Nehemiah
Yan eya libluh nan Nehemiah
Hi Nehemiah ey bega-en nan patul e hi Artaserses di Susa. Nem entanni ey wada nalpud Jerusalem ni nengipeamta e lawah kameippenahding diman. Yadda helag Israel ni nambangngad diman ey endi linggep da, tep ma-nut neiyayyaggud hu Tempol, nem nebahbah hu luhud di nanlinikweh ni bebley. Et humman hu, endi panheniddan helag Israel idan buhul dan nambebley di nanlinikweh di bebley da.
Et an mekihummangan hi Nehemiah nan patul ma-lat iebulut tun umlaw di Jerusalem et tu iyayyaggud hu bebley et ya luhud tu, ey in-abulut nan patul. Huyyan libluh hu neitudekan ni impahding nan Apu Dios ni nemaddang nan Nehemiah e nengipappangngulun mengiyayyaggud ni luhud ni Jerusalem, anin ni wadadda buhul dan kamengikka-leg ni pengiyayyaggudan dan nunman.
Ya neitudek eyad libluh:
1. Impappangngulun Nehemiah hu pengiyayyaggudan dan luhud di nanlinikweh di Jerusalem. (chapters 1–7)
2. Imbidbid nan Ezra hu Tugun nan Apu Dios idan helag Israel et mantuttuyyuddan liwat dan Apu Dios. (chapters 8–10)
3. Wadadda edum ni helag Israel ni nambebley di probinsiya di Judah et yad Benjamin ni nei-tan di Jerusalem et mambebley idadman. (chapter 11)
4. Neieng-eng nan Apu Dios hu luhud di Jerusalem. (chapter 12)
5. Kinastigun Nehemiah ida hu eleg mengu-unnud ni Tugun nan Apu Dios. (chapter 13)
1
Ya neitudek meipanggep ni impahding Nehemiah e u-ungngan Hekaliah
Huyyadda hu impahding ku e hi Nehemiah e u-ungngan Hakaliah ni intudek ku.
Yan eman ni bulan ni Kisleb ni meikkadwampulun toon ni nampatulan Artaserses, ey wada-ak di Susah e nambebleyan idan ap-apudman ni bebley. Entanniy immali hi agik e hi Hanani ni an menang-ang ni hi-gak e wadadda edum tun lalakkin nalpuddad Judah, et ibegak ni hi-gada hedin hipa inna-nu tud Jerusalem niyadda etan edum min Jew ni nambangngad ni nalpud Babilon e neilawwan dan nunman. Hinumang da ey kandan hi-gak ey “Et-eteng kapanligligatiddan nambangngad ni tutu-ud Judah, niya nemahhig baing da. Nebahbah hu tuping ni nanlinikweh ni Jerusalem ey negiheb hu ida eheb ni bebley.”
Dingngel ku impanumang dan imbagak ey yimmudungngak et numngihhak. Nemahhig lemyung ku et eleggak mangan ni pigan aggew ey nandasallak nan Apu Dios di kabunyan. Kangkud dasal kuy “Apu Dios e Dios di kabunyan, eta-gey kan peteg, et mukun daka kapekaddeyawa. Muka peamnu hu muka e-helan pehding mun panyaggudan idan neminhed niya kamengu-unnud ni hi-gam. Apu Dios, dengel mu anhan hu dasal kun kawwalwal niyan hileng. Nakka pan-iddasali hu tutu-um ni helag Israel. Nakka ebbuluta e nanliwat kamin hi-gam. Em, anin ni hi-gak et yadda pamilyah ku et nanliwat kamin hi-gam. Nemahhig nanliwatan min hi-gam. Eleg mi u-unnuden ida intugun mu, yadda linteg mu niyadda edum ni mahapul ni u-unnuden min tugun mun indawat mu lan Moses e bega-en mu.
Nemnem mu anhan ni nunya hu inhel mun nunman nan Moses e kammuy ‘Hedin eleg yuwak u-unnuda, man iwwahit dakeyun emin di kebebbebley eyad puyek. Nem hedin mantuttuyyu kayu et mengu-unnud kayu mewan ni hi-gak, man dakeyulli bangngaden et i-li dakeyud bebley ni pinilik ni pandeyyawan yun hi-gak, anin ni attu eyad puyek kad-an yu.’
10 Bega-en dakemi e Apu Dios. Hi-gami hu tutu-um ni inhewang mu tep et-eteng hu kabaelam. 11 Dengel mu anhan e Apu eya dasal ku, niya dengel mu dama dasal idan edum ni bega-en mun pinpinhed dan menaydayaw ni hi-gam. Baddangi muwak anhan et mambalin ni kabbabbal hi patul ni hi-gak ni nak pambeggaan ni baddang tu.”
Yan nunyan tsimpuh ey hi-gak hu kamampaptek ni kainnuman patul.