Sekariah
Ya meippanggep nunyan libluh nan Sekariah
Hi Sekariah, henin nan Haggai ey impeamta tuddan tutu-ud Jerusalem e mahapul ni iyayyaggud da hu Tempol. Tep ya Tempol di Jerusalem ey beken ni ebuh ni penaydayawan idan tutu-u nan hi Apu Dios, tep yadman hu tuka panha-adi ma-lat mekiha-ad idan tutu-u tu. Inhel Apu Dios idan iJudah niyadda iJerusalem e hedin mengu-unnud ida mewan ni hi-gatu, ey mambangngad daman hi-gada. (1:3)
Ey inhel tu e umyaggud niya umlinggep hu Jerusalem. (1:17 et ya 8:8) Meippahding huyyan kegibbuhan ni pengastiguan tuddan buhul ni Israel (9:1-8) et han ali law man-ap-apu eyad puyek hu pinutuk nan Apu Dios ni Patul. (9:9-10)
Ya neitudek eyad libluh:
1. Ya nanghelan Apu Dios idan iJerusalem e mantuttuyyudda. (chapter 1:1-6)
2. Ya nengidwatan Apu Dios ni walun i-innep nan Sekariah meippanggep idan Jew ni ya kapengibbillang nan Apu Dios ni hi-gada. (chapters 1:7–6:8)
3. Hi Joshua e eta-gey ni padi ey pingngetan dan penget ni patul ma-lat meipeamta e edum alin aggew ey um-ali etan Mengippaptek ni tuu e Patul niya Padi ni pinutuk Apu Dios. (chapters 6:9-15)
4. Ya endi silbitun kapantetpeliddan Jew. Ya nanghelan Apu Dios e bendisyonan tuddalli tutu-u tun edum ni aggew. (chapters 7–8)
5. Ya ellian alin Christo e Mengippaptek ni tutu-u. Iwwalleng alin tutu-u, nem yallin udidih tu ey hi-gatu mengapput niya hi-gatu mampatul. (chapters 9–14)
1
Pambangngad itsun mengu-unnud nan Apu Dios
1 Yan eman ni meikkewwalun bulan ni meikkadwan toon ni nampatulan Darius di Persia ey impeamtan Apu Dios huyyan hi-gak e prophet e hi Sekariah e u-ungngan Berekiah e u-ungngan Iddo. 2-3 Kantuy “Ehel muddan tutu-u e heninnuy hu pinhed kun peamtan hi-gada: Hi-gak, e Ap-Apu e Kabaelan tun emin, ey nemahhig bunget kuddan aammed yu. Nem yan nunya ey kangkun hi-gayuy: Pambangngad kayun mengu-unnud ni hi-gak et bangngaden dakeyu daman tutu-uk. 4 Entan tu iu-unnud ida lan aammed yu e manghay ida. Inhelan eman ida lan prophet e issiked dan manliwwat et mambangngad idan mengu-unnud ni hi-gak, nem eleg da hanguden ni dedngelen hu inhel da et mekastigu ida.
5 Nebayag law neteyyan idan nunman ni aammed yu niyadda prophet yu. 6 Nem emin hu inhel idan bega-en kun prophet ey neipahding idan aammed yu. Et han ide law mantuttuyyu et kanday ‘Neipahding ni hi-gami hu lebbeng tun kastigu min nalpun Apu Dios e Kabaelan tun emin, tep humman dedan inhel tu lan numan ni pehding tu.’ ”
7 Yan eman ni meikkadwampulut epat ni aggew ni meikkeppulu et hakey ni bulan e Sebat ni meikkadwan toon ni nampatulan Darius di Persia ey wada impeamtan Apu Dios ni hi-gak e hi Sekariah e prophet, e u-ungngan Berekiah e u-ungngan Iddo.
8 Yan nunman ni hileng ey inang-ang kud i-innep ku hu hakey ni lakin nantakkay di madlang ni kebayyun immehneng di kad-an idan keyew ni myrtle di nedeklan. Wadadda neitu-nud ni edum ni kebayyun madlang, ya brown niya mablah e wadadda dama nampantakkay. 9 Entanni et ibgak etan ni anghel ni nakka pekihuhhummangan e kangkuy “Apu, kele wadadda huyyan kebayyu?” Ey kantuy “E-helen kun hi-gam hedin hipa keippahdingan da.” 10 Ey immehel etan lakin kaman-eh-ehneng di kad-an idan keyew ni myrtle ey kantuy “Humman ida intu-dak Apu Dios ni an menang-ang hedin hipa kameippenahding eyad ta-pew ni puyek.”
11 Entanniy limmaw ida etan edum ni nantakkay di kebayyu et kanda etan ni anghel nan Apu Dios ey “Limmaw kamid kebebbebley eyad puyek ey inang-ang mi e melinggep ida tutu-u tep endi law gubat.” *1:11 Hi Darius e patul niyadda sindalu tu ey inapput dadda aap-apud kebebbebley ni nangngehay ni hi-gatu.
12 Ey kan nunman ni anghel ey “Apu Dios e Kabaelan tun emin, nemahhig bunget muddan iJerusalem niya iJudah ni nepitun toon. Pigantu pengippeang-angam ni hemek mun hi-gada?” 13 Et a-alluken Apu Dios etan anghel ni nekihummangan ni hi-gak.
14 Entanniy kan nunman ni anghel ni hi-gak ey “Mu ehel ni katuutuu eya inhel Apu Dios e Kabaelan tun emin. Kantuy ‘Nemahhig hu neminhed ku niya kaguh kuddan tutu-uk di Jerusalem e bebley ku. 15 Nem nemahhig hu bunget kuddan edum ni bebley ni kamekallinggep niya kayyaggud biyag da, tep ma-nut bimmungettak idan tutu-uk et pekastiguk ida, nem nehalman kumamman impahding dan nengastigun hi-gada, ey beken ni hanniman hu pinhed kun meippahding.
16 Et mukun nambangngaddak di Jerusalem ma-lat peang-ang ku hemek kuddan bimmebley. Mebehwat ali mewan Tempol ku niya meiyayyaggud ali hu Jerusalem.’ ”
17 Immehel mewan ni hi-gak etan anghel ey kantuy “Peamtam e heninnuy pay hu inhel Apu Dios e Kabaelan tun emin. Kantuy ‘Mambalin ali mewan ni kedangyan ni peteg ida bebley kud Israel, tep baddangak ida. Niya ibbilang kulli mewan hu Jerusalem ni bebley ku.’ ”
18 Entanni mewan ey inang-ang ku hu epat ni ha-duk. 19 Kangku etan ni anghel ni kamekihuhhummangan ni hi-gak ey “Kele wadadda huyya?”
Ey kantun hi-gak ey “Huyyaddan ha-duk hu mengi-ehneng idan epat ni et-eteng kabaelan dan bebley eyad puyek ni nengiwehit idan iJudah, yadda iIsrael niyadda iJerusalem.”
20 Entanni mewan ey impeang-ang Apu Dios hu epat ni ma-dih e singnged da masuh. 21 Imbagak mewan hedin hipa keibbellinan tudda humman ey kan etan ni anghel ey “Immalidda ma-lat ipahding da hu anggetakkut idan nunman ni epat ni bebley ni nampengiwehit niya nemalpaligat idan iJudah.”
*1:11 1:11 Hi Darius e patul niyadda sindalu tu ey inapput dadda aap-apud kebebbebley ni nangngehay ni hi-gatu.