Ɨnyarʉbha ya Paaurʉ kwa
Abhakorosaayi
Ʉbhʉkangati
Ɨnyarʉbha yɨnʉ yandikirwɨ na Paaurʉ, umutumwa wa Yɨɨsu Kiriisitʉ, kwa Abhakiriisitʉ bhʉ ʉrʉbhɨri rwa Korosaayi. Korosaayi rwarɨ ʉrʉbhɨri rusuuhu mʉrʉbhɨri rwa Asiya. Sikʉ zɨnʉ Asiya ni‑Bhuturuki.
Paaurʉ akaandɨka ɨnyarʉbha yɨnʉ hanʉ aarɨ mokebhoho. Ewe ataarɨ agiirɨ Korosaayi, nawe akiigwa kʉbha abhiija bhʉ ʉrʉrɨmɨ bhaarɨ bharanyaacha abhaatʉ iyo. Abhakiriisitʉ bha Korosaayi bhaarɨ amaribhita abhɨrɨ, Abhakiriisitʉ bhɨ Ɨkɨyaahudi na bhi Ikigiriki.
Kwarɨ na Abhayaahudi abhandɨ bhanʉ bhiijiryɨ amiija gʉ ʉrʉrɨmɨ, bhaarɨ bhariija kʉbha nangabha ʉmʉʉtʉ aarɨ mʉhɨmba wa Yɨɨsu, ataaturirɨ kwisiriribhwa na Mungu arɨɨbhɨ ataasaarirwɨ na ataatunirɨ imigirʉ na amanarʉ gɨ Ɨkɨyaahudi. Kwarɨ na Abhagiriki bhanʉ bhiijiryɨ amiija gʉ ʉrʉrɨmɨ, bhaarɨ bhariija kʉbha, kʉ kʉbha ʉmʉʉtʉ arakora ʉbhʉbhɨ na Mungu ataana ʉbhʉbhɨ, ɨtaarɨ ɨratʉrɨkana Yɨɨsu abhɨ Mungu na iikarɨ kʉʉsɨ nchʉ ʉmʉʉtʉ.
Paaurʉ aragarukirya amiija gʉ ʉrʉrɨmɨ gayo kwa kʉgamba amaheene igʉrʉ wa Yɨɨsu. Yɨɨsu Kiriisitʉ ni‑Mungu, nɨ‑Mʉkʉrʉ wa bhyʉsi kʉʉsɨ na kwisaarʉ. Akiikara kʉʉsɨ, aarɨ ʉmʉʉtʉ, na akakwa igʉrʉ wʉ ʉbhʉbhɨ bhwɨtʉ korereke tobheererwe. Ʉmʉʉtʉ ariimwisiriryɨ, kʉtakʉbhaho ubhwɨndi bhwu ukutuna simʉka yʉyʉʉsi.
Paaurʉ arabhabhʉʉrɨra Abhakiriisitʉ, ereenderwa bhatigɨ zeteemwa zɨmbɨ zɨ ɨkarɨ, na bhiikarɨ ubhwikari ubhuhya bhʉnʉ bhokozomera Mungu.
1
Amakeerenʼya
1 Ɨnyarʉbha yɨnʉ nandikirɨ inyɨ Paaurʉ, umutumwa*Umutumwa. Kʉmaragɨrɨra bhʉkʉngʼu, rora ringʼana abhatumwa muKiniibhasa. wa Yɨɨsu Kiriisitʉ kʉbhʉsɨɨgi bhwa Mungu, nɨrɨ hamwɨmwɨ na Timoseo, umwisirirya ʉmʉkɨndichɨtʉ. 2 Tʉrabhaandɨkɨra imwɨ abharɨndu†Abharɨndu. Kʉmaragɨrɨra bhʉkʉngʼu, rora Ikiniibhasa. bha Mungu bhanʉ mukwikara mʉrʉbhɨri rwa Korosaayi, imwɨ abhahiiri bhɨɨtʉ abharonge ku ukugwatana na Kiriisitʉ.
Ɨbhɨgʉngi no omorembe kurwa kwa Bhaabha Mungu, bhɨbhɨ na niimwɨ.
Amasabhi nu ubhukumya kwa Mungu
3 Hanʉ tʉkʉbhasabhɨra, tʉrakumya Mungu ibhaga ryʉsi, Wiisɨ wʉ Ʉmʉkʉrʉ wɨɨtʉ Yɨɨsu Kiriisitʉ. 4 Tʉrakorabhu, kʉ kʉbha twigwirɨ igʉrʉ wu ubhwisirirya bhwanyu kwa Yɨɨsu Kiriisitʉ ni igʉrʉ wʉ ʉbhʉsɨɨgi bhʉnʉ mʉnabhwɨ abharɨndu bhʉʉsi bha Mungu. 5 Ubhwisirirya bhwanyu nʉ ʉbhʉsɨɨgi bhwanyu bhʉkarwɨra kubhwisɨgi bhʉnʉ Mungu abhatɨɨrɨɨrɨ mwisaarʉ. Mukiigwa igʉrʉ wu ubhwisɨgi bhuyo, hanʉ mwarwaziirwɨ amangʼana ga amaheene gɨ Ɨngʼana Ɨnzʉmu. 6 Ɨngʼana Ɨnzʉmu yɨnʉ yaahikirɨ kwa niimwɨ, ɨranyaragana mʉʉsɨ yʉʉsi. Ɨrangʼeha kugirya abhaatʉ kwichʉrɨra Mungu na bhanagɨ, chɨmbu yaakʉrirɨ kwa niimwɨ kwɨma urusikʉ rʉnʉ mwigwirɨ igʉrʉ wʉ ʉrʉbhangʉ rwa Mungu, no okomenya amaheene igʉrʉ wɨ ɨbhɨgʉngi bhyazɨ. 7 Mʉkɨɨga Ɨngʼana Ɨnzʉmu yiyo kurwa kwa Ɨpafura, ʉmʉkɨndichɨtʉ ʉmʉsɨɨgwa. Ewe, ne‑mohocha moheene wa Kiriisitʉ igʉrʉ waanyu. 8 Akatʉbhʉʉrɨra igʉrʉ wʉ ʉbhʉsɨɨgi bhwanyu bhʉnʉ mʉhɨɨrwɨ ne Ekoro Ɨndɨndu.‡Ekoro Ɨndɨndu. Kʉmaragɨrɨra bhʉkʉngʼu, rora Ikiniibhasa.
9 Igʉrʉ wa riyo, tʉkɨɨrɨ kutiga kʉbhasabhɨra, kwɨma urusikʉ rʉnʉ twigwirɨ amangʼana gaanyu. Tʉrasabha Mungu abhahɨ ʉbhʉmɨnyi bhwʉsi kʉganʉ akwenda, kubhwʉbhʉʉri bhwaru nʉ ʉbhʉmɨnyi bhʉnʉ bhukurwa kwe Ekoro Ɨndɨndu. 10 Neho mʉkʉtʉra kwikara chɨmbu Ʉmʉkʉrʉ Yɨɨsu akwenda, na kokora ganʉ gakomozomera kʉmangʼana gʉʉsi. Ɨbhu nɨmbu muriibhʉrɨ imisumʉ komeremo ɨmɨzʉmu, na moroongera komenya Mungu. 11 Mungu abhanajɨ kʉbhʉnaja bhwazɨ bhwu ukuruguurya, korereke mʉtʉrɨ kwigumirirya hamwɨmwɨ no obhozomerwa. 12 Mmbe, mʉbhʉʉrɨrɨ Bhaabha Mungu azʉmiryɨ, wʉnʉ abhanagiryɨ kobhona ɨgabhʉ na abharɨndu bhaazɨ mʉbhʉtɨmi bhu ubhwɨrʉ. 13 Atʉsabhwirɨ kurwa mʉbhʉtɨmi bhwi ikiirimya, atʉsaamiryɨ na kutusikirya mʉbhʉtɨmi bhu Umwana waazɨ§Umwana waazɨ. Kʉmaragɨrɨra bhʉkʉngʼu, rora ringʼana Umwana wa Mungu muKiniibhasa. ʉmʉsɨɨgwa. 14 Kʉ kʉhɨtɨra Umwana waazɨ tʉsabhwirwɨ, kʉ kʉbha ʉbhʉbhɨ bhwɨtʉ bhʉbhɨɨrɨɨrwɨ.
Umwana wa Mungu anʉ ʉbhʉnaja igʉrʉ wa bhyʉsi
15 Ewe, ne‑kerenjo cha Mungu wʉnʉ atakororekana.
Nɨ‑mʉtangi we ebhegero bhyʉsi,
16 kʉ kʉbha ebhegero bhyʉsi bhɨkateemwa kʉhɨtɨra kwawɨ,
bhɨnʉ bhiri mwisaarʉ na mʉʉsɨ,
bhɨnʉ bhekororekana na bhɨnʉ bhɨtakororekana,
bhʉ ʉbhʉnaja hamwɨ abhatɨmi, abhakʉrʉ hamwɨ bha amanaga.
Bhyʉsi bhɨkateemwa kʉhɨtɨra ewe ni igʉrʉ waazɨ.
17 Ewe aareho kwɨma hanʉ ebhegero bhyʉsi bhyarɨ bhɨkɨɨrɨ koteemwa,
na kʉhɨtɨra ewe ebhegero bhyʉsi bhɨhaagwatana hamwɨmwɨ.
18 Ewe newe umutwɨ gwʉ ʉmʉbhɨrɨ, neryo risengerero.
Ewe newe ʉbhʉtangɨ,
kʉ kʉbha akabha we embere kuryʉka mʉbhaku,
korereke abhɨ ʉmʉkʉrʉ we ebhegero bhyʉsi.
19 Nɨmbu ɨkazomera Mungu,
ʉbhʉnaja bhwazɨ bhwʉsi bhʉbhɨ muMwana waazɨ.
20 Na ɨkazomera Mungu,
kʉnzɨra yu Umwana waazɨ,
Mungu agwatɨɨnʼyɨ ebhegero bhyʉsi neewe,
bhɨnʉ bhɨrɨ mʉʉsɨ mʉnʉ na mwisaarʉ.
Akakorabhu kwa koreeta omorembe,
kʉhɨtɨra amasaahɨ gu Umwana waazɨ
ganʉ giitikirɨ kʉmʉsarabha.
21 Zisikʉ zinyuma, imwʉsi mwarɨ kore na Mungu. Mwarɨ bhabhisa bhaazɨ mumiisɨɨgi gaanyu kwa zeteemwa zaanyu zɨmbɨ. Nawe nangʉ Mungu abhagwatɨɨnʼyɨ neewe, 22 kʉnzɨra yu uruku rwu Umwana waazɨ. Akakorabhu korereke abhatʉʉrɨ mʉbhʉtangɨ bhwazɨ, bharɨndu mʉrɨ, bhanʉ bhataana isoro nʉʉrʉ kuririirirwa. 23 Nawe moreenderwa kongʼeha kwisirirya Ɨngʼana Ɨnzʉmu mʉrɨ bhwɨma na kʉbha na amanaga. Mʉtachurwa na kutiga ubhwisɨgi bhʉnʉ mwabhwɨnɨ hanʉ mwigwirɨ Ɨngʼana Ɨnzʉmu. Ɨngʼana yiyo irwazirwɨ kʉbhaatʉ bhʉʉsi bha kʉʉsɨ kʉnʉ, inyɨ Paaurʉ nɨbhɨɨrɨ omohocha waazɨ.
Emeremo ja Paaurʉ mʉmasengerero
24 Nangʉ nɨrazomererwa ɨnyaakʉ yɨnʉ nekobhona igʉrʉ waanyu. Mʉmʉbhɨrɨ gwanɨ nɨragwatana nɨ ɨnyaakʉ ya Kiriisitʉ igʉrʉ wʉ ʉmʉbhɨrɨ gwazɨ, neryo risengerero. 25 Mungu antɨɨrɨ omohocha wa risengerero ryazɨ, korereke nɨbharwazɨrɨ bhwaheene ɨngʼana yaazɨ. 26 Ɨngʼana yiyo neyo imbisi yu ubhwɨndi bhwazɨ bhʉnʉ bhwarɨ bhubhisirwɨ kuzinyibhʉrʉ zʉʉsi kwɨma ɨkarɨ. Nawe nangwɨnʉ Mungu ahumburiirɨ abharɨndu bhaazɨ.*Rora Abheefeeso 3:3‑6. 27 Mungu akasɨɨga kʉbhahumburɨra ubhwɨrʉ ʉbhʉkʉrʉ bhwi imbisi yɨnʉ yanyaragɨɨnɨ kʉbhaatʉ bhanʉ bhatarɨ Abhayaahudi. Imbisi yiyo neyo yɨnʉ, Kiriisitʉ arɨ kʉbhaniimwɨ, ubhwisɨgi bhwu ubhwɨrʉ.
28 Kiriisitʉ newe tukurwaza ɨngʼana yaazɨ tʉrakanya na kwija abhaatʉ bhʉʉsi kubhwʉbhʉʉri bhwʉsi, korereke tʉtʉrɨ kʉbhareeta bhʉʉsi mʉbhʉtangɨ bhwa Mungu ɨnʉ bhanagirɨ kukugwatana na Kiriisitʉ. 29 Kubhwɨndi bhuyo inyɨ nɨrakora emeremo na kwikongʼeererya kwa amanaga makʉrʉ ga Kiriisitʉ ganʉ gakokora emeremo mʉmʉbhɨrɨ gwanɨ.
*1:1 Umutumwa. Kʉmaragɨrɨra bhʉkʉngʼu, rora ringʼana abhatumwa muKiniibhasa.
†1:2 Abharɨndu. Kʉmaragɨrɨra bhʉkʉngʼu, rora Ikiniibhasa.
‡1:8 Ekoro Ɨndɨndu. Kʉmaragɨrɨra bhʉkʉngʼu, rora Ikiniibhasa.
§1:13 Umwana waazɨ. Kʉmaragɨrɨra bhʉkʉngʼu, rora ringʼana Umwana wa Mungu muKiniibhasa.
*1:26 Rora Abheefeeso 3:3‑6.