Ɨnyarʉbha ye embere ya Paaurʉ kwa
Timoseo
Ʉbhʉkangati
Ɨnyarʉbha yɨnʉ yandikirwɨ na Paaurʉ. Akamwandɨkɨra ʉmʉʉtʉ wʉnʉ aarɨ arabhirikirwa Timoseo. Timoseo akasabhʉka kʉnzɨra ye emeremo ja Paaurʉ, necho kigiriryɨ Paaurʉ arabhɨrɨkɨra Timoseo, umwana waazɨ wa amaheene mubhwisirirya. Timoseo akagenda na Paaurʉ momeremo myaru ju ukurwaza Ɨngʼana Ɨnzʉmu igʉrʉ wa Yɨɨsu Kiriisitʉ (Amahocha ga Abhatumwa 17:14‑15, 18:5). Hanʉ Paaurʉ aarɨ akɨɨrɨ araandɨka ɨnyarʉbha yɨnʉ, akamoha Timoseo emeremo ju ukwimɨɨrɨrɨra abhiisirirya mʉrʉbhɨri rwa Efeeso.
Kɨnʉ chagiriryɨ Paaurʉ aandɨkɨ ɨnyarʉbha yɨnʉ, yaarɨ kʉbhʉʉrɨra Timoseo chɨmbu ikwenderwa korobhora na kwija abhaangariri na abhasakirya bha risengerero. Paaurʉ akeenda abhaangariri bhabhɨ bhagʉrʉrʉku bhu umwʉyʉ, bhiijɨ amaheene ne eteemwa ɨnzʉmu kwa abhiisirirya. Na abhaangariri bhabhɨ na amanaga gu ukwanga amiija gʉʉsi gʉ ʉrʉrɨmɨ. Ɨkɨtabhʉ cha 1 Timoseo kɨna amangʼana maaru ganʉ gakʉsakirya abhakangati bha amasengerero sikʉ zɨnʉ kwimɨɨrɨrɨra amasengerero gaabhʉ.
1
Amakeerenʼya
1 Ɨnyarʉbha yɨnʉ nandikirɨ inyɨ Paaurʉ. Inyɨ nitumirwɨ kʉbha umutumwa*Umutumwa. Kʉmaragɨrɨra bhʉkʉngʼu, rora ringʼana abhatumwa muKiniibhasa. wa Yɨɨsu Kiriisitʉ, kwiswaja rya Mungu Ʉmʉsabhuri wɨɨtʉ na Yɨɨsu Kiriisitʉ ubhwisɨgi bhwɨtʉ. 2 Nɨrakwandɨkɨra Timoseo, umwana waanɨ wa amaheene mubhwisirirya.
Ɨbhɨgʉngi no omorembe kurwa kwa Bhaabha Mungu na kwa Yɨɨsu Kiriisitʉ Ʉmʉkʉrʉ wɨɨtʉ, bhɨbhɨ na naawɨ.
Amaangirijʉ igʉrʉ wa amiija gʉ ʉrʉrɨmɨ
3 Hanʉ nabhuukirɨ kuja icharʉ cha Makɨdʉniya, nɨkakʉsabha wiikarɨ kʉrʉbhɨri rwa Efeeso. Nɨkakʉsabha, korereke ʉbhareche abhaatʉ bhanʉ bhakwija amiija gʉ ʉrʉrɨmɨ. 4 Ʉbhareche bhatigɨ kugwatɨrɨra amaganʉ ganʉ gataana bhwera, na kwinyaacha kwitonda amariina ga bhasʉʉkʉrʉ, ganʉ gataana tɨnɨrʉ. Amangʼana gayo gʉʉsi garareeta zɨhaka, gatakʉsakirya abhaatʉ kwisirirya Mungu, chɨmbu ubhwɨndi bhwazɨ bhwʉ ʉkʉsabhʉra abhaatʉ. 5 Ubhwɨndi bhwa amaswaja ganʉ nɨ‑kʉbha, abhiisirirya bhabhɨ nʉ ʉbhʉsɨɨgi bhu umwʉyʉ mwɨrʉ, ekoro nzɨrʉ nu ubhwisirirya bhwa amaheene. 6 Nawe abhiija abhandɨ bhagatigirɨ gayo, bhiichurirɨ, bhasikiirɨ kʉgamba amangʼana ganʉ gataana bhwera. 7 Bhareenda kʉbha abhiija bhi imigirʉ†Abhiija bhi imigirʉ. Kʉmaragɨrɨra bhʉkʉngʼu, rora Ikiniibhasa. ja Musa, nangabha ganʉ bhakʉgamba na kʉkandikija, bhatagɨɨzɨ.
8 Nawe itwɨ tʉmɨnyirɨ imigirʉ ja Musa nɨ‑mɨzʉmu, arɨɨbhɨ ʉmʉʉtʉ aragituna chɨmbu ikwenderwa. 9 Na toreenderwa komenya imigirʉ gɨtatɨɨrwɨ kobhe eheene, nawe kʉbhanʉ bhakʉkɨra imigirʉ na kʉbhaangi, bhanʉ bhatarɨ abhiisirirya na bhʉ ʉbhʉbhɨ, kʉbhanʉ bhatakwigwa Mungu na kʉbhabhɨ, kʉbhanʉ bhakwita bhawiisɨ na bhaunina, na kubhiiti bha abhaatʉ. 10 Na gɨtɨɨrwɨ kʉ bhɨ ɨtaarʉ na bhanʉ bhakokora abhasubhɨ abhakɨndichabhʉ ncha abhakari, kubhiitɨgi bha abhaatʉ nʉ ʉkʉbhagurya mubhutumwa, abhabhɨɨhi, na kubhiirahiri bhʉ ʉrʉrɨmɨ. Imigirʉ gɨtɨɨrwɨ kʉmangʼana gʉʉsi ganʉ gatakwigwana na amiija gʉ ʉbhʉhʉru. 11 Amiija gayo, gahaabhoneka mʉNgʼana Ɨnzʉmu, yɨnʉ ikwerecha ʉbhʉgʉngʉ bhwa Mungu wʉ ʉrʉbhangʉ rwʉsi. Amangʼana gayo nego nahɨɨrwɨ na Mungu nɨraarɨkɨ.
Ʉrʉbhangʉ rwa Yɨɨsu Kiriisitʉ kwa Paaurʉ
12 Nɨrakumya Yɨɨsu Kiriisitʉ, Ʉmʉkʉrʉ wɨɨtʉ wʉnʉ aangʼɨɨrɨ zinguru, kʉ kʉbha akamenya moronge na akandobhora kʉbha omohocha waazɨ. 13 Nangabha niizirɨ kʉmʉtʉka na kʉnyaacha abhaatʉ bhaazɨ, na naarɨ mʉsɨɨgʉ, nawe akandorera ɨbhɨgʉngi. Akakorabhu, kʉ kʉbha naarɨ nɨrakora gayo kobhogeege na nɨtaarɨ nu ubhwisirirya. 14 Nɨ ɨbhɨgʉngi bhyʉ Ʉmʉkʉrʉ Yɨɨsu Kiriisitʉ bhɨkakɨraho kwa niinyɨ. Na akangʼa ubhwisirirya nʉ ʉbhʉsɨɨgi ku ukugwatana neewe.
15 Ringʼana rɨnʉ ni‑rya amaheene, na ereenderwa kwisiriribhwa bhʉkʉngʼu, “Yɨɨsu Kiriisitʉ akaaza kʉʉsɨ kʉsabhʉra bhʉ ʉbhʉbhɨ.” Kʉ bhayo, niinyɨ nɨkʉrirɨ ʉbhʉbhɨ kʉkɨra bhʉʉsi. 16 Nʉʉrʉbhu, Yɨɨsu Kiriisitʉ akandorera ɨbhɨgʉngi! Akanyeerecha ubhwigumirirya bhwazɨ kwa niinyɨ kʉkɨra abhandɨ bhʉʉsi, korereke nɨbhɨ ekerenjo kʉbharya bhakumwisirirya na kʉsʉngʼaana ʉbhʉhʉru bhwa kemerano. 17 Mungu newe Ʉmʉtɨmi wʉnʉ ataana ɨtɨnɨrʉ, atakukwa, na atakororekana, newe umwene. Ewe anu ubhusuukwa nʉ ʉbhʉgʉngʉ kemerano. Garamɨ.
Paaurʉ araswaja Timoseo kugwatɨrɨra amaswaja
18 Timoseo mwana waanɨ, nɨrakoha riswaja riyo, kʉrɨngʼaana na amangʼana gʉ ʉbhʉrʉʉti ganʉ gaagambirwɨ igʉrʉ waazʉ. Amangʼana gayo gabhɨ ebheseme bhyazʉ kwitana riihɨ bhwaheene. 19 Ugwatɨrɨrɨ ubhwisirirya ne ekoro nzɨrʉ. Abhaatʉ abhandɨ bhasiihiryɨ kokora garya bhɨɨzɨ ne‑heene riyo rigiriryɨ kutiga ubhwisirirya bhwabhʉ. 20 Mʉbhaatʉ bhayo arimu Himɨnayo,‡2 Timoseo 2:17‑18. na Arɨkizanda. Bhayo nɨbhatigiirɨ Shɨtaani§Nɨbhatigiirɨ Shɨtaani, enzobhooro yaku nɨ‑Paaurʉ akaanga kongʼeha kugwatana na abhiisirirya mwisengerero. korereke bhiijibhwɨ, bhatigɨ kʉmʉtʉka Mungu.