Ɨnyarʉbha ya Paaurʉ kwa
Abheefeeso
Ʉbhʉkangati
Ɨnyarʉbha ya Paaurʉ kwa abhahɨmba bha Yɨɨsu bhʉ ʉrʉbhɨri rwa Efeeso, akaandɨka hanʉ aarɨ mokebhoho. Ʉrʉbhɨri rwa Efeeso rwarɨ nɨ‑rʉmwɨ ya zɨmbɨri zɨkʉrʉ zʉ ʉbhʉkangati bhwa Abharuumi. Efeeso yaarɨ neyo ɨtangɨ yu ubhusuruja nu ubhuniibhi, na kwarɨ na Abhayaahudi bhaaru. Paaurʉ akaja iyo ribhaga ryo orogendo rwazɨ rwa kabhɨrɨ na rwa katatʉ rwu ukuja kʉraganʼya Ɨngʼana Ɨnzʉmu igʉrʉ wa Yɨɨsu (Amahocha ga Abhatumwa 18:19‑22, 19:1‑41) na akiikara kwi ibhaga rya myaka ɨbhɨrɨ.
Ɨnyarʉbha yɨnʉ ɨragambɨra ubhwɨndi bhwa Mungu bhwʉ ʉkʉsabhʉra abhaatʉ. Paaurʉ arabhahiitya kʉbha Yɨɨsu akakwa kʉmʉsarabha korereke atʉsabhʉrɨ, nawe Mungu akamuryʉra, na nangʉ ana Mungu ahagero ahazʉmu bhʉkʉngʼu, ɨnʉ akʉkangata nangwɨnʉ na kemerano.
Mʉnyarʉbha yɨnʉ manga kabhɨrɨ Paaurʉ arasabhɨra abhiisirirya abhakɨndichazɨ Efeeso iyo. Arakumya Mungu igʉrʉ wu ubhwisirirya nʉ ʉbhʉsɨɨgi bhwabhʉ, wʉʉsi arasabha Mungu abhasakiryɨ bhamenye ʉbhʉnaja bhwa Mungu chɨmbu bhʉrɨ nʉ ʉbhʉsɨɨgi bhwa Yɨɨsu bhʉnʉ bhʉtaana kerengo.
Ringʼana rya Abhakiriisitʉ bhʉʉsi kʉbha kegero kɨmwɨ na Yɨɨsu ni bhwera bhʉkʉngʼu mʉnyarʉbha, na rɨragambwa manga merongo ɨbhɨrɨ. Paaurʉ arabhʉʉrɨra Abheefeeso, abhaatʉ bhanʉ bhabhwɨnɨ ubhwikari ubhuhya bhareenderwa kokora amahocha amahya.
Akʉmara, Paaurʉ ariija abhakari na abhasubhɨ bhaabhʉ, abhiibhuri na abhaana, na bhambʉʉsa na bhanʉ bhatarɨ bhambʉʉsa kokora bhwaheene chɨmbu abhiisirirya bha Yɨɨsu bhakwenderwa kwikara. Ɨtɨnɨrʉ, ariija igʉrʉ we ebheseme bhya riihɨ rye ekoro.
1
Amakeerenʼya
1 Ɨnyarʉbha yɨnʉ nandikirɨ inyɨ Paaurʉ, umutumwa*Umutumwa. Kʉmaragɨrɨra bhʉkʉngʼu, rora ringʼana abhatumwa muKiniibhasa. wa Yɨɨsu Kiriisitʉ kʉbhʉsɨɨgi bhwa Mungu. Nɨrabhaandɨkɨra imwɨ abharɨndu†Abharɨndu. Kʉmaragɨrɨra bhʉkʉngʼu, rora Ikiniibhasa. bha Mungu bhanʉ mukwikara [Efeeso]. Imwɨ, nɨ‑bharonge ku kugwatana na Yɨɨsu Kiriisitʉ.
2 Ɨbhɨgʉngi no omorembe kurwa kwa Bhaabha Mungu, na kʉMʉkʉrʉ Yɨɨsu Kiriisitʉ, bhɨbhɨ na niimwɨ.
