Amahocha ga Abhatumwa bha Yɨɨsu
Ʉbhʉkangati
Umwandiki wɨ ɨkɨtabhʉ cha Amahocha ga Abhatumwa aarɨ ni‑Ruuka. Ewe newe aandikirɨ ɨkɨtabhʉ cha amangʼana amazʉmu, kɨnʉ kikubhirikirwa Ruuka. Ruuka ataarɨ Ʉmʉyaahudi. Ahandɨ aarɨ arahirana nu umutumwa Paaurʉ korogendo rwazɨ rwu ukurwaza Ɨngʼana Ɨnzʉmu igʉrʉ wa Yɨɨsu Kiriisitʉ (Abhakorosaayi 4:10‑14).
Ruuka akaandɨka ɨkɨtabhʉ cha Ruuka hamwɨmwɨ nɨ Ɨkɨtabhʉ cha Amahocha ga Abhatumwa kʉmʉʉtʉ wʉnʉ akubhirikirwa Tɨʉfirʉ. Tɨʉfirʉ wuyo, abhaandiki abhaaru bhi Ibhibhuriya bhariiseega kʉbha, aarɨ wʉmwɨ wa abhakʉrʉ bha Ruumi. Nʉʉrʉ Ruuka akaandɨkɨra Tɨʉfirʉ, abhataakɨ bhaaru bharakina kʉbha Ruuka akeenda Abhakiriisitʉ bhʉʉsi, Abhayaahudi hamwɨmwɨ na bhi ibhyarʉ ɨbhɨndɨ, bhasome ɨbhɨtabhʉ bhɨnʉ.
Ɨkɨtabhʉ cha Amahocha ga Abhatumwa nɨ‑magenderero gɨ ɨkɨtabhʉ cha Ruuka. Kɨratangɨra hanʉ ɨkɨtabhʉ cha Ruuka chasiriirɨ. Mʉkɨtabhʉ cha Amahocha ga Abhatumwa, Ruuka aragambɨra amangʼana amakʉrʉ bhʉkʉngʼu, ganʉ aarʉʉzɨ mʉbhʉtangɨ bhwa risengerero rye embere. Ubhwɨndi bhwazɨ ʉbhʉkʉrʉ bhwarɨ ni‑kwerecha chɨmbu Mungu anyaragɨɨnʼyɨ Ɨngʼana Ɨnzʉmu ya Yɨɨsu, na chɨmbu aakuriryɨ na kʉhaka risengerero kʉnzɨra ye Ekoro Ɨndɨndu.
1
1 Umugungwa Tɨʉfirʉ, nɨkakwandɨkɨra mʉkɨtabhʉ chanɨ chʉ ʉbhʉtangɨ,*Ɨkɨtabhʉ chazɨ chʉ ʉbhʉtangɨ, nɨ‑kɨtabhʉ cha Amangʼana Amazʉmu ga Yɨɨsu Kiriisitʉ chɨmbu gaandikirwɨ na Ruuka. igʉrʉ wa amangʼana gʉʉsi ganʉ Yɨɨsu aatangirɨ kokora nu ukwija, kwɨma kʉbhʉtangɨ bhwe emeremo jazɨ, 2 kuhika urusikʉ rurya aagɨgirwɨ kuja mwisaarʉ. Hanʉ aarɨ akɨɨrɨ kogegwa, akabharagɨrɨra kʉnzɨra ye Ekoro Ɨndɨndu,†Ekoro Ɨndɨndu. Kʉmaragɨrɨra bhʉkʉngʼu, rora Ikiniibhasa. abhatumwa‡Abhatumwa. Kʉmaragɨrɨra bhʉkʉngʼu, rora Ikiniibhasa. bhaazɨ bhanʉ aarʉbhwɨrɨ, igʉrʉ we emeremo gɨnʉ bhakuuza kohocha. 3 Hanʉ aamarirɨ kukwa na kuryʉka kwazɨ, Yɨɨsu aarɨ arabhakandikija abhatumwa bhaazɨ, manga kaaru na kwa nzɨra nzaru kʉbha, maheene nɨ‑mʉhʉru. Kwibhaga rya sikʉ merongo ene, aarɨ ariiyeerecha na kwija ɨngʼana igʉrʉ wʉ ʉbhʉtɨmi bhwa Mungu.§Ʉbhʉtɨmi bhwa Mungu. Kʉmaragɨrɨra bhʉkʉngʼu, rora Ikiniibhasa.
4 Rusikʉ rʉmwɨ, hanʉ Yɨɨsu aahunɨɨnɨ na abhatumwa bhayo, akabhaswaja, “Mʉtarwa Yɨrusarɨɨmu hanʉ, nawe mʉrɨndɨ ʉbhʉragɨ, kuhika hanʉ mʉraasʉngʼaanɨ ʉbhʉragɨ bhwa Bhaabha, chɨmbu mwigwirɨ amangʼana gaazɨ kurwa kwa niinyɨ. 5 Yoohana Ʉmʉbhatiizi, akabhatiiza abhaatʉ kwa amanzi, nawe imwɨ sikʉ suuhu zɨnʉ zikuuza, mʉrabhatiizwa kwe Ekoro Ɨndɨndu.”
Yɨɨsu aragegwa na Mungu kuja mwisaarʉ
6 Hanʉ abhatumwa bhayo bhaahunɨɨnɨ na Yɨɨsu, bhakamubhuurya, “Ʉmʉkʉrʉ, ribhaga rɨnʉ neryo ʉkʉgarukirya Abhiiziraɨri ʉbhʉtɨmi?”
7 Akabhabhʉʉrɨra, “Gɨtarɨ meremo janyu komenya ribhaga nu urusikʉ rʉnʉ Bhaabha umwene aabhɨtɨɨrɨho kʉbhʉnaja bhwazɨ. 8 Nawe mʉrabhona zinguru, hanʉ Ekoro Ɨndɨndu ɨraazɨ kwa niimwɨ. Mʉrabha abhamɨnyɨɨkɨrɨri bhaanɨ Yɨrusarɨɨmu na mbaara zʉʉsi za mucharʉ cha Yudeya, Samaariya nu ukuhika mʉtɨnɨrʉ yɨ ɨɨsɨ yʉʉsi.”
9 Hanʉ Yɨɨsu aamarirɨ kʉgamba gayo kʉbhatumwa bhaazɨ, bhaarɨ bhakɨɨrɨ bhachirora akagegwa kuja mwisaarʉ, risaarʉ rɨkamukundikirya, bhatamʉrʉʉzɨ kwikɨ. 10 Hanʉ bhaarɨ bhacharangamiirɨ kwisaarʉ, abhaatʉ bhabhɨrɨ bhanʉ bhaarɨ bhiibhʉhirɨ zengebho zɨnzɨrʉ za pee, bhakiimɨɨrɨra haguhɨ nabhʉ. 11 Bhakabhuga, “Imwɨ abhaatʉ bha Gariraaya, kwakɨ mwimiiriirɨ hanʉ ɨnʉ mʉrangamiirɨ kwisaarʉ? Yɨɨsu wʉnʉ agɨgirwɨ kurwa kwa niimwɨ kuja mwisaarʉ, aragarʉka naatu, chɨmbu mwamʉrʉʉzɨ araja mwisaarʉ.”
Matiya ararobhorwa kogega umweya gwa Yuuda
12 Akʉmara abhatumwa bhakarwa kʉkɨgʉrʉ kɨnʉ kikubhirikirwa Ɨmɨzɨyituuni, bhakagarʉka kʉrʉbhɨri rwa Yɨrusarɨɨmu. Yaarɨ rogendo rwu ukwisa urusikʉ rwʉ ʉbhʉtʉʉrʉ rwa matambʉka kɨkwɨ kɨmwɨ. 13 Hanʉ bhaahikirɨ Yɨrusarɨɨmu, bhakatiira muchumba che egorofa, mʉnʉ bhaarɨ bhakwikara. Bhaareho Peetero, Yoohana, Yaakobho, Andureya, Firipʉ, Tomaaso, Bhatoromayo, Mataayo, Yaakobho umwana wa Arifaayʉ, Simʉʉni wʉnʉ aarɨ Ʉmʉzɨrʉʉti,*Ʉmʉzɨrʉʉti aarɨ na amariina abhɨrɨ, ɨrɨmwɨ ryi Ikigiriki, Simʉʉni Ʉmʉzɨrʉʉti ɨrɨndɨ ryɨ Ɨkɨyaahudi, Simʉʉni Ʉmʉkananayʉ. Gʉʉsi gane enzobhooro yɨmwɨ, ʉmʉʉtʉ wʉnʉ akwitanɨra ubhwiyagaaruri bhwɨ ɨɨsɨ yaazɨ. na Yuuda umwana wa Yaakobho. 14 Bhanʉ bhʉʉsi bhakiibhiringa hamwɨmwɨ na kʉsabha Mungu kwa mwʉyʉ gʉmwɨ. Hamwɨmwɨ na bhayo, bhaareho abhakari abhandɨ na Mariyamu unina Yɨɨsu na bhaumwabhʉ Yɨɨsu.
15 Ribhaga riyo, abhiisirirya bha Yɨɨsu bhakiibhiringa, endengo yaabhʉ yaarɨ igana rɨmwɨ na merongo ɨbhɨrɨ. Neho Peetero akiimɨɨrɨra gatɨ waabhʉ, 16 akabhabhʉʉrɨra, “Abhahiiri bhaanɨ, amangʼana ganʉ gaandikirwɨ mʉMaandɨkʉ Amarɨndu igʉrʉ wa Yuuda, yaarɨ ereenderwa gakorwe. Gayo gakagambwa ne Ekoro Ɨndɨndu kʉhɨtɨra mumunywa gwʉ ʉmʉtɨmi Daudi†Daudi. Kʉmaragɨrɨra bhʉkʉngʼu, rora Ikiniibhasa. igʉrʉ wa Yuuda, wʉnʉ aabhakangatirɨ bhanʉ bhaagwatirɨ Yɨɨsu. 17 Kwikɨ aarɨ umutumwa ʉmʉkɨndichɨtʉ, akahaabhwa emeremo gɨnʉ hamwɨmwɨ na niitwɨ.”
18 Kʉrɨngʼaana na amangʼana gaazɨ amabhɨ, Yuuda akabhona zimpirya akagʉra ʉmʉgʉndʉ. Mʉmʉgʉndʉ iyo, akagwa haasɨ kibhumɨɨrɨ, ɨnda yaazɨ ikabhaarʉka na bhya mʉnda bhyʉsi bhɨkazenzeera igʉtʉ. 19 Ringʼana ryu uruku rwazɨ rɨkakumuka kubhiikari bhʉʉsi bha Yɨrusarɨɨmu, kʉgayo bhakagʉbhɨrɨkɨra ʉmʉgʉndʉ guyo Akɨɨridaama, kʉkɨgambʉ chabhʉ‡Kʉkɨgambʉ chabhʉ nɨ‑Kɨɨbhuraaniya, ɨkɨgambʉ cha Abhayaahudi. nɨ‑Mʉgʉndʉ gwa Amasaahɨ.
20 Peetero akangʼeha kʉgamba, “Yandikirwɨ mʉkɨtabhʉ cha Zabhuri,
‘Yɨɨka waazɨ habhɨ ni ikiibhuurʉ,
atabhaho ʉmʉʉtʉ wʉnʉ akʉsaaga hayo.’§Rora Zabhuri 69:25.
Naatu, yandikirwɨ,
‘Ʉmʉʉtʉ ʉwʉndɨ ahaabhwɨ
emeremo jazɨ jʉ ʉkʉkangata.’*Rora Zabhuri 109:8.
21 “Mmbe, torobhore mʉbhanʉ bhaahirɨɨnɨ na niitwɨ ibhaga ryʉsi rɨnʉ Ʉmʉkʉrʉ Yɨɨsu aarɨ akusikɨra nʉ ʉkʉhʉrʉka kwa niitwɨ, 22 kwɨma ribhaga rɨnʉ Yɨɨsu aabhatiizirwɨ na Yoohana, kuhika urusikʉ rʉnʉ agɨgirwɨ kuja mwisaarʉ. Wʉnʉ araazɨ korobhorwa, ɨramwenda agwatanɨ na niitwɨ abhɨ mʉmɨnyɨɨkɨrɨri wu ukuryʉka kwazɨ.”
23 Bhakahitya amariina ga abhaatʉ bhabhɨrɨ. Ʉwʉmwɨ aarɨ Yuusufu wʉnʉ aabhirikiirwɨ Bharisaabha, iriina ryazɨ ɨrɨndɨ ryarɨ Yuusitʉ. Na wa kabhɨrɨ, akabhirikirwa Matiya. 24 Bhaaza kʉmara bhakasabha Mungu bhakabhuga, “Ʉmʉkʉrʉ, naawɨ ʉmɨnyirɨ mozekoro za abhaatʉ bhʉʉsi. Tʉrakʉsabha utwereche nɨ‑wahɨ gatɨ wa bhabhɨrɨ bhanʉ, wʉnʉ ʉrʉbhwɨrɨ, 25 agege umweya gwe emeremo ju ubhutumwa gɨnʉ Yuuda aatigirɨ, na kuja ʉrʉbhaara rwazɨ umwene.” 26 Bhakakora ubhwitʉʉri, ubhwitʉʉri bhʉkagwɨra Matiya, wʉʉsi akabharwa kʉbha hamwɨmwɨ na abhatumwa ikumi na wʉmwɨ bharya.
*1:1 Ɨkɨtabhʉ chazɨ chʉ ʉbhʉtangɨ, nɨ‑kɨtabhʉ cha Amangʼana Amazʉmu ga Yɨɨsu Kiriisitʉ chɨmbu gaandikirwɨ na Ruuka.
†1:2 Ekoro Ɨndɨndu. Kʉmaragɨrɨra bhʉkʉngʼu, rora Ikiniibhasa.
‡1:2 Abhatumwa. Kʉmaragɨrɨra bhʉkʉngʼu, rora Ikiniibhasa.
§1:3 Ʉbhʉtɨmi bhwa Mungu. Kʉmaragɨrɨra bhʉkʉngʼu, rora Ikiniibhasa.
*1:13 Ʉmʉzɨrʉʉti aarɨ na amariina abhɨrɨ, ɨrɨmwɨ ryi Ikigiriki, Simʉʉni Ʉmʉzɨrʉʉti ɨrɨndɨ ryɨ Ɨkɨyaahudi, Simʉʉni Ʉmʉkananayʉ. Gʉʉsi gane enzobhooro yɨmwɨ, ʉmʉʉtʉ wʉnʉ akwitanɨra ubhwiyagaaruri bhwɨ ɨɨsɨ yaazɨ.
†1:16 Daudi. Kʉmaragɨrɨra bhʉkʉngʼu, rora Ikiniibhasa.
‡1:19 Kʉkɨgambʉ chabhʉ nɨ‑Kɨɨbhuraaniya, ɨkɨgambʉ cha Abhayaahudi.
§1:20 Rora Zabhuri 69:25.
*1:20 Rora Zabhuri 109:8.