Amangʼana Amazʉmu ga Yɨɨsu Kiriisitʉ
chɨmbu gaandikirwɨ na
Mataayo
Ʉbhʉkangati
Ɨkɨtabhʉ kɨnʉ chandikirwɨ na Mataayo. Hanʉ Mataayo aarɨ umurihya wa rigʉʉti, Yɨɨsu akamʉbhɨrɨkɨra kʉbha umwɨga waazɨ. Amangʼana maaru ganʉ Mataayo aandikirɨ mʉkɨtabhʉ kɨnʉ, nɨ‑ganʉ aamɨnyɨɨkɨrɨɨryɨ umwene na amɨɨsʉ gaazɨ. Mataayo akaandɨkɨra Abhayaahudi bhanʉ bhiisiriiryɨ Yɨɨsu. Nawe, Ɨngʼana Ɨnzʉmu igʉrʉ wa Yɨɨsu ɨtarɨ igʉrʉ wa Abhayaahudi abheene, nɨ‑kʉbhaatʉ bhʉʉsi bhɨ ɨɨsɨ yɨnʉ. Ɨngʼana Ɨnzʉmu ɨrabhuga, Yɨɨsu newe Kiriisitʉ nʉ Ʉmʉsabhuri wa abhaatʉ. Kʉhɨtɨra Yɨɨsu, Mungu akamara gʉʉsi ganʉ aarɨ aragɨɨnʼyɨ abhaatʉ kʉbha arakora.
Ɨkɨtabhʉ cha Mataayo kɨragambɨra ɨbhɨsɨgʉ bhyaru kubhwikari bhwa Yɨɨsu kʉʉsɨ kʉnʉ, kwɨma ukwibhurwa kwazɨ kuhika ʉkʉgarʉka kwazɨ mwisaarʉ. Gatɨgatɨ kɨrahurucha amiija ganʉ Yɨɨsu aarɨ ariija abhaatʉ. Mumiija gaazɨ, toroobhoora chɨmbu ʉbhʉtɨmi bhwa Mungu bhʉrɨ, na tʉraraarikwa kwikara ubhwikari bhwo okozomeerya Mungu.
1
Ikishoko kɨnʉ Yɨɨsu Kiriisitʉ aaruuriirɨ
(Ruuka 3:23‑38)
1 Ganʉ nego amariina gi ikishoko kɨnʉ Yɨɨsu Kiriisitʉ aaruuriirɨ. Yɨɨsu Kiriisitʉ akarwɨra murwibhʉrʉ rwʉ ʉmʉtɨmi Daudi ni ikishoko cha Abhurahaamu.
2 Abhurahaamu akiibhʉra Iisaka,
Iisaka akiibhʉra Yaakobho,
Yaakobho akiibhʉra Yuuda na abhahiiri bhaazɨ.
3 Yuuda akiibhʉra Pɨrɨɨsi na Zeera kwa Tamaari,
Pɨrɨɨsi akiibhʉra Hɨzirʉʉni,
Hɨzirʉʉni akiibhʉra Araamu,
4 Araamu akiibhʉra Aminadaabhu,
Aminadaabhu akiibhʉra Nashʉni,
Nashʉni akiibhʉra Sarimʉʉni,
5 Sarimʉʉni akiibhʉra Bhoowazi kwa Rahaabhu,
Bhoowazi akiibhʉra Ʉbhɨɨdi kwa Ruutu,
Ʉbhɨɨdi akiibhʉra Yeese,
6 na Yeese akiibhʉra ʉmʉtɨmi Daudi.*Rora Ruutu 4:18‑22.
Daudi akiibhʉra Sɨrɨmaani kʉmʉkari wʉnʉ aarɨ kʉbha ʉmʉkari wa Uriya,†Ʉmʉkari wa Uriya aarɨ arabhirikirwa Bhatishebha. Rora 2 Samwɨri 12:24‑25.
7 Sɨrɨmaani akiibhʉra Rehobhowamu,
Rehobhowamu akiibhʉra Abhiya,
Abhiya akiibhʉra Asa,
8 Asa akiibhʉra Yehoshafaati,
Yehoshafaati akiibhʉra Yoraamu,
Yoraamu akiibhʉra Uziya,
9 Uziya akiibhʉra Yosamu,
Yosamu akiibhʉra Ahaazi,
Ahaazi akiibhʉra Hɨzɨkiya,
10 Hɨzɨkiya akiibhʉra Manaasɨ,
Manaasɨ akiibhʉra Amʉni,
Amʉni akiibhʉra Yʉsiya,
11 na Yʉsiya akiibhʉra Yɨkʉniya na bhaumwabhʉ.
Ribhaga rɨkahɨta, Abhiiziraɨri bhakagwatwa, bhakahirwa mobhohocha mucharʉ cha Bhaabhɨɨri.
12 Hanʉ Abhiiziraɨri bhaamarirɨ kʉsaamibhwa iyo,
Yɨkʉniya akiibhʉra Sheyaritiyɨri,
Sheyaritiyɨri akiibhʉra Zɨrubhabhɨɨri,
13 Zɨrubhabhɨɨri akiibhʉra Abhihudi,
Abhihudi akiibhʉra Ɨriyakimu,
Ɨriyakimu akiibhʉra Azʉri,
14 Azʉri akiibhʉra Zadʉki,
Zadʉki akiibhʉra Akimu,
Akimu akiibhʉra Ɨriudi,
15 Ɨriudi akiibhʉra Ɨrɨazaari,
Ɨrɨazaari akiibhʉra Matani,
Matani akiibhʉra Yaakobho,
16 Yaakobho akiibhʉra Yuusufu, umusubhɨ wa Mariyamu,
na Mariyamu akiibhʉra Yɨɨsu wʉnʉ akubhirikirwa Kiriisitʉ.‡Kiriisitʉ. Kʉmaragɨrɨra bhʉkʉngʼu, rora Ikiniibhasa.
17 Mmbe, kurwa kwa Abhurahaamu kuhikɨra ukwibhurwa kʉ ʉmʉtɨmi Daudi kwarɨ na zinyibhʉrʉ ikumi ni inyɨ. Na kurwa kwa Daudi kuhikɨra ribhaga rɨnʉ Abhiiziraɨri bhaasaamiibhwɨ mobhohocha mucharʉ cha Bhaabhɨɨri, kwarɨ na zinyibhʉrʉ ɨzɨndɨ ikumi ni inyɨ. Na kurwa ribhaga rɨnʉ bhasaamiibhwɨ iyo kuhikɨra ukwibhurwa kwa Kiriisitʉ, kwarɨ na zinyibhʉrʉ ɨzɨndɨ ikumi ni inyɨ.
Ukwibhurwa kwa Yɨɨsu Kiriisitʉ
(Ruuka 2:1‑7)
18 Ganʉ nego amangʼana gu ukwibhurwa kwa Yɨɨsu Kiriisitʉ. Mariyamu unina Yɨɨsu, aarɨ arunjibhwɨ na Yuusufu. Nawe hanʉ aarɨ akɨɨrɨ kuryakara, Mariyamu akagega ɨnda kʉbhʉnaja bhwe Ekoro Ɨndɨndu.§Ekoro Ɨndɨndu. Kʉmaragɨrɨra bhʉkʉngʼu, rora Ikiniibhasa. 19 Yuusufu umusubhɨ waazɨ, aarɨ ʉmʉʉtʉ we eheene mʉbhʉtangɨ bhwa Mungu. Atɨɨndirɨ asuuchɨ Mariyamu, kʉgayo akeenda amwangɨ kimbisi.*Kʉrɨngʼaana ni isimʉka ya Abhayaahudi, arɨɨbhɨ umumura nu umuucha bhiirunjiryɨ, bhahaabharwa kʉbha bhiikwɨri. Nawe kwarɨ na ribhaga ryu umwaka mugima gu ukwirɨnda bhakɨɨrɨ kwikwɨra. Ribhaga ryʉsi riyo bhatiisiririibhwɨ kwikara hamwɨmwɨ kuhika rwu ukuryakara. Kumutiga wʉnʉ aarunjibhwɨ kʉkatuubhana no okobhorora.
20 Nawe, hanʉ Yuusufu aarɨ ariiseega gayo, rogendo rʉmwɨ maraika†Maraika. Kʉmaragɨrɨra bhʉkʉngʼu, rora Ikiniibhasa. wʉ Ʉmʉkʉrʉ Mungu akamuhwarʉkɨra mokerooto, akamʉbhʉʉrɨra, “Yuusufu, umwana wʉ ʉmʉtɨmi Daudi,‡Daudi. Kʉmaragɨrɨra bhʉkʉngʼu, rora Ikiniibhasa. ʉtʉʉbhaha kukwɨra Mariyamu, kʉ kʉbha ɨnda yaazɨ ayibhwɨnɨ kʉbhʉnaja bhwe Ekoro Ɨndɨndu. 21 Ariibhʉra umwana wi ikisubhɨ, naawɨ ʉmʉrʉkɨ Yɨɨsu,§Enzobhooro yi iriina Yɨɨsu, Ʉmʉkʉrʉ Mungu arasabhʉra. kʉ kʉbha wuyo newe araasabhʉrɨ abhaatʉ bhaazɨ kurwa mʉbhʉbhɨ bhwabhʉ.”
22 Gayo gʉʉsi gaakʉriibhwɨ, korereke rɨbhɨ ringʼana rɨnʉ Ʉmʉkʉrʉ Mungu aagambirɨ kʉnzɨra yʉ ʉmʉrʉʉtɨrɨri kʉbha,
23 “Rora, umusiiti aragega ɨnda,
neewe ariibhʉra umwana wi ikisubhɨ.
Ararukwa Ɨmaanwɨri.”*Rora Isaaya 7:14.
Enzobhooro yaku, Mungu hamwɨmwɨ na niitwɨ.
24 Hanʉ Yuusufu aabhuukirɨ, akakora chɨmbu maraika wʉ Ʉmʉkʉrʉ Mungu aamubhuuriirɨ. Akakwɨra Mariyamu, 25 nawe atarɨɨrɨ neewe kuhika hanʉ Mariyamu iitʉʉrɨɨnʼyɨ. Akamʉrʉka umwana wuyo, Yɨɨsu.
*1:6 Rora Ruutu 4:18‑22.
†1:6 Ʉmʉkari wa Uriya aarɨ arabhirikirwa Bhatishebha. Rora 2 Samwɨri 12:24‑25.
‡1:16 Kiriisitʉ. Kʉmaragɨrɨra bhʉkʉngʼu, rora Ikiniibhasa.
§1:18 Ekoro Ɨndɨndu. Kʉmaragɨrɨra bhʉkʉngʼu, rora Ikiniibhasa.
*1:19 Kʉrɨngʼaana ni isimʉka ya Abhayaahudi, arɨɨbhɨ umumura nu umuucha bhiirunjiryɨ, bhahaabharwa kʉbha bhiikwɨri. Nawe kwarɨ na ribhaga ryu umwaka mugima gu ukwirɨnda bhakɨɨrɨ kwikwɨra. Ribhaga ryʉsi riyo bhatiisiririibhwɨ kwikara hamwɨmwɨ kuhika rwu ukuryakara. Kumutiga wʉnʉ aarunjibhwɨ kʉkatuubhana no okobhorora.
†1:20 Maraika. Kʉmaragɨrɨra bhʉkʉngʼu, rora Ikiniibhasa.
‡1:20 Daudi. Kʉmaragɨrɨra bhʉkʉngʼu, rora Ikiniibhasa.
§1:21 Enzobhooro yi iriina Yɨɨsu, Ʉmʉkʉrʉ Mungu arasabhʉra.
*1:23 Rora Isaaya 7:14.