Ʉrʉbhangʉ rwe ekoro kwa abhiisirirya
3 Akumibhwɨ Mungu, Bhaabha wʉ Ʉmʉkʉrʉ wɨɨtʉ Yɨɨsu Kiriisitʉ, kʉ kʉbha ku kutugwatanʼya na Kiriisitʉ, akatoha ʉrʉbhangʉ rwʉsi rwa mokoro, ko kotoha ʉrʉbhangʉ rʉnʉ ruri mwisaarʉ. 4 Hanʉ Mungu aarɨ akɨɨrɨ kʉbhʉmba ɨɨsɨ, akatorobhora tʉbhɨ bhaazɨ, kʉnzɨra yu ukutugwatanʼya na Kiriisitʉ. Akakorabhu, korereke tʉbhɨ abharɨndu bhanʉ tʉtaana isoro mʉbhʉtangɨ bhwazɨ. Kʉbhʉsɨɨgi bhwazɨ, 5 Mungu aarɨ ɨndirɨ kwɨma ɨkarɨ, kotokora kʉbha abhaana bhaazɨ kʉnzɨra ya Yɨɨsu Kiriisitʉ. Akeenda kokorabhu, kʉ kʉbha nɨmbu yamʉzʉmɨɨrɨ. 6 Mmbe akumibhwɨ Mungu kʉbhɨgʉngi bhyazɨ, bhɨnʉ atʉhɨɨrɨ bhʉʉha kʉnzɨra yu Umwana waazɨ‡Umwana waazɨ. Kʉmaragɨrɨra bhʉkʉngʼu, rora ringʼana Umwana wa Mungu muKiniibhasa. ʉmʉsɨɨgwa.
7 Mungu atʉsabhwirɨ kʉnzɨra ya amasaahɨ ga Yɨɨsu Kiriisitʉ, atʉbhɨɨrɨɨrɨ ʉbhʉbhɨ bhwɨtʉ bhwʉsi, kʉrɨngʼaana nu ubhwaru bhwɨ ɨbhɨgʉngi bhyazɨ. 8 Ewe akatohererya ʉrʉbhangʉ rwazɨ, hamwɨmwɨ na kotoha amangʼɨɨni nu ubhwʉbhʉʉri bhwaru. 9 Atʉkʉrirɨ twobhoore ɨsɨɨmi yaazɨ yɨnʉ yaarɨ yiibhisirɨ, na akayihicha kʉhɨtɨra kwa Kiriisitʉ, chɨmbu ɨɨndirɨ. 10 Ɨsɨɨmi ya Mungu nɨ‑kʉbha, ribhaga rɨnʉ ɨɨndirɨ hanʉ rikuhika, arabhɨtʉʉra ebhegero bhyʉsi bhya mwisaarʉ na bhya kʉʉsɨ bhɨbhɨ iyaasɨ wʉ ʉbhʉkangati bhwa Kiriisitʉ.
11 Ku ukugwatana na Kiriisitʉ, itwɨ Abhayaahudi tʉgabhiibhwɨ ʉbhʉsabhuri chɨmbu twarɨngɨɨrwɨ nu ubhwɨndi bhwa Mungu, ʉmʉkʉri wa amangʼana gʉʉsi kʉrɨngʼaana nu ubhwɨndi bhwazɨ. 12 Akakorabhu igʉrʉ wɨɨtʉ, bhanʉ twarɨ bhe embere kwisega Kiriisitʉ, korereke Mungu akumibhwɨ.
13 Imwʉsi abhaatʉ bhanʉ bhatarɨ Abhayaahudi, mukiigwa amangʼana ga amaheene, gɨ Ɨngʼana Ɨnzʉmu yʉ ʉbhʉsabhuri bhwanyu. Hanʉ mwisiriiryɨ Kiriisitʉ, Mungu wʉʉsi akabhakaama ʉrʉkaamʉ, kʉ ʉkʉbhaha Ekoro Ɨndɨndu§Ekoro Ɨndɨndu. Kʉmaragɨrɨra bhʉkʉngʼu, rora Ikiniibhasa. yɨnʉ aabharagɨɨnʼyɨ. Ko kokorabhu, akeerekenʼya, imwɨ nɨ‑bhaazɨ. 14 Ekoro Ɨndɨndu yiyo yangɨ ichɨrɨkɨnʼyʉ cha Mungu kwa niitwɨ, Mungu aratoha bhyʉsi bhɨnʉ aaragɨɨnʼyɨ. Ekoro yiyo neyo Mungu atɨɨrɨ kuhika hanʉ arɨɨtʉsabhʉrɨ itwɨ abhaatʉ bhaazɨ. Tukumyɨ Mungu bhʉkʉngʼu!
Paaurʉ arasabhɨra Abhakiriisitʉ bha Efeeso
15 Nɨrakumya Mungu kʉ kʉbha amangʼana gayo gʉʉsi aatʉkʉrɨɨrɨ. Kwɨma hanʉ niigwirɨ chɨmbu mukwisirirya Ʉmʉkʉrʉ Yɨɨsu na kʉsɨɨga abharɨndu bhʉʉsi bha Mungu, 16 nɨkɨɨrɨ kutiga kukumya Mungu igʉrʉ waanyu. Nɨrabhahiita ribhaga ryʉsi mʉmasabhi gaanɨ. 17 Nɨrasabha Mungu wʉ Ʉmʉkʉrʉ wɨɨtʉ Yɨɨsu Kiriisitʉ, Bhaabha umugungwa, abhahɨ Ekoro yaazɨ yɨnʉ ɨkʉbhaha ubhwʉbhʉʉri nu ubhwɨrɨkibhwa, korereke mʉtʉrɨ komomenya bhʉkʉngʼu. 18 Nɨramʉsabha abhasakiryɨ korereke momenye bhwaheene kɨnʉ abhabhirikiriirɨ mʉsʉngʼaanɨ, neho mʉbhɨ nu ubhwisɨgi bhwe eheene. Mʉtʉrɨ kwobhoora ubhuniibhi bhwʉ ʉbhʉgabhi bhwazɨ ʉbhʉzʉmu bhʉnʉ aaragɨɨnʼyɨ abharɨndu bhaazɨ. 19 Kwikɨ mwobhoore ʉbhʉnaja bhwazɨ ʉbhʉkʉrʉ igʉrʉ wɨɨtʉ abhiisirirya. Ʉbhʉnaja bhuyo bhʉrakora emeremo, kʉrɨngʼaana na amanaga gaazɨ amakʉrʉ, 20 ganʉ aakʉrirɨ kwa Kiriisitʉ hanʉ aamuryukwirɨ mʉbhaku. Akʉmara akamwikarya ʉrʉbhaara rwazɨ rwu ubhuryʉ mwisaarʉ. 21 Ni igʉrʉ iyo, Kiriisitʉ arakangata igʉrʉ wa bhʉʉsi bhanʉ bharɨ kowereero yɨnʉ ɨtakororekana, abhakangati bhaabhʉ, bhʉ ʉbhʉnaja, bha amanaga na bhi imyeya jʉsi. Arakangata kwa bhʉʉsi, ɨtarɨ kʉʉsɨ yɨnʉ iyeene, nʉʉrʉ kʉʉsɨ yɨnʉ ikuuza. 22 Mungu atɨɨrɨ ebhegero bhyʉsi mʉmabhoko gaazɨ, na kʉmʉtʉʉra mwisengerero abhɨ Ʉmʉkʉrʉ we ebhegero bhyʉsi nchu umutwɨ kʉmʉbhɨrɨ. 23 Risengerero nɨ‑mʉbhɨrɨ gwa Kiriisitʉ, na ryizwirɨ ʉbhʉnagu bhwazɨ. Ewe newe akʉnaja ebhegero bhyʉsi hʉhʉʉsi.