65
Ya a-appeh David ni meidwat etan ni kamengipappangngulun a-appeh
1 Apu Dios, lebbengtun daydayawen dakan hi-gamid kad-an mud Zion, niya ippahding mi hu impakulug min hi-gam ni pehding mi
2 tep muka dedngela dasal mi. Ey emin alid kebebbebley ey dakel idalli tuun mampandasal ni hi-gam ni pambeggaan dan baddang mu.
3 Nekalliwtan kami, nem dakemi kapessinsahid hipan impahding mi.
4 Et humman hu, man-am-amleng kamin pinilim ni tutu-um ni mekiha-ad ni hi-gam di kad-an mu, tep endilli mi pangkullangan di hipan panyaggudan mid Tempol mu.
5 Apu Dios, e kamenellaknib ni hi-gami, muka dedngela dasal mi, tep dakemi kabaddangi et kami kamengapput di hipan mika pekihhanggai. Ey dakel hu kamengippetngan impahpahding mun mika keihwangid lawah. Et yan nunya ey hi-gam hu kapandinnelin dakel ni katuutuud kebebbebley, anin idan wadad nangkeidawwin bebley di ba-hil ni baybay.
6 Winedam hu kedunduntug ni keippeang-angan ni et-eteng ni kabaelan mu.
7 Muka peinneng hu dalluyun niya bungug ni danum di baybay. *65:7 Matthew 8:26-27 Mark 4:38-39 Luke 8:23-25 Ey muka pesikked hu kamangguguluh ni tutu-ud kebebbebley.
8 Et humman hu emin hu tuu, anin di attu, et ida kametngan muka pehding et daka itekkutekkuk hu an-anla dan hi-gam.
9 Muka ippaptek hu puyek et muka peelli hu udan ma-lat madenuman et kayyaggud ni pantenneman niya ma-lat maweda hu danum idad wangwang mu. Ey muka weddaa hu dakel ni kaillameh ni kaittanem idan tuu meippuun di pinhed mun meippahding.
10 Tep muka uppela puyek ni pantenneman mi ma-lat tumegu ittanem mi.
11 Et dakel ni peteg hu muka iddawat ni ennien mi, tep anin di attu et muka peang-ang hu kakinayyaggud mu.
12-13 Em, tep emin di kedunduntug ey nenapnapan ida pattullan ni kalneroh. Ey nangketaneman ni pagey hu nedeklan. Emin ida humman ni winedam ey heni daka pan-itkuk hu a-appeh da tep ya amleng da.