Ɨnyarʉbha ya kabhɨrɨ ya
Yoohana
Ʉbhʉkangati
Yoohana akaandɨka ɨnyarʉbha yɨnʉ kʉmʉkari wʉnʉ arʉbhwɨrwɨ na abhaana bhaazɨ. Kʉhɨtɨra amangʼana gayo enzobhooro yaku yaarɨ risengerero. Akʉmara akabhuga, ɨnyarʉbha yiyo yaarɨ igʉrʉ wa abhiisirirya bhʉʉsi. Mʉnyarʉbha ya kabhɨrɨ, Yoohana arangʼeha koha umwʉyʉ abhiisirirya korereke bhiikarɨ ku kutuna amaheene nʉ ʉbhʉsɨɨgi. Kwikɨ arangʼeha kʉbharecha igʉrʉ wa abhiija bhʉ ʉrʉrɨmɨ. Arabhakandikija abhiisirirya bhabhɨ abhaangariri na bhiikarɨ mubhwisirirya bhwa amaheene.
1
Amakeerenʼya
1 Inyɨ umwimiiririri wa risengerero, nɨrakwandɨkɨra awɨ umusubhaati wʉnʉ ʉrʉbhwɨrwɨ na Mungu, hamwɨmwɨ na abhaana bhaazʉ*Umusubhaati wʉnʉ ʉrʉbhwɨrwɨ na Mungu, hamwɨmwɨ na abhaana bhaazʉ, enzobhooro yaku ni‑risengerero irebhe hamwɨmwɨ na abhiisirirya bhaazɨ. bhanʉ nɨsɨɨgirɨ kʉmaheene. Ɨtarɨ inyimwene, nawe na abhandɨ bhʉʉsi bhanʉ bhɨɨzɨ amaheene. 2 Nɨbhasɨɨgirɨ kʉ kʉbha itwɨ na niimwɨ tʉmɨnyirɨ amaheene, na tʉrakaja komenya kwa kemerano.
3 Ɨbhɨgʉngi, rigʉngi no omorembe kurwa kwa Bhaabha Mungu, na kʉMʉkʉrʉ Yɨɨsu Kiriisitʉ, bhɨbhɨ na niitwɨ, bhanʉ tukutuna amaheene nʉ ʉbhʉsɨɨgi.
Ʉkʉsɨɨgana nekwe ukwisirirya amaswaja ga Mungu
4 Nɨkazomerwa bhʉkʉngʼu korora abhaana bhaazʉ obhorebhe bharatuna ɨnzɨra ya amaheene, chɨmbu Bhaabha Mungu aatuswajiryɨ. 5 Nangʉ, umusubhaati ʉmʉsɨɨgwa, nɨrakʉsabha ugwatɨ amaswaja ganʉ gakubhuga tʉsɨɨganɨ. Amaswaja gayo gatarɨ mahya, nawe nɨ‑garyagarya twarɨ nagʉ kwɨma hanʉ mwatangirɨ kwisirirya.†Rora Yoohana 13:34. 6 Ʉkʉsɨɨgana nekwe ukugwata amaswaja ga Mungu. Rɨnʉ neryo riswaja rɨnʉ mwigwirɨ kwɨma ʉbhʉtangɨ kʉbha mwikarɨ kwʉ ʉbhʉsɨɨgi.
Amaangirijʉ igʉrʉ wa abhakangirirya
7 Nɨragambabhu kʉ kʉbha abhakangirirya bhaaru bhabhʉnɨkirɨ kʉʉsɨ. Bhatakwisirirya Yɨɨsu Kiriisitʉ akiibhurwa ʉmʉʉtʉ.‡Rora 1 Yoohana 4:2‑3. Ʉmʉʉtʉ wʉwʉʉsi wʉnʉ akubhugabhu, nɨ‑mʉkangirirya, na ni‑mubhisa wa Kiriisitʉ.§Umubhisa wa Kiriisitʉ, enzobhooro yaku nɨ‑wʉnʉ akwanga Kiriisitʉ. 8 Mmbe, mwiyangarɨrɨ imubheene, korereke emeremo janyu gɨtaaza kʉbhʉra bhʉʉha, nawe mʉsʉngʼaanɨ kurwa kwa Mungu ririhi rinagu. 9 Wʉwʉʉsi wʉnʉ akuja hagarɨ na amiija ga Kiriisitʉ, wuyo ataana ubhumwɨmwɨ na Mungu. Nawe, wʉnʉ akongʼeha kugwata amiija ga Kiriisitʉ, wuyo anu ubhumwɨmwɨ na Bhaabha Mungu nu Umwana waazɨ wʉʉsi. 10 Arɨɨbhɨ wʉwʉʉsi araaza kwa niimwɨ wʉnʉ atakwija gayo, mʉtamuginihya mumijɨ janyu, na mʉtamokeerya nchu Umukiriisitʉ ʉmʉkɨndichanyu. 11 Ʉmʉʉtʉ wʉwʉʉsi wʉnʉ akomokeerya, arɨ hamwɨmwɨ nawe mʉmangʼana gaazɨ amabhɨ.
Amakeerenʼya gʉ ʉkʉraga
12 Nɨna amangʼana maaru gʉ ʉkʉgamba, nawe nɨtakwenda kwandɨka kʉnzɨra yɨ ɨnyarʉbha. Kʉgayo, niriisega kuuza kwa niimwɨ kʉbhataarɨra na kwibhisirya hamwɨmwɨ, korereke obhozomerwa bhwɨtʉ bhuhikɨ.
13 Abhaana bhu umusubhaati waazʉ wʉnʉ arʉbhwɨrwɨ na Mungu,*Abhaana bhu umusubhaati waazʉ wʉnʉ arʉbhwɨrwɨ na Mungu, enzobhooro yaku ni‑bhiisirirya bha risengerero irebhe. bharakokeerya.
*1:1 Umusubhaati wʉnʉ ʉrʉbhwɨrwɨ na Mungu, hamwɨmwɨ na abhaana bhaazʉ, enzobhooro yaku ni‑risengerero irebhe hamwɨmwɨ na abhiisirirya bhaazɨ.
†1:5 Rora Yoohana 13:34.
‡1:7 Rora 1 Yoohana 4:2‑3.
§1:7 Umubhisa wa Kiriisitʉ, enzobhooro yaku nɨ‑wʉnʉ akwanga Kiriisitʉ.
*1:13 Abhaana bhu umusubhaati waazʉ wʉnʉ arʉbhwɨrwɨ na Mungu, enzobhooro yaku ni‑bhiisirirya bha risengerero irebhe.