Amangʼana Amazʉmu ga Yɨɨsu Kiriisitʉ
chɨmbu gaandikirwɨ na
Maaroko
Ʉbhʉkangati
Ɨkɨtabhʉ kɨnʉ chandikirwɨ na Maaroko. Maaroko aarɨ arabhirikirwa Yoohana Maaroko. Aarɨ wʉmwɨ wa Abhakiriisitʉ bhe embere (Amahocha ga Abhatumwa 12:12). Amangʼana ganʉ aandikirɨ mʉkɨtabhʉ kɨnʉ akagamenya bhwaheene, kʉ kʉbha, aarɨ arahirana na abharwazi ncha Paaurʉ (Amahocha ga Abhatumwa 13:1‑13), Bharinaabha (Amahocha ga Abhatumwa 15:36‑41) na Peetero (1 Peetero 5:13).
Mʉkɨtabhʉ kɨnʉ, Maaroko aarɨ araandɨkɨra Abhakiriisitʉ bhʉ ʉrʉbhɨri rwa Ruumi. Ribhaga riyo Neero newe aarɨ ʉmʉtɨmi wa Ruumi, na kwarɨ nɨ ɨnyaakʉ kʉBhakiriisitʉ. Maaroko akeenda kokongʼya Abhakiriisitʉ mubhwisirirya kwa kʉbhabhʉʉrɨra, bhareenderwa kʉnyaakibhwa chɨmbu Kiriisitʉ aanyaakiibhwɨ na kukwa.
Maaroko areerecha amiisɨɨgi gu ukwandɨka ɨkɨtabhʉ kɨnʉ kʉrʉkɨrɨrɨ rwe embere,
“Ɨngʼana Ɨnzʉmu igʉrʉ wa Yɨɨsu Kiriisitʉ, Umwana wa Mungu.”
Areenda abhasʉmi bhaazɨ bhamenye kʉbha, Yɨɨsu newe Kiriisitʉ, wʉnʉ Mungu aatumirɨ chɨmbu aaragɨɨnʼyɨ. Mʉkɨtabhʉ kɨnʉ, Maaroko aragambɨra amaaru ganʉ Yɨɨsu aarɨ arakora kʉkɨra ganʉ aarɨ akurwaza. Maaroko akaandɨka ebherenjo na amaganʉ gɨ ɨbhɨsɨgʉ ɨbhɨndɨ bhɨnʉ Yɨɨsu aakʉrirɨ. Yɨɨsu akahorya abhaatʉ, akaruusha amasambwa na kʉbhabheerera abhaatʉ ʉbhʉbhɨ bhwabhʉ. Gayo gareerekanʼya ʉbhʉnaja bhwa Yɨɨsu, kʉbha akarwa kwa Mungu, akaaza na kuhurucha ʉbhʉhʉru bhwazɨ kwa kʉbharuusha abhaatʉ kurwa muzinguru zʉ ʉbhʉbhɨ.
1
Yoohana arakonza ɨnzɨra igʉrʉ wa Yɨɨsu
(Mataayo 3:1‑12; Ruuka 3:1‑18; Yoohana 1:19‑28)
1 Bhʉnʉ nebhwe ʉbhʉtangɨ bhwɨ Ɨngʼana Ɨnzʉmu igʉrʉ wa Yɨɨsu Kiriisitʉ,*Kiriisitʉ. Kʉmaragɨrɨra bhʉkʉngʼu, rora Ikiniibhasa. Umwana wa Mungu.†Umwana wa Mungu. Kʉmaragɨrɨra bhʉkʉngʼu, rora Ikiniibhasa. 2 Chɨmbu yandikirwɨ nʉ ʉmʉrʉʉtɨrɨri Isaaya mʉkɨtabhʉ chazɨ kʉbha, Mungu akabhuga, “Rora, nɨratʉma umutumwa waanɨ mʉbhʉtangɨ bhwazʉ, wʉnʉ araakokonzere ɨnzɨra.‡Rora Maraaki 3:1. 3 Umutumwa wʉnʉ nɨ‑wʉnʉ akʉraganʼya mwitɨrɨgʉ, ‘Mokore ɨnzɨra yʉ Ʉmʉkʉrʉ, mogorore ɨbhɨhɨtʉ bhyazɨ!’ ”§Rora Isaaya 40:3.
4 Umutumwa wuyo aarɨ arabhirikirwa Yoohana. Aarɨ mwitɨrɨgʉ ararwazɨra abhaatʉ kʉbha, bhatigɨ ʉbhʉbhɨ nʉ ʉkʉbhatiizwa, korereke Mungu abhabheerere ʉbhʉbhɨ bhwabhʉ. 5 Abhaatʉ bhaaru kurwa kʉrʉbhɨri rwa Yɨrusarɨɨmu na mucharʉ chʉsi cha Yudeya, bhaarɨ bharaja kwa Yoohana. Bhakatiga ʉbhʉbhɨ bhwabhʉ, akabhabhatiiza mʉkɨtaarʉ cha Yorodaani.
6 Yoohana aarɨ ibhʉhirɨ ʉbhʉzʉʉkɨ bhwɨ ɨngamiya, no omokena gwa riseero mukiribhizi.*Zengebho zɨnʉ Yoohana aarɨ akwibhoha, zaarɨ ncha zʉ ʉmʉrʉʉtɨrɨri Ɨɨriya. Rora 2 Abhatɨmi 1:8. Ibhyakurya bhyazɨ bhyarɨ zingigɨ nu ubhwʉkɨ bhwa mwitɨrɨgʉ.
7 Aarɨ ararwaza arabhuga, “Hanʉ nɨkʉmara inyɨ, araaza ʉmʉʉtʉ wʉ ʉbhʉnaja kʉnkɨra. Nɨtakwenderwa nʉʉrʉ kwihiinya kʉtazʉra zisiri zi ibhikwɨra bhyazɨ.†Arɨɨbhɨ umugini arasikɨra munyumba, mbʉʉsa wi iyaasɨ bhʉkʉngʼu aarɨ aramuruusha ibhikwɨra na kwoja amagʉrʉ gaazɨ. 8 Inyɨ nɨrabhabhatiiza kwa amanzi, nawe ewe arabhabhatiiza kwe Ekoro Ɨndɨndu.”‡Ekoro Ɨndɨndu. Kʉmaragɨrɨra bhʉkʉngʼu, rora Ikiniibhasa.
Yɨɨsu arabhatiizwa no okogemwa mwitɨrɨgʉ
(Mataayo 3:13–4:11; Ruuka 3:21‑22, 4:1‑13)
9 Ribhaga riyo, Yɨɨsu akaaza kurwa mʉrʉbhɨri rwa Nazarɨɨti, mucharʉ cha Gariraaya. Wʉʉsi Yoohana akamʉbhatiiza mʉkɨtaarʉ cha Yorodaani. 10 Hanʉ Yɨɨsu aarɨ aratiira kurwa mʉmanzi, akarora risaarʉ ririigʉka, ne Ekoro Ɨndɨndu iriika kwewe nchi ikiguuti. 11 Riraka kurwa mwisaarʉ rɨkabhuga, “Awɨ ni‑Mwana waanɨ ʉmʉsɨɨgwa, nɨzʉmɨrɨɨrwɨ na naawɨ.”
12 Hayohayo Ekoro Ɨndɨndu ɨkamʉkangata Yɨɨsu kuja mwitɨrɨgʉ. 13 Akiikara iyo sikʉ merongo ene, aragemwa na Shɨtaani.§Shɨtaani. Kʉmaragɨrɨra bhʉkʉngʼu, rora Ikiniibhasa. Aarɨ hamwɨmwɨ ni ibhityɨnyi bhya mwitɨrɨgʉ, na bhamaraika*Bhamaraika. Kʉmaragɨrɨra bhʉkʉngʼu, rora ringʼana maraika muKiniibhasa. bha Mungu bhaarɨ bharamwangarɨra.
Yɨɨsu aratanga korobhora abhɨɨga bhaazɨ
(Mataayo 4:12‑22; Ruuka 4:14‑15, 5:1‑11)
14 Zɨkahɨta sikʉ nzaru, Yoohana akabhohwa. Hanʉ aarɨ mokebhoho, Yɨɨsu akaja mucharʉ cha Gariraaya, aarɨ ararwaza Ɨngʼana Ɨnzʉmu ya Mungu. 15 Aarɨ arabhuga, “Ribhaga rɨnʉ ryarʉʉtʉrɨɨrwɨ rihikirɨ, nʉ ʉbhʉtɨmi bhwa Mungu†Ʉbhʉtɨmi bhwa Mungu. Kʉmaragɨrɨra bhʉkʉngʼu, rora Ikiniibhasa. bhʉraariirɨ. Mmbe, mutigɨ ʉbhʉbhɨ bhwanyu, mwisiriryɨ Ɨngʼana Ɨnzʉmu yiyo.”
16 Rusikʉ rʉmwɨ, hanʉ Yɨɨsu aarɨ akʉhɨta rusizʉ wɨ ɨnyanza ya Gariraaya, akarora Simʉʉni nu umunyi waazɨ Andureya. Bhaarɨ bhararekera zenzero mʉnyanza, kʉ kʉbha bhaarɨ abhawɨsɨni. 17 Yɨɨsu akabhabhʉʉrɨra, “Muntunɨ na niinyɨ nɨrabhakora kʉbha abhawɨsɨni bha abhaatʉ.” 18 Hayohayo, bhakazitiga zenzero zaabhʉ, bhakatuna Yɨɨsu.
19 Yɨɨsu akaja embere hamwɨmwɨ na abhɨɨga bhaazɨ bhabhɨrɨ. Akarora Yaakobho nu umunyi waazɨ Yoohana abhaana bha Zebhedaayo, bhaarɨ mubhwatʉ bharazomya zenzero zaabhʉ. 20 Ribhaga riyoriyo, akabhabhɨrɨkɨra bhamutunɨ, bhabhɨ abhɨɨga bhaazɨ. Bhakatiga wiisɨ hamwɨmwɨ na abhahocha bhaazɨ mubhwatʉ, bhakatuna Yɨɨsu.
Yɨɨsu areerecha ʉbhʉnaja bhwazɨ
(Ruuka 4:31‑37)
21 Neho Yɨɨsu na abhɨɨga bhaazɨ bhane, bhakaja mʉrʉbhɨri rwa Kapɨrinaumu. Hanʉ urusikʉ rwʉ ʉbhʉtʉʉrʉ‡Urusikʉ rwʉ ʉbhʉtʉʉrʉ. Kʉmaragɨrɨra bhʉkʉngʼu, rora Ikiniibhasa. rwahikirɨ, bhakasikɨra mwirwazɨrʉ,§Rirwazɨrʉ. Kʉmaragɨrɨra bhʉkʉngʼu, rora Ikiniibhasa. Yɨɨsu akatanga kwija. 22 Amiija gaazɨ gakabharuguurya abhaatʉ bhʉʉsi bhanʉ bhaarɨ bharamwitegeerera. Aarɨ ariija nchʉ ʉmʉʉtʉ wʉ ʉbhʉnaja, na ɨtaarɨ chɨmbu abhiija bhaabhʉ bhi imigirʉ*Abhiija bhi imigirʉ. Kʉmaragɨrɨra bhʉkʉngʼu, rora Ikiniibhasa. ja Musa bhahiija.
23 Mwirwazɨrʉ ryabhʉ, mwarɨ nʉ ʉmʉʉtʉ wʉnʉ aarɨ na risambwa. Akatiirya riraka, 24 arabhuga, “Awɨ Yɨɨsu wa Nazarɨɨti, ʉtatʉnyaacha! Nangʉ, wiizirɨ kuturicha? Nikwɨzɨ awɨ nɨ‑wɨɨwɨ, awɨ nɨ‑Mʉrɨndu wa Mungu.”
25 Yɨɨsu akarɨhaarɨra risambwa riyo akabhuga, “Kira! Nuurwɨ kʉmʉʉtʉ wʉnʉ!” 26 Risambwa rɨkasingisha ʉmʉʉtʉ wuyo bhʉkʉngʼu, rɨkarɨra kwiraka na kumurwɨku.
27 Abhaatʉ bhʉʉsi bhakarʉgʉʉra bhʉkʉngʼu, bhakiibhuurya, “Nɨ‑kɨ kɨnʉ? Ni‑miija mahya, ganʉ ʉbhʉnaja! Rora, ana amanaga gʉ ʉkʉhaarɨra na amasambwa, gʉʉsi garamwigwa.” 28 Ɨtaagɨgirɨ ibhaga irɨɨhu, abhaatʉ kurwa mucharʉ chʉsi cha Gariraaya, bhakabha bhiigwirɨ amangʼana ga Yɨɨsu.
Yɨɨsu arahorya abharwɨrɨ bhaaru
(Mataayo 8:14‑17; Ruuka 4:38‑41)
29 Hanʉ bhaaruurɨ mwirwazɨrʉ, bhakaja hamwɨmwɨ na Yaakobho na Yoohana kuhika wa Simʉʉni na Andureya. 30 Hanʉ bhaahikirɨbhu, Yɨɨsu akabhuurirwa kʉbha, uninabhyara Simʉʉni ari munyumba ahindiirɨ, murwɨrɨ we ehooma. 31 Neho Yɨɨsu akiisuka hanʉ aarɨ, akamugwata okobhoko, akamʉnʉnga. Ribhaga riyoriyo uninabhyara Simʉʉni akahora, akatanga kʉbhahokerya ibhyakurya.
32 Urusikʉ ruyo rigoroobha, hanʉ ʉbhʉtʉʉrʉ bhwasirirɨ, abhaatʉ bhʉ ʉrʉbhɨri ruyo bhaarɨ bharareetera Yɨɨsu abharwɨrɨ, na bhanʉ bhaarɨ na amasambwa. 33 Abhaatʉ bhaaru kurwa mʉrʉbhɨri rurya, bhakarumana kʉrʉkʉngʉ rwi inyumba ya Simʉʉni na Andureya. 34 Yɨɨsu akahorya abhaatʉ bhaaru bhanʉ bhaarɨ na amarwɨrɨ gʉgʉʉsi. Na akaruusha amasambwa maaru, nawe ataarɨ aragatiga amasambwa kʉbha gagambɨ, kʉ kʉbha gakamenya kʉbha ewe ni‑Mwana wa Mungu.
Yɨɨsu ararwazɨra abhaatʉ
(Ruuka 4:42‑44)
35 Mozengoko, Yɨɨsu akabhʉʉka, akaja ahagero hanʉ hataarɨ na abhaatʉ, akatanga kʉsabha. 36 Hanʉ Simʉʉni na abhakɨndichazɨ bhaabhwɨnɨ atarɨ munyumba, bhakaja komomohya. 37 Hanʉ bhaamubhwɨnɨ, bhakamʉbhʉʉrɨra, “Abhaatʉ bhʉʉsi bharakomohya!”
38 Akabhagarukirya, “Tujɨ mʉzɨmbɨri ɨzɨndɨ za haguhɨ na rʉnʉ, korereke nirwazɨyʉ, kʉ kʉbha niizirɨ komeremo giyo.” 39 Neho akahɨta mucharʉ chʉsi cha Gariraaya na kurwaza mʉmarwazɨrʉ gaabhʉ, na kuruusha abhaatʉ amasambwa.
Yɨɨsu arahorya ʉmʉʉtʉ we ebhegenge
(Mataayo 8:1‑4; Ruuka 5:12‑16)
40 Rusikʉ rʉmwɨ ʉmʉʉtʉ we ebhegenge akaja kwa Yɨɨsu. Akahigama, akamwisasaama, “Ʉraasɨɨgɨ, ʉratʉra kʉmbɨngukya!”
41 Yɨɨsu akamororera ɨbhɨgʉngi, akagorora okobhoko kwazɨ na kumukunʼyaku umurwɨrɨ, akamʉbhʉʉrɨra akabhuga, “Nɨsɨɨgirɨ. Bhɨngukibhwa!” 42 Rogendo rʉmwɨ ebhegenge bhɨkamurwɨku, akabhɨngʉka. 43 Yɨɨsu akamorecha kwa kumuruushaho bhwangʉ, 44 akamʉbhʉʉrɨra, “Ʉtagema kʉbhʉʉrɨra mʉʉtʉ ingʼana ryʉryʉsi. Nawe, nuujɨ wiiyeerekenʼye kwa kuhaani,†Kʉrɨngʼaana ni imigirʉ ja Musa, kuhaani newe aarɨ aramenyeekererya kʉbha ʉmʉʉtʉ abhɨngukiibhwɨ ebhegenge. Rora Abharaawi 14:1‑32; Amahiityʉ gi Imigirʉ 24:8. Kʉmaragɨrɨra bhʉkʉngʼu, rora ringʼana abhakuhaani muKiniibhasa. na uhuruchɨ ikimweso‡Ikimweso. Kʉmaragɨrɨra bhʉkʉngʼu, rora Ikiniibhasa. chʉ ʉkʉbhɨngukibhwa kwazʉ, chɨmbu Musa aaswajiryɨ, kwerecha abhaatʉ kʉbha ʉbhɨngukiibhwɨ.” 45 Nawe, ʉmʉʉtʉ wurya akabhʉʉka harya, akatanga kʉraarɨka habhwɨrʉ ringʼana ryʉ ʉkʉhʉribhwa kwazɨ. Igʉrʉ wa gayo, Yɨɨsu akatamwa kusikɨra habhwɨrʉ mʉzɨmbɨri zʉzʉʉsi zirya. Akiikara umwene hagarɨ igʉtʉ wa zɨmbɨri, nʉʉrʉbhu abhaatʉ kurwa mbaara zʉʉsi bhaarɨ bharamujaku.
*1:1 Kiriisitʉ. Kʉmaragɨrɨra bhʉkʉngʼu, rora Ikiniibhasa.
†1:1 Umwana wa Mungu. Kʉmaragɨrɨra bhʉkʉngʼu, rora Ikiniibhasa.
‡1:2 Rora Maraaki 3:1.
§1:3 Rora Isaaya 40:3.
*1:6 Zengebho zɨnʉ Yoohana aarɨ akwibhoha, zaarɨ ncha zʉ ʉmʉrʉʉtɨrɨri Ɨɨriya. Rora 2 Abhatɨmi 1:8.
†1:7 Arɨɨbhɨ umugini arasikɨra munyumba, mbʉʉsa wi iyaasɨ bhʉkʉngʼu aarɨ aramuruusha ibhikwɨra na kwoja amagʉrʉ gaazɨ.
‡1:8 Ekoro Ɨndɨndu. Kʉmaragɨrɨra bhʉkʉngʼu, rora Ikiniibhasa.
§1:13 Shɨtaani. Kʉmaragɨrɨra bhʉkʉngʼu, rora Ikiniibhasa.
*1:13 Bhamaraika. Kʉmaragɨrɨra bhʉkʉngʼu, rora ringʼana maraika muKiniibhasa.
†1:15 Ʉbhʉtɨmi bhwa Mungu. Kʉmaragɨrɨra bhʉkʉngʼu, rora Ikiniibhasa.
‡1:21 Urusikʉ rwʉ ʉbhʉtʉʉrʉ. Kʉmaragɨrɨra bhʉkʉngʼu, rora Ikiniibhasa.
§1:21 Rirwazɨrʉ. Kʉmaragɨrɨra bhʉkʉngʼu, rora Ikiniibhasa.
*1:22 Abhiija bhi imigirʉ. Kʉmaragɨrɨra bhʉkʉngʼu, rora Ikiniibhasa.
†1:44 Kʉrɨngʼaana ni imigirʉ ja Musa, kuhaani newe aarɨ aramenyeekererya kʉbha ʉmʉʉtʉ abhɨngukiibhwɨ ebhegenge. Rora Abharaawi 14:1‑32; Amahiityʉ gi Imigirʉ 24:8. Kʉmaragɨrɨra bhʉkʉngʼu, rora ringʼana abhakuhaani muKiniibhasa.
‡1:44 Ikimweso. Kʉmaragɨrɨra bhʉkʉngʼu, rora Ikiniibhasa.