Ubhwɨrɨkibhwa
bhwa Yoohana
Ʉbhʉkangati
Ɨkɨtabhʉ kɨnʉ kɨkaandɨkwa na Yoohana. Hanʉ Yoohana aandikirɨ ɨkɨtabhʉ kɨnʉ, aarɨ mwiginga rɨnʉ rikubhirikirwa Paatimʉ. Riginga riyo rɨkakorwa ncha ho okobhohera. Kɨragambɨra ʉbhʉrʉʉti bhʉnʉ Yoohana ɨɨrɨchibhwɨ hanʉ aarɨ abhʉhirwɨ mwiginga. Ribhaga riyo Abhakiriisitʉ bhaarɨ bharanyaaka bhʉkʉngʼu na Yoohana akatumwa Paatimʉ.
Yoohana akaandɨka ɨkɨtabhʉ kɨnʉ korereke abhahɨ umwʉyʉ Abhakiriisitʉ bhiisiriryɨ Yɨɨsu na kʉbhaha ubhwisɨgi kʉbha ribhaga ryʉ ʉkʉgarʉka kwa Yɨɨsu rɨraariirɨ. Akaandɨkɨra Abhakiriisitʉ bhʉʉsi na abhaatʉ bha mʉmasengerero muhungatɨ kukisikʉ cha 2 na 3. Akabhabhʉʉrɨra bhiigumiriryɨ kʉ kʉbha zɨnyaakʉ zɨnʉ zaabhabhwɨnɨ ni zi ibhaga isuuhu, nɨ ɨtɨnɨrʉ Mungu arabhatema abhabhisa bhaabhʉ bhʉʉsi.
Yɨɨsu akeerecha Yoohana amangʼana ganʉ gʉʉsi, kʉhɨtɨra ekerooto arɨ amɨɨsʉ. Amangʼana maaru mʉkɨtabhʉ kɨnʉ, garɨɨrɨkɨnibhwa kwi ibhyɨrɨkɨnʼyʉ. Mukisikʉ chʉ ʉbhʉtangɨ, Yoohana ararora bhegero muhungatɨ bhyɨ ɨzahaabhu bhyʉ ʉkʉtʉʉrɨra ɨbhɨmʉrɨ. Ribhaga ɨrɨndɨ, tʉrabhuurirwa enzobhooro ye ebhegero bhɨnʉ, ɨkɨmwɨ chaho kiriimɨɨrɨrɨra risengerero rɨmwɨ.
Ɨkɨtabhʉ chu Ubhwɨrɨkibhwa kɨragambɨra ɨtɨnɨrʉ ya ribhaga, Yɨɨsu arahiza bhʉʉsi, na bhanʉ bhʉʉsi bhakumwisirirya bhariikara nawe kemerano.
1
Yoohana aragamba igʉrʉ wɨ ɨnyarʉbha yɨnʉ
1 Ubhwɨrɨkibhwa bhwa Yɨɨsu Kiriisitʉ, bhʉnʉ aahɨɨrwɨ na Mungu, abheereche abhahocha bhaazɨ amangʼana ganʉ gaarɨ gareenderwa gahʉrʉkɨ bhwangʉ. Yɨɨsu wʉʉsi akatʉma maraika waazɨ koreeta ukuhumburwa kuyo, komohocha waazɨ Yoohana. 2 Yoohana akamenyeekererya amangʼana gʉʉsi ganʉ aarʉʉzɨ. Amangʼana ganʉ aarʉʉzɨ nɨ‑ga amaheene, neyo ɨngʼana ya Mungu, yɨnʉ ɨrɨkiibhwɨ na Yɨɨsu Kiriisitʉ.
3 Hakɨrɨku abhaatʉ bhʉʉsi bhanʉ bhakʉbhasomera abhakɨndichabhʉ amangʼana gayo gʉ ʉbhʉrʉʉti. Naatu arabhahaka bhanʉ bhakwitegeerera nu ukugwata ganʉ gaandikirwɨ mʉnʉ, kʉ kʉbha ribhaga rya amangʼana ganʉ rɨraariirɨ kuhika.
Amakeerenʼya
4 Inyɨ Yoohana nɨrabhaandɨkɨra ɨnyarʉbha yɨnʉ abhahɨmba bha Yɨɨsu bha amasengerero muhungatɨ ganʉ gari mucharʉ cha Asiya Isuuhu.*Asiya Isuuhu neyo ɨɨsɨ yɨnʉ reero ikubhirikirwa Bhuturuki.
Ɨbhɨgʉngi no omorembe kurwa kwa Mungu wʉnʉ areho, aarɨ kʉbhaho na wʉnʉ akuuza, hamwɨmwɨ na zekoro muhungatɨ zɨnʉ zɨrɨ mʉbhʉtangɨ bhwi ikitumbɨ chazɨ chɨ ɨkɨtɨmi, 5 na Yɨɨsu Kiriisitʉ. Yɨɨsu wʉʉsi, ne‑momenyeekererya moheene. Aarɨ we embere kuryukurwa nʉ ʉmʉtɨmi wa abhatɨmi bhʉʉsi kʉʉsɨ.
Akumibhwɨ Yɨɨsu! Ewe atʉsɨɨgirɨ akatwigʉrɨra kurwa mʉbhʉbhɨ bhwɨtʉ kwa kukwa igʉrʉ wɨɨtʉ. 6 Akatokora tʉbhɨ ʉbhʉtɨmi bhwa bhakuhaani tomohokerye Mungu, Wiisɨ. Ʉbhʉgʉngʉ nʉ ʉbhʉnaja bhʉbhɨ kwewe Yɨɨsu kemerano! Garamɨ.
7 Morore, araaza na amasaarʉ!
Abhaatʉ bhʉʉsi bharamorora,
na bhanʉ bhaamʉsʉmirɨ.
Abhaatʉ bhɨ ɨbhɨgambʉ bhyʉsi kʉʉsɨ
bhariikara ubhwʉyʉ igʉrʉ waazɨ.†Rora Zaakariya 12:10.
Heene ɨrabhabhu, garamɨ.
8 “Inyɨ niinyɨ Isimʉka nɨ Ɨtɨnɨrʉ,”‡Isimʉka nɨ Ɨtɨnɨrʉ kuKigiriki ni‑Arufa na Omeega. arabhuga Ʉmʉkʉrʉ Mungu, wʉnʉ areho, aarɨ kʉbhaho na wʉnʉ akuuza, Mungu wʉ Ʉbhʉnaja Bhwʉsi.
Yoohana ararora ʉbhʉrʉri bhwʉ ʉbhʉtangɨ
9 Inyɨ Yoohana, umuhiiri waanyu, nɨragwatana na niimwɨ kʉnyaaka, na kwigumirirya igʉrʉ wa Yɨɨsu nʉ ʉbhʉtɨmi bhwazɨ. Inyɨ nɨkaheebherwa mwiginga rɨnʉ rikubhirikirwa Paatimʉ, kʉ kʉbha yu ukurwaza ɨngʼana ya Mungu, na kuhurucha ekemenyeekereryo cha Yɨɨsu. 10 Urusikʉ rwʉ ʉbhʉtangɨ rwi inyuma,§Urusikʉ rwʉ ʉbhʉtangɨ rwi inyuma kʉBhayaahudi ni‑Jumapiri. Ekoro Ɨndɨndu*Ekoro Ɨndɨndu. Kʉmaragɨrɨra bhʉkʉngʼu, rora Ikiniibhasa. ɨkansikɨra. Rogendo rʉmwɨ inyuma waanɨ nikiigwa riraka ikʉrʉ rɨnʉ rɨkʉrɨra ncha rihembe. 11 Riraka riyo rɨkabhuga, “Yaandɨka mʉkɨtabhʉ amangʼana gʉʉsi ganʉ ʉraarore. Akʉmara ʉtʉmɨ ɨkɨtabhʉ kiyo kʉmasengerero ganʉ garɨ kʉzɨmbɨri muhungatɨ: Efeeso, Simurina, Pɨrigaamʉ, Tiyatiira, Saridi, Firadɨrifiya na Raʉdikiya.”
12 Nikiichʉra korora wʉnʉ aagambɨɨnɨ na niinyɨ, nɨkarora ɨbhɨkʉngʉ muhungatɨ bhyɨ ɨzahaabhu bhyo okoteera ɨkɨmʉrɨ. 13 Gatɨgatɨ wɨ ɨbhɨmʉrɨ bhiyo, nɨkarora ʉmʉʉtʉ nchu Umwana wʉ Ʉmʉʉtʉ.†Umwana wʉ Ʉmʉʉtʉ ni‑riina ɨrɨndɨ rya Yɨɨsu. Kʉmaragɨrɨra bhʉkʉngʼu, rora Ikiniibhasa. Rora Danyɨri 7:13. Ibhʉhirɨ ɨkanzʉ ɨndɨɨhu no omokena mʉgarɨ gwɨ ɨzahaabhu kukikubha. 14 Zinzwɨrɨ zaazɨ zaarɨ nzɨrʉ ncha amabhuri amɨɨrʉ. Naatu nzɨrʉ za pee ncho omosoke! Amɨɨsʉ gaazɨ gakabharya ncho omorero. 15 Amagʉrʉ gaazɨ gaarɨ nchɨ ɨshabha yɨnʉ yʉkiibhwɨ momorero. Riraka ryazɨ ryarɨ ncha amanzi amaaru ga mʉkɨtaarʉ kɨnʉ kikuruma. 16 Aarɨ ana zenzota muhungatɨ kokobhoko ku ubhuryʉ. Ɨpanga ɨhaari yɨ ɨkɨnyamɨɨnʉ ɨkarwa mumunywa gwazɨ. Ubhushʉ bhwazɨ bhwarɨ bhʉrabharya nchɨ ɨmɨrɨngɨɨri ji iryʉbha rye endekeera.
17 Hanʉ namʉrʉʉzɨ, nɨkagwa mʉmagʉrʉ gaazɨ nchu umuku. Nawe akanyiikarya ʉrʉbhaara rwazɨ rwu ubhuryʉ na kubhuga, “Ʉtʉʉbhaha! Inyɨ ni‑Simʉka nɨ Ɨtɨnɨrʉ. 18 Niinyɨ ʉmʉhʉru! Naarɨ nikuurɨ, nawe nangʉ rora, mʉhʉru nɨrɨ kemerano. Ninu uruhunguru rwu uruku na nyaari.‡Nyaari. Kʉmaragɨrɨra bhʉkʉngʼu, rora Ikiniibhasa.
19 “Nangʉ yaandɨka amangʼana ganʉ ʉrʉʉzɨ, ganʉ gareho na ganʉ garaakorwe ribhaga ɨrɨndɨ. 20 Ʉkarora zenzota muhungatɨ kokobhoko kwanɨ ku ubhuryʉ nɨ ɨbhɨkʉngʉ muhungatɨ bhyɨ ɨzahaabhu bhyo okoteera ɨkɨmʉrɨ. Nangʉ nikwereche enzobhooro ya zimbisi zɨnʉ: ɨbhɨkʉngʉ bhirya bhyɨ ɨzahaabhu bhyo okoteera ɨkɨmʉrɨ nɨ‑masengerero muhungatɨ, na zenzota muhungatɨ zirya, nɨ‑bhamaraika§Bhamaraika. Kʉmaragɨrɨra bhʉkʉngʼu, rora ringʼana maraika muKiniibhasa. bhaabhʉ.”
*1:4 Asiya Isuuhu neyo ɨɨsɨ yɨnʉ reero ikubhirikirwa Bhuturuki.
†1:7 Rora Zaakariya 12:10.
‡1:8 Isimʉka nɨ Ɨtɨnɨrʉ kuKigiriki ni‑Arufa na Omeega.
§1:10 Urusikʉ rwʉ ʉbhʉtangɨ rwi inyuma kʉBhayaahudi ni‑Jumapiri.
*1:10 Ekoro Ɨndɨndu. Kʉmaragɨrɨra bhʉkʉngʼu, rora Ikiniibhasa.
†1:13 Umwana wʉ Ʉmʉʉtʉ ni‑riina ɨrɨndɨ rya Yɨɨsu. Kʉmaragɨrɨra bhʉkʉngʼu, rora Ikiniibhasa. Rora Danyɨri 7:13.
‡1:18 Nyaari. Kʉmaragɨrɨra bhʉkʉngʼu, rora Ikiniibhasa.
§1:20 Bhamaraika. Kʉmaragɨrɨra bhʉkʉngʼu, rora ringʼana maraika muKiniibhasa.