7
Ya meandeng ni pehding ey ya hemek, beken ni ya mantetpel
1 Yan eman ni meikka-pat ni aggew ni meikkahyam ni bulan e Kislev ni meikka-pat ni toon ni nan-ap-apuan Darius ey immehel hi Apu Dios ni hi-gak. 2 Yan nunman ey intu-dak idan iBethel di Sareser nan hi Regemmelek niyadda tutu-u da ma-lat mampebaddang idan Apu Dios. 3 Niya ma-lat da puhdanan idan padi niyadda prophet di Tempol Apu Dios e Kabaelan tun emin e kanday “Kaw nanengtun umlelemyung kami niya mantetpel kami hedin nedatngan hu meikkelliman bulan et penginemnemneman min nebahbahan ni Tempol e henin impenahding min katootoon?”
4 Entanniy kan Apu Dios e Kabaelan tun emin ni hi-gak ey 5 “Ehel muddan tutu-u eyad bebley niyadda papaddi e ma-nu tep nantepel ida niya limmelemyung idan meikkellima niya meikkepitun bulan ni katootoon eyan nelabah ni nepitu toon ni kaweda dad edum ni bebley, nem beken ni ma-lat penaydayawan dan hi-gak hu nengipahdingan daddan nunman. 6 Niya anin ni yan yuka panhahamulin piyestah yu et eleg yuwak nemnema, tep ebuh pan-an-anlaan ni annel yun yuka ikakkaguh. 7 Kaw eggak dedan ehelen ida huyya eman idan prophet yun nunman eman ni kedangyan niya hantapug tutu-ud Jerusalem niyad Judah, anin di Negeb niyaddad bebley di hengeg idan duntug di Judah?”
8-9 Entanni ey immehel mewan ni hi-gak hi Apu Dios e Kabaelan tun emin e kantuy “Mahapul ni meandeng hu pehding yun mengippennuh ni nanhahallaan yu, niya peang-ang yu binabbal yu niya hemek yun edum yu.
10 Entan tudda panligligat hu nebalun bii, yadda nepu-hig, yadda tutu-un nalpud edum ni bebley ni nekibebley ni hi-gayu niyadda newetwet. Niya entan pannemnem ni pemahbah yun edum yun tuu.
11 Nem hedin yadda aammed yun nunman ey nginhay dadda huyyan intugun kun hi-gada. 12 Nemahhig ni impekelhi da puhu da et heni batu et eleg dan hekey hengnguda niya eleg da dedngela hu tugun kun intuttudduddan prophet kun nunman. Et humman hu, nemahhig bunget kun hi-gada. 13 Et gapu tep eleg da hanguden ida intugun ku, ey eleggak dama dengelen hu dasal da. 14 Heni-ak dama law pewek e intayab kudda et maiwehit idad nangkeidawwin bebley ni endi nengam-amtan hi-gada. Nebel-ah law bebley da et endi law kamandellan diman. Nambalin hu kayyaggud la nin peteg ni bebley dan desert. Hi-gak e Ap-Apu e Kabaelan tun emin hu nanghel idan nunya.”