley da e Nineveh ni meihwang, anin hi-gadan bimmebley.
Meippahding huyya tep hi Apu Dios ey kayyaggud ni peteg et mahapul ni kastiguen tudda lawah ni tutu-un buhul idan tutu-u tu. Huyyan impeamtan Nahum hu immidwat ni namnamah idan tutu-ud Judah. Immamnu huyya ni nemahbahan ni Media niya Babilon ni Nineveh eman ni 612 B.C.
Ya neitudek eyad libluh
1. Hi Apu Dios ey kayyaggud ni peteg. Tuka kastiguadda hu lawah ni tutu-u. (chapter 1)
2. Neipeamta hu kebahbahan ni Nineveh. (chapter 2)
3. Lawah idan peteg hu iNineveh. Ya kastigu da ey mekabbahbah ida. (chapter 3)
1
1 Huyyan neipeamtan meippahding ni Nineveh ey impei-innep Apu Dios nan Nahum e prophet di Elkos.
2 Hi Apu Dios ey eleg tu pinhed ni wada hu edum ni dios ni daydayawen. Tuka kastiguaddan bunget tu hu kamengehhing ni hi-gatu. Tuka bahbahadda buhul tu. 3 Beken ni kabbubunget hi Apu Dios, nem mahapul ni kastiguen tudda nambahul. Et-eteng ni peteg kabaelan tu. Tuka peang-ang hu kabaelan tud pewek. Yadda kulput ey humman ida dep-ul ni kapeehbuk ni heli tu. 4 Hedin mewan minandal tu hu baybay niya wangwang ma-lat mema-ganan ey tu-wangun kamema-gani, et kamangkakpit hu mateban helek di pattullan di Bashan niyad Karmel, anin idan habung di Lebanon. 5 Kamanyegyeg hu etata-gey ni duntug niya kamangkaumah hu nangkedunduntug hedin nampeang-ang hi Apu Dios. Et humman hu, nemahhig hu takut ni tutu-ud kebebbebley ni hi-gatu.
6 Hipa tuun dammutun meihwang hedin bimmubbunget hi Apu Dios? Heni kamantetebbel ni apuy hu bunget tu niya kamangkebukli hu babattu et ida kamambalin ni dep-ul di hinangga tu.
7 Kayyaggud hi Apu Dios. Hi-gatu hu kakeihhikkugiddan neligtan niya tuka ippaptek ida hu kamengiddinnel ni hi-gatu. 8 Nem hedin yadda buhul tu ey tudda kapakabbahbaha e henin kapehding ni dinlu e endi kametdai. Hanniman ali pehding tun Nineveh et mepappeg. Anin ni umbesik ida tuudman et mantaluddad engeenget et hemmaken tudda damengu et bahbahen tudda. 9 Kameminpinhakkey hu kapemahbahin Apu Dios idan tuun kamamplennuh ni mekihhanggan hi-gatu. 10 Heniddalli meknad hebit hu buhul tu et mandangidangiw idan henidda nebuteng. Niya heniddalli nema-ganan ni dagemid payew e kaeppuyi et magiheb. 11 Hipa ni-man huttan ni patul di Nineveh ni an namplanuh ni lawah ni pehding tun Apu Dios?
12 Heninnuy hu kan Apu Dios idan tutu-u tun helag Israel “Anin ni dakel hu bebley ni memaddang ni Assyria di pekiggubbatan da et mebahbah idalli et meendidda. Kinastigu dakeyun tutu-uk e in-abulut kudda humman ni iAssyria ni mengippehelheltap ni hi-gayu, nem eggak law ippidwa. 13 Tep pegtangek law hu nemangkiling dan hi-gayu et pappegek hu yuka panhelheltapin daka pehpehding.”
14 Heninnuy hu kan Apu Dios idan iAssyria di Nineveh. Kantuy “Eleg kayulli mehlag ma-lat endilli memeltan ni ngadan yu. Niya nakka pan-iddaddan ida kulung yu tep nemahhig kalinewah yu. Bahbahek ida hu i-ingngeh ni dios yud kinenapya yun baley da.
15 Iang-ang yu e iJudah eman di duntug. Iyyalli hu tuun mengippeamtan kayyaggud hu meippahding niya peamta tu e melinggep kayu law. Pampiyestah kayun iJudah, niya ipahding yudda insapatah yu. Endilli law hu buhul yun um-alin mengubbat ni hi-gayu tep mekabbahbah idallin emin.”