8
Yɨɨsu ni‑Kuhaani Ʉmʉkʉrʉ wʉ ʉbhʉragɨ ubhuhya
1 Mmbe ringʼana rikʉrʉ mwa gʉʉsi ganʉ tʉkʉgamba nɨ‑rɨnʉ. Tʉnawe Kuhaani Ʉmʉkʉrʉ we eteemwa yiyo, wʉnʉ iikɨɨrɨ ʉrʉbhaara rwu ubhuryʉ rwi ikitumbɨ chɨ ɨkɨtɨmi cha Mungu wʉ Ʉbhʉnaja, mwisaarʉ. 2 Ewe arakora emeremo ja kuhaani ʉmʉkʉrʉ ahagero aharɨndu, mwibhuru rya amaheene rɨnʉ rɨtʉmbakirwɨ na mʉʉtʉ, nawe Ʉmʉkʉrʉ umwene newe aaryʉmbakirɨ.
3 Bhakuhaani abhakʉrʉ bharatuurwa korereke bhʉʉsi bhahurukiryɨ Mungu ʉbhʉnaja ni ikimweso. Ɨbhuɨbhu Kuhaani Ʉmʉkʉrʉ wɨɨtʉ, wʉʉsi areenderwa abhɨ ne ekegero chu ukuhurukirya Mungu. 4 Ewe angabhɨɨrɨ kʉʉsɨ kʉnʉ, ataarɨ arabha kuhaani, kʉ kʉbha bhareho bhakuhaani bhanʉ bhakuhurucha ikimweso kʉrɨngʼaana ni imigirʉ ja Musa. 5 Amangʼana ganʉ abhakuhaani bhayo bhakokora aharɨndu ne‑kerenjo ichene na ni‑kiikiriiri cha ganʉ gari mwisaarʉ. Necho hanʉ Musa aarɨ haguhɨ kwʉmbaka ribhuru ryo okosengera, Mungu akamʉbhʉʉrɨra, “Kora ebhegero bhyʉsi kʉrɨngʼaana ne ekerenjo kɨnʉ nakwɨrɨkiryɨ kʉkɨgʉrʉ cha Sinayi.”*Rora Kʉhʉrʉka 25:40. 6 Nawe emeremo ju ubhukuhaani gɨnʉ Yɨɨsu ahɨɨrwɨ nɨ‑mɨzʉmu bhʉkʉngʼu kʉkɨra ja abhakuhaani bhe embere. Yɨɨsu newe umwigwanʼya wa abhaatʉ na Mungu kʉbhʉragɨ ʉbhʉnagu kʉkɨra bhwe embere. Nʉ ʉbhʉragɨ bhuyo bhʉʉmbakirwɨ kʉbhʉrʉsa ʉbhʉzʉmu igʉrʉ wʉ ʉbhʉragɨ ʉbhʉzʉmu bhʉkʉngʼu kʉkɨra ʉbhʉragɨ bhwɨ ɨkarɨ bhurya.
7 Angabhɨɨrɨ riragɨ rye embere ryisɨ, umweya gwʉ ʉbhʉragɨ bhwa kabhɨrɨ gʉtaarɨ gʉramʉhibhwa. 8 Nawe hanʉ aarʉʉzɨ ʉbhʉbhɨ bhwa abhaatʉ, akabhuga,
“Mwitegeerere, Ʉmʉkʉrʉ arabhuga, ribhaga rɨraaza,
hanʉ nɨraakore ʉbhʉragɨ ubhuhya na abhaatʉ bha Iziraɨri na bha Yuuda.
9 Ʉbhʉragɨ bhuyo bhʉtakʉbha ncha bhwɨ ɨkarɨ bhʉnʉ nakʉrirɨ na bhawisɨɨkʉrʉ,
nɨkabhagwata okobhoko, nɨkabhakangata kurwa Miisiri.
Ebho bhataarɨ bhaheene kukugwata ʉbhʉragɨ bhwɨ ɨkarɨ.
Necho chagiriryɨ nɨtabhamuriryɨ,
Ʉmʉkʉrʉ akabhuga.
10 Bhʉnʉ nebhwe ʉbhʉragɨ ubhuhya
bhʉnʉ nɨraakore na Abhiiziraɨri kuzisikʉ zɨnʉ zikuuza.
Nɨratʉʉra imigirʉ janɨ mumiisɨɨgi gaabhʉ
na nɨrajandɨka mozekoro zaabhʉ.
Inyɨ nɨrabha Mungu waabhʉ,
bhʉʉsi bharabha abhaatʉ bhaanɨ.
11 Atakʉbhaho ʉmʉʉtʉ wʉwʉʉsi wʉnʉ akʉbha ariija ʉmʉkɨndichazɨ,
hamwɨ ʉmʉʉtʉ wʉ ʉkʉbhʉʉrɨra umuhiiri waazɨ,
‘Momenye Ʉmʉkʉrʉ Mungu.’
Bhʉʉsi kʉtangɨra umusuuhu kuhika kʉmʉkʉrʉ
bharaamenya inyɨ.
12 Nɨrabhabheerera amabhɨ gaabhʉ,
na nɨtakuhiita kwikɨ ʉbhʉbhɨ bhwabhʉ.”†Rora Yɨrɨmiya 31:31‑34.
13 Hanʉ Mungu akubhuga ʉbhʉragɨ bhʉnʉ ni‑bhuhya, areerecha kʉbha ʉbhʉragɨ bhwe embere bhukungu. Ne ekegero chʉchʉsi kɨnʉ kɨtangirɨ kukunguha, kɨrɨ haguhɨ kurweho.