Ɨnyarʉbha ye embere ya Paaurʉ kwa
Abhatɨsarʉʉnikɨ
Ʉbhʉkangati
Ɨnyarʉbha yɨnʉ yandikirwɨ nu umutumwa Paaurʉ hamwɨmwɨ na Sirwanʉ na Timoseo. Paaurʉ aarɨ ahikiirɨ mʉrʉbhɨri ʉrʉkʉrʉ rwi icharʉ cha Makɨdʉniya, ribhaga ryo orogendo rwazɨ rwa kabhɨrɨ rwu ukurwaza Ɨngʼana Ɨnzʉmu igʉrʉ wa Yɨɨsu (Amahocha ga Abhatumwa 17:1‑10). Mʉrʉbhɨri muyo abhaatʉ bha teemwa zʉʉsi bhakiisirirya ɨngʼana yaazɨ. Hanʉ Paaurʉ iimiiriiryɨ risengerero Tɨsarʉʉnikɨ hayo, ɨnyaakʉ haari ɨkatanga kʉbhabhona abhiisirirya. Ɨnyaakʉ yiyo yaarɨ ɨrakorwa na Abhayaahudi. Paaurʉ akatɨnɨra kʉbhʉʉka rogendo rʉmwɨ.
Hanʉ aaruurɨ iyo, akamara ibhaga isuuhu, akatʉma Timoseo, ajɨ Tɨsarʉʉnikɨ kʉbhaha umwʉyʉ abhiisirirya bhi iyo. Paaurʉ umwene atagiirɨyʉ, akangʼeha kurwaza zɨmbaara ɨzɨndɨ. Timoseo akagarʉka kwa Paaurʉ, akamuhirɨra amangʼana igʉrʉ wu ubhwisirirya nu ubhwikari bhwa abhiisirirya bha Tɨsarʉʉnikɨ. Hanʉ Paaurʉ iigwirɨ amangʼana gayo, akazomerwa bhʉkʉngʼu, akabhaandɨkɨra ɨnyarʉbha yʉ ʉkʉbhakumya ku ubhwisirirya nʉ ʉbhʉsɨɨgi bhwabhʉ. Akabhabhʉʉrɨra ɨkɨ kɨrabhoneka kʉBhakiriisitʉ hanʉ bhakukwa na ribhaga rɨnʉ Yɨɨsu akʉgarʉka kʉʉsɨ. Akabhaha umwʉyʉ korereke bhangʼehe kwikara ubhwikari bhʉnʉ bhokozomera Mungu.
1
Amakeerenʼya
1 Ɨnyarʉbha yɨnʉ nandikirɨ inyɨ Paaurʉ, hamwɨmwɨ na Sirwanʉ*Sirwanʉ arabhirikirwa Siira mʉkɨtabhʉ cha Amahocha ga Abhatumwa. na Timoseo. Tʉrabhaandɨkɨra imwɨ abhiisirirya bhʉ ʉrʉbhɨri rwa Tɨsarʉʉnikɨ, mwiribhita rya abhaatʉ bhanʉ mwisiriiryɨ Bhaabha Mungu nʉ Ʉmʉkʉrʉ Yɨɨsu Kiriisitʉ.
Ɨbhɨgʉngi no omorembe bhɨbhɨ na niimwɨ.
Ubhwisirirya bhwa Abhatɨsarʉʉnikɨ
2 Tʉramukumya Mungu ribhaga ryʉsi igʉrʉ waanyu bhʉʉsi, na tʉrabhasabhɨra tʉtakuniha. 3 Hanʉ tʉkʉbhasabhɨra kwa Bhaabha wɨɨtʉ Mungu, tʉragihiita mʉbhʉtangɨ bhwazɨ emeremo gɨnʉ mokokora kubhwisirirya. Tʉraguhiita umucha gwanyu gʉnʉ gukurwɨra kʉbhʉsɨɨgi bhwanyu, na chɨmbu mwimiiriirɨ kurwa ku ubhwisɨgi bhwanyu kʉMʉkʉrʉ wɨɨtʉ Yɨɨsu Kiriisitʉ.
4 Abhahiiri bhɨɨtʉ imwɨ, bhanʉ Mungu asɨɨgirɨ, twɨzɨ Mungu abharʉbhwɨrɨ kʉbha abhaatʉ bhaazɨ. 5 Tʉmɨnyirɨbhu kʉ kʉbha hanʉ twarwazirɨ kwa niimwɨ Ɨngʼana Ɨnzʉmu, tʉtaarwazirɨ kwa amangʼana ageenebhu. Nawe tʉkarwaza kwa amanaga na kwe Ekoro Ɨndɨndu,†Ekoro Ɨndɨndu. Kʉmaragɨrɨra bhʉkʉngʼu, rora Ikiniibhasa. na tono obhoheene kʉbha ɨngʼana yiyo nɨ‑ya amaheene. Imwɨ mwɨzɨ bhwaheene chɨmbu twarɨ hamwɨmwɨ na niimwɨ, korereke tʉbhasakiryɨ. 6 Nangabha mʉkanyaakibhwa bhʉkʉngʼu kʉ kʉbha yu ubhwisirirya bhwanyu, mʉkasʉngʼaana ɨngʼana yiyo kobhozomerwa bhʉnʉ bhukurwa kwe Ekoro Ɨndɨndu. Chɨmbu mwakʉrirɨbhu, mʉkɨɨga ekerenjo chɨtʉ ne ekerenjo chʉ Ʉmʉkʉrʉ Yɨɨsu. 7 Kwɨbhu, mʉbhɨɨrɨ ekerenjo kɨzʉmu kubhiisirirya bhʉʉsi bhanʉ bharɨ mucharʉ cha Makɨdʉniya na cha Akaaya. 8 Abhaatʉ bhiigwirɨ kurwa kwa niimwɨ ɨngʼana yʉ Ʉmʉkʉrʉ. Ɨtarɨ kʉbhaatʉ bha Makɨdʉniya na bha Akaaya abheene, nawe ubhwisirirya bhwanyu kwa Mungu, bhʉmɨnyɨkɨɨnɨ hʉʉsi. Kʉgayo tʉtakwinyaacha kʉgamba chʉchʉsi igʉrʉ wu ubhwisirirya bhwanyu. 9 Hanʉ hʉʉsi tukuja, abhaatʉ bharagamba bhwaheene igʉrʉ we eteemwa yanyu, chɨmbu mwatʉsʉngʼaanirɨ hanʉ twizirɨ kwa niimwɨ. Bharamenyeekererya chɨmbu mwatigirɨ amasambwa gaanyu na kwichʉrɨra Mungu, korereke momohokerye ewe ʉmʉhʉru na wa amaheene, 10 na kʉrɨnda Umwana waazɨ‡Umwana waazɨ. Kʉmaragɨrɨra bhʉkʉngʼu, rora ringʼana Umwana wa Mungu muKiniibhasa. Yɨɨsu kurwa mwisaarʉ. Ewe newe Mungu akamuryʉra, na newe akʉtʉsabhʉra mʉtɨnɨrʉ ya Mungu yɨnʉ ikuuza.