18
Ʉrʉbhɨri rwa Bhaabhɨɨri rugwirɨ
1 Hanʉ gayo gaahitirɨ, nɨkarekera amɨɨsʉ nɨkarora maraika ʉwʉndɨ ariika kurwa mwisaarʉ. Aarɨ nʉ ʉbhʉnaja bhʉkʉrʉ, nɨ ɨɨsɨ ɨkabhanza nu ubhwɨrʉ bhwazɨ. 2 Akatiirya riraka ikʉrʉ bhʉkʉngʼu, arabhuga,
“Rugwirɨ! Ʉrʉbhɨri ʉrʉkʉrʉ rwa Bhaabhɨɨri*Bhaabhɨɨri rwarɨ ʉrʉbhɨri kʉʉsɨ ya Mesopotaamiya. Abhaatʉ bhʉ ʉrʉbhɨri ruyo bhaarɨ bharasengera amasambwa na amabhirʉbhirʉ. Rora Danyɨri 3:5‑7. Mʉkɨtabhʉ chu Ubhwɨrɨkibhwa, Bhaabhɨɨri iriimɨɨrɨrɨra abhabhisa bhʉʉsi bha Mungu. Rora Ubhwɨrɨkibhwa 14:8, 16:19, 17:5. rugwirɨ!
Nangʉ rʉbhɨɨrɨ nɨ‑hagero hu ukwibhisa
zeteemwa zʉʉsi za amasambwa.
Rʉbhɨɨrɨ nɨ‑hagero hi ibhinyunyi ibhibhuruuru bhyu ukwigatanʼya.
3 Rugwirɨ kʉ kʉbha abhaatʉ bhi ibhyarʉ bhyʉsi
bhakanywa amarwa gaazɨ,
bhagwatirwɨ ne ebhoono ɨhaari yɨ ɨtaarʉ yaazɨ
abhatɨmi bhɨ ɨɨsɨ bhaarɨ bhamʉsaanirɨ.
Abhasuruja bha kʉʉsɨ
bhakaniibha igʉrʉ wu ubhwaru bhwi ikiniibhʉ chazɨ.”
4 Neho nikiigwa riraka ɨrɨndɨ kurwa kwisaarʉ, rɨrabhuga,
“Abhaatʉ bhaanɨ, murwɨ kwewe,
korereke mʉtagwatana nawe kokora ʉbhʉbhɨ bhwazɨ
na korereke mʉtatuurwa ɨnyaakʉ nawe.
5 Ʉbhʉbhɨ bhwazɨ bhʉbhɨɨrɨ bhwaru,
bhuhikirɨ na mwisaarʉ.
Mungu ahiitirɨ amahocha gaazɨ amabhɨ.
6 Chɨmbu aabhakʉrɨɨrɨ abhandɨ, na niimwɨ momokorere muyomuyo.
Na akorerwe manga abhɨrɨ ya amabhɨ ganʉ aabhakʉrɨɨrɨ abhandɨ.
Mogege ekekombe chazɨ,
mʉmʉtʉʉrɨrɨmu manga kabhɨrɨ yʉ ʉbhʉhaari bhʉnʉ aabhakʉrɨɨrɨ.
7 Momohe ɨnyaakʉ nʉ ʉbhʉrʉrʉ chɨmbu akwiheema,
kʉrɨngʼaana nu ubhwikari bhwazɨ bhwa mangʼana ga kʉʉsɨ.
Ariirora arabhuga,
‘Niikɨɨrɨ hanʉ marikiya, nɨtarɨ umukwirwa,
Nