Numbers
Ya meippanggep nunyan libluh ni Numbers
Huyyan libluh ey nengadanan ni Numbers tep neitudek di deya hu dewwan nambaklang ni nebilangan idan sindalun helag Israel. Ya nemangulun nebilangan idan sindalu ey yan eman ni meikkadwan toon ni neni-yanan idan emin ni helag Israel ni Egypt. Ya meikkadwa ey neipahding eman ni nelabah hu telumpulut walun toon e netey ida law ni emin hu nemangulun sindalu niya anggegannu law ey umdateng ida tutu-ud bebley e Kanaan.
Insapatah nan Apu Dios ni nunman idan helag Israel e iddawat tun hi-gada hu bebley e Kanaan. (Exodus 3:17) Nem entannit dimmateng ida helag Israel di pappeg ni bebley, ey eleg da kulugen hu inhel Apu Dios ni iddawat tun hi-gada humman ni bebley. Endi dinel dan baddangan Apu Dios idan mengubbat ni tutu-ud Kanaan. Et humman hu, ya kastiguddan helag Israel ni dewampulu toon tu winu nehuluk ey eleg ida maiebulut ni umhegep di bebley e Kanaan, et lumeniklikweh idad eleg mebebleyi ingganah neteyyan da. (14:26-35)
Nem anin ni eleg u-unnuden idan helag Israel hi Apu Dios et impaptek tuddan na-pat ni toon ni nanliklikwehan dad endi bebley. (Deut. 29:5 et yad Neh. 9:21) Ey indawat tuddan u-ungnga da hu bebley e Kanaan e humman dedan insapatah tun nunman.
Yadda neitudek eyad libluh:
1. Ya nemangulun nemilangan Moses idan helag Israel. (chapters 1–4)
2. Yadda tugun ni u-unnuden idan tutu-u. (chapters 5–10)
3. Ya nekastiguan idan kamanlillih. (chapters 11–12)
4. Ya e-eggel ni nangngehayan idan tutu-u nan Apu Dios. (chapters 13–20)
5. Ya nanliklikwehan idan helag Israel di endi bebley. (chapters 21–25 et ya 33)
6. Ya meikkadwan nemilangan nan Moses idan helag Israel. (chapters 26–27)
7. Yadda nambakbaklang ni i-appit idan helag Israel nan Apu Dios. (chapters 28–30)
8. Ya negenedwaan ni Kanaan et ika-peng idan helag Israel. (chapters 31–36)
1
1 Yan eman ni nemangulun aggew ni meikkadwan bulan neipalpun neni-yanan idan helag Israel ni Egypt e nanengtun wadaddad Sinai ey immehel hi Apu Dios nan Moses etan di daka pandeyyawi et kantuy 2-3 “Ehel mun Aaron et yu bilangen ida edum yun helag Israel meippuun di pewen da niya pamilyah da. Ilista yudda ngadan emin idan lalakkin dewampulu toon da winu nehuluk e humman ida dammutun mekiggubbat. 4 Ehel mu et baddangan dakeyuddan ap-apun hanhakkey ni pewen ni mambillang.
5 Huyyadda ngadan ni aap-apun neputuk ni umbaddang ni hi-gayu.
Yad helag Reuben ey hi Elisur e u-ungngan Sedeur. 6 Yad helag Simeon ey hi Selumiel e u-ungngan Surishaddai. 7 Yad helag Judah ey hi Nashon e u-ungngan Amminadab. 8 Yad helag Issakar ey Nethanel e u-ungngan Suar. 9 Yad helag Sebulun ey hi Eliab e u-ungngan Helon. 10 Yad helag Epraim e u-ungngan Joseph ey hi Elishama e u-ungngan Ammihud. Yad helag Manasseh e hakey pay ni u-ungngan Joseph ey hi Gamaliel e u-ungngan Pedahsur. 11 Yad helag Benjamin ey hi Abidan e u-ungngan Gideoni. 12 Yad helag Dan ey hi Ahieser e u-ungngan Ammishaddai. 13 Yad helag Asher ey hi Pagiel e u-ungngan Okran. 14 Yad helag Gad ey hi Eliasap e u-ungngan Deuel. 15 Yad helag Naptali ey hi Ahira e u-ungngan Enan.” 16 Huyyadda neputuk ni mengi-ehneng ni helag da e ap-apuddan pewen da.
17 Di Moses nan Aaron niyadda humman ni hampulut dewwan aap-apu 18 ey impaeyag dan emin ida helag Israel ni nunman ni aggew, et ilistadadda lalakkin nantoon ni dewampulu et nehuluk meippuun di nahlagan da, 19 tep humman hu naka-ittugun Apu Dios nan Moses. Et bilangen di Moses idadman Sinai e eleg mebebleyi.
20-46 Meippalpun Reuben e pengulwan ni u-ungngan Israel e hi Jacob hakey ni ngadan tu, ey inlista dadda helag dan dammutun mansindalun nantoon ni dewampulu et nehuluk meippuun di pewen da niya pamilyah da. Huyya listaan ni bilang da:
| Ya nahlagan da | Ya bilang da |
| Hi Reuben | 46,500 |
| Hi Simeon | 59,300 |
| Hi Gad | 45,650 |
| Hi Judah | 74,600 |
| Hi Issakar | 54,400 |
| Hi Sebulun | 57,400 |
Di Epraim nan Manasseh e u-ungngan Joseph ey neibilang idan u-ungngan Israel
| Hi Epraim | 40,500 |
| Hi Manasseh | 32,200 |
Huyyadda edum ni helag Israel
| Hi Benjamin | 35,400 |
| Hi Dan | 62,700 |
| Hi Asher | 41,500 |
| Hi Naptali | 53,400 |
| Ya bilang dan emin ey | 603,550. |
47 Yadda helag Levi ey eleg ida mei-dum ni neilista 48 tep inhel Apu Dios nan Moses ni nunman e kantuy 49 “Entan tudda i-dum di listaan ni mansindalu. 50 Tep ya ngunu da ey ya mampaptek ni Tabernacle niyadda ngunut ni wadadman. Hi-gada pay memehhan ni Tabernacle niyadda ngunut diman hedin hi-yanen yu nangkampuan yu et man-e-tan kayu. Ey mahapul ni mangkampuddad nanlinikweh ni Tabernacle. 51 Hedin man-e-tan kayu, ey hi-gada hu memukkal ni Tabernacle niya hi-gada mengiyayyaggud ni kei-tanan yu. Eleg mabalin ni an meihnup ida edum yun helag Israel tep mettey ida. 52 Meennappil kayun helag Israel ni mangkampu meippuun di pewen yu e wada hakey idan mengipappangngulu ey i-ehneng da pewen da niya wada bandelah da.
53 Yad nanlinikweh ni Tabernacle hu pangkampuan idan helag Levi, tep mangguwwalyadda ma-lat endi an meihnup idan edum ni helag Israel, et eleg kudda kastiguen gapuh ni bunget ku.”
54 Et ipahding idan helag Israel huyyan emin ni inhel Moses ni intugun Apu Dios.