130
Ya a-appeh ni pantetyedan di Jerusalem
1 Apu Dios, dengel mu anhan hu dasal ku tep iyyadyan nemahhig ni kamemunnumunnu hu nemnem ku.
2 Em Apu, dengel mu anhan huyyan nakka pampehemmehemmekin hi-gam et baddangan muwak.
3 Apu Dios, inamtak e gullat ni muka ituttuddek ni emin hu liwat ni tuu et endin hi-gami hu eleg mekastigu.
4 Nem muka liwwana liwat mi, et humman hu, daka peka-u-unnuda.
5 Apu Dios, nakka hehhegeda hu pemaddangan mun hi-gak, tep nakka medinnel e peamnum hu inhel mu.
6 Nemahhig hu heged kun pemaddangan mun hi-gak nem ya kapenehhegedin guwalyan kewa-waan tu.
7 Et humman hu, hi-gatsuddan helag Israel ey hi Apu Dios hu pandineli tayu, tep kamannananeng hu impeminhed tu niya nandadaddan ni menellaknib ni hi-gatsu.
8 Ya kakulugan tu ey hi-gatulli hu menellaknib ni hi-gatsun helag Israel di liwat tayu. *130:8 Matthew 1:21