6
1 Nangʉ, kʉ kʉbha tʉrahocha emeremo hamwɨmwɨ na Mungu, tʉrabhiisasaama mutiisirirya ɨbhɨgʉngi bhirya mwasʉngʼɨɨnɨ kurwa kwa Mungu bhɨbhʉrɨ bhʉʉha. 2 Mungu arabhuga mʉMaandɨkʉ Amarɨndu,
“Ribhaga rɨnʉ ryɨndirwɨ, nɨkakwigwa,
urusikʉ rwʉ ʉbhʉsabhurwa, nɨkakʉsakirya.”*Rora Isaaya 49:8.
Mmbe itegeerera, ribhaga rɨnʉ rikwɨndibhwa, nɨ‑rɨnʉ, urusikʉ rwʉ ʉbhʉsabhurwa, nɨ‑rʉnʉ!
Ukwigumirirya komeremo ja Mungu
3 Tʉtakokorera ʉmʉʉtʉ wʉwʉʉsi ringʼana ryʉryʉsi rɨnʉ rikumwigatanʼya, korereke obhohocha bhwɨtʉ bhʉtagambwa kɨbhɨ. 4 Nawe toreerecha kʉmangʼana gʉʉsi kʉbha, nɨ‑bhahocha bha Mungu tʉrɨ. Tʉrakorabhu kukwigumirirya bhʉkʉngʼu mʉnyaakʉ na tabhaaribhaari nzaru. 5 Tʉtɨmirwɨ, tʉbhʉhirwɨ mokebhoho, na tʉrɨgirwɨ na amaribhita ga abhaatʉ. Tʉkʉrirɨ emeremo ɨmɨkʉngʼu, tʉtɨngɨɨzirɨ na tʉhʉʉyirɨ nɨ ɨnzara. 6 Naatu turiiyeerekanʼya kʉbha abhahocha bha Mungu kʉbhʉgʉrʉrʉku, kʉbhʉmɨnyi, kubhwigumirirya kʉbhʉzʉmu, kʉnzɨra yʉ ʉkʉkangatwa ne Ekoro Ɨndɨndu, kʉbhʉsɨɨgi bhwa amaheene 7 na ku kurwaza amangʼana ga amaheene. Tʉrakora gayo gʉʉsi kʉmanaga ga Mungu. Eheene neyo ebheseme bhyɨtʉ, ʉrʉbhaara rwu ubhuryʉ na rwʉ ʉbhʉmʉsi.†Ʉrʉbhaara rwu ubhuryʉ na rwʉ ʉbhʉmʉsi, enzobhooro ya amangʼana gayo ɨratʉra kʉbha, okobhoko kubhuryʉ nekwe kukugwata ekeseme, no okobhoko kwʉ ʉkʉmʉsi nekwe kukugwata ingubha yu ukwiriibha. 8 Itwɨ tʉrahokerya Mungu, ɨbhɨ kwa koregwa, kuririirirwa hamwɨ kugungibhwa. Tʉrarorekana kʉbha abhabhɨɨhi tʉrɨ, nawe tʉragamba amaheene. 9 Tʉrarorekana ncha bhanʉ bhatamɨnyɨkɨɨnɨ, nawe tʉmɨnyɨkɨɨnɨ bhwaheene. Tʉrarorekana nkina tʉrakwa, nawe bhahʉru tʉrɨ. Tʉtɨmirwɨ bhʉkʉngʼu, nawe tʉkɨɨrɨ kwitwa. 10 Na tʉrarorekana kʉbha turumikirɨ, nawe ribhaga ryʉsi tono obhozomerwa. Tʉrarorekana kʉbha bhahabhɨ tʉrɨ, nawe tʉbhaniibhiryɨ bhaaru. Tʉrarorekana kʉbha tʉtaana chʉchʉsi, nawe tone ebhegero bhyʉsi.
11 Abhakʉrintʉ imwɨ, tʉragamba na niimwɨ habhwɨrʉ, kʉ kʉbha tʉbhasɨɨgirɨ kumyʉyʉ jɨtʉ jʉsi. 12 Itwɨ tʉkɨɨrɨ kutiga kʉbhasɨɨga imwɨ, nawe imwɨ mutigirɨ kʉtʉsɨɨga itwɨ. 13 Nangʉ nɨragamba na niimwɨ nkina nɨkʉgamba na abhaana kʉbha, mʉbhɨ mʉtʉsɨɨgirɨ kumyʉyʉ janyu jʉsi, chɨmbu itwɨ tʉbhasɨɨgirɨ imwɨ.
Ubhugwatani na abhaatʉ bhanʉ bhatarɨ abhiisirirya
14 Mʉtagwatana na abhaatʉ bhanʉ bhatarɨ abhiisirirya. Nangʉ, eheene nʉ ʉbhʉbhɨ bhɨratʉra kwigwana? Ubhwɨrʉ ni ikiirimya bhɨratʉrabhwɨ kʉbha hamwɨmwɨ? 15 Kiriisitʉ na Shɨtaani‡Shɨtaani, kuKigiriki nɨ‑Bhɨriyaari. Ni‑riina ɨrɨndɨ rya Shɨtaani. bharatʉrabhwɨ kwigwana? Umwisirirya na wʉnʉ atarɨ umwisirirya bhaana bhʉhaguhɨkɨ? 16 Kʉna bhwigwanikɨ gatɨ ya rihekaaru rya Mungu na amasambwa? Itwɨ ni‑rihekaaru rya Mungu wʉ ʉbhʉhʉru!§Rora 1 Abhakʉrintʉ 3:16; Abheefeeso 2:20‑21. Chɨmbu Mungu aagambirɨ,
“Niriikara hamwɨmwɨ nabhʉ na kogenda gatɨ waabhʉ.
Nɨrabha Mungu waabhʉ, bhʉʉsi bharabha abhaatʉ bhaanɨ.”*Rora Abharaawi 26:12; Yɨrɨmiya 32:38; Ɨzɨkɨɨri 37:27.
17 Nangʉ Ʉmʉkʉrʉ akabhuga,
“Murwɨ gatɨ waabhʉ, mwahʉkanɨ nabhʉ.
Mʉtakunʼyaku kegero kɨnʉ kɨbhɨngirɨ,
neho na niinyɨ nɨkʉbhasʉngʼaana.”†Rora Isaaya 52:11.
18 Naatu akabhuga,
“Nɨrabha Wuusʉ,
na niimwɨ mʉrabha abhaana bhaanɨ bhi ikisubhɨ na bhɨ ɨkɨkari.
Ʉmʉkʉrʉ Mungu wʉ Ʉbhʉnaja Bhwʉsi abhugirɨ!”‡Rora 2 Samwɨri 7:14; 1 Amangʼana ga Amabhaga 17:13.
*6:2 Rora Isaaya 49:8.
†6:7 Ʉrʉbhaara rwu ubhuryʉ na rwʉ ʉbhʉmʉsi, enzobhooro ya amangʼana gayo ɨratʉra kʉbha, okobhoko kubhuryʉ nekwe kukugwata ekeseme, no okobhoko kwʉ ʉkʉmʉsi nekwe kukugwata ingubha yu ukwiriibha.
‡6:15 Shɨtaani, kuKigiriki nɨ‑Bhɨriyaari. Ni‑riina ɨrɨndɨ rya Shɨtaani.
§6:16 Rora 1 Abhakʉrintʉ 3:16; Abheefeeso 2:20‑21.
*6:16 Rora Abharaawi 26:12; Yɨrɨmiya 32:38; Ɨzɨkɨɨri 37:27.
†6:17 Rora Isaaya 52:11.
‡6:18 Rora 2 Samwɨri 7:14; 1 Amangʼana ga Amabhaga 17:13.