Ɨnyarʉbha ya kabhɨrɨ ya Paaurʉ kwa
Abhatɨsarʉʉnikɨ
Ʉbhʉkangati
Ibhaga isuuhu kwɨma Paaurʉ atʉmɨ ɨnyarʉbha yaazɨ ye embere, akabhona amangʼana kʉbha, abhiisirirya bha Tɨsarʉʉnikɨ bhatʉʉbhʉʉrirɨ bhwaheene amiija gaazɨ agandɨ. Abhandɨ bhakakina Yɨɨsu aarɨ amarirɨ kʉgarʉka. Na abhandɨ bhaarɨ bhatigirɨ emeremo jabhʉ jʉsi, kʉ kʉbha bhakiisega Yɨɨsu angagarukirɨ ribhaga ryʉryʉsi. Abhandɨ bhatɨɨndirɨ kohocha emeremo kʉ kʉbha yu ukuniha. Paaurʉ akaandɨka ɨnyarʉbha ya kabhɨrɨ, korereke achʉrɨ amiisɨɨgi ncha gayo, ganʉ gataarɨ na amaheene. Mʉnyarʉbha ya kabhɨrɨ yɨnʉ akandikijiryɨ kʉbha, Yɨɨsu aarɨ akɨɨrɨ kʉgarʉka kʉʉsɨ na akabhakandikija kongʼeha kohocha emeremo kumucha.
1
Amakeerenʼya
1 Ɨnyarʉbha yɨnʉ nandikirɨ inyɨ Paaurʉ, hamwɨmwɨ na Sirwanʉ*Sirwanʉ arabhirikirwa Siira mʉkɨtabhʉ cha Amahocha ga Abhatumwa. na Timoseo. Tʉrabhaandɨkɨra imwɨ abhiisirirya bhʉ ʉrʉbhɨri rwa Tɨsarʉʉnikɨ, mwiribhita rya abhaatʉ bhanʉ mwisiriiryɨ Bhaabha Mungu nʉ Ʉmʉkʉrʉ Yɨɨsu Kiriisitʉ.
2 Ɨbhɨgʉngi no omorembe kurwa kwa Bhaabha Mungu na kʉMʉkʉrʉ Yɨɨsu Kiriisitʉ, bhɨbhɨ na niimwɨ.
Abhiisirirya bharahaabhwa umwʉyʉ ribhaga ryi ɨnyaakʉ
3 Abhahiiri bhɨɨtʉ, toreenderwa kukumya Mungu ibhaga ryʉsi igʉrʉ waanyu, kʉ kʉbha ubhwisirirya bhwanyu bhʉrakʉra bhʉkʉngʼu, naatu ʉkʉsɨɨgana kwanyu kʉrangʼeha kwaruha. 4 Na niitwɨ turiiheema mʉmasengerero ga Mungu, kʉ kʉbha yu ubhwigumirirya nu ubhwisirirya bhʉnʉ mʉnabhwɨ, mʉnyaakʉ yʉʉsi yɨnʉ mʉnayo.
5 Gayo gʉʉsi gareerekenʼya, ɨtɨnɨrʉ ya Mungu ne‑ye eheene. Kʉtɨnɨrʉ yiyo imwɨ mʉrabharwa na mʉrɨɨndibhwa kʉbha mʉbhʉtɨmi bhwazɨ,†Ʉbhʉtɨmi bhwazɨ. Kʉmaragɨrɨra bhʉkʉngʼu, rora ringʼana ʉbhʉtɨmi bhwa Mungu muKiniibhasa. bhʉnʉ mʉkʉnyaakibhwa igʉrʉ wabhwɨ. 6 Mungu arakora ge eheene, arabhaha ɨnyaakʉ bhanʉ bhakʉbhanyaacha 7 na kʉbhaha umwoyeero bhanʉ mʉkʉnyaaka, hamwɨmwɨ na niitwɨ. Arakorabhu, hanʉ Ʉmʉkʉrʉ Yɨɨsu akuuza kurwa mwisaarʉ hamwɨmwɨ na bhamaraika‡Bhamaraika. Kʉmaragɨrɨra bhʉkʉngʼu, rora ringʼana maraika muKiniibhasa. bhaazɨ bha amanaga, 8 nɨ ɨmɨrɨngɨɨri jo omorero. Yɨɨsu newe akʉbhatɨnɨra bhʉʉsi bhanʉ bhakwanga Mungu, na bhanʉ bhatakwisirirya Ɨngʼana Ɨnzʉmu yʉ Ʉmʉkʉrʉ wɨɨtʉ Yɨɨsu. 9 Ɨnyaakʉ yaabhʉ ɨrabha ubhuriki bhwa kemerano na kutuurwa kore nʉ Ʉmʉkʉrʉ nʉ ʉbhʉkʉrʉ bhwʉ ʉbhʉnaja bhwazɨ. 10 Ɨnyaakʉ yiyo ɨrabha urusikʉ rʉnʉ Ʉmʉkʉrʉ akuuza kukumibhwa nʉ ʉkʉsʉngʼaana ubhusuuku kurwa kʉbharɨndu§Abharɨndu. Kʉmaragɨrɨra bhʉkʉngʼu, rora Ikiniibhasa. bhaazɨ bhanʉ bhamwisiriiryɨ. Na niimwɨ kwikɨ mʉrabha mʉbhayo, kʉ kʉbha mwisiriiryɨ amangʼana garya twabharɨɨtɨɨrɨ.
11 Kʉgayo tʉrabhasabhɨra ibhaga ryʉsi, korereke Mungu wɨɨtʉ agiryɨ mwikarɨ kʉrɨngʼaana nu ubhubhirikirwa bhwanyu. Naatu tʉramʉsabha, amarɨ amangʼana amazʉmu gʉʉsi ganʉ mukwenda kokora kʉbhʉnaja bhwazɨ, na amarɨ emeremo janyu jʉsi ju ubhwisirirya. 12 Tʉrasabha, korereke iriina ryʉ Ʉmʉkʉrʉ wɨɨtʉ Yɨɨsu rɨbhɨ rɨrakumibhwa igʉrʉ waanyu. Na niimwɨ mʉbhɨ mʉrakumibhwa igʉrʉ waazɨ, ɨbhɨgʉngi bhya Mungu wɨɨtʉ na bhyʉ Ʉmʉkʉrʉ Yɨɨsu Kiriisitʉ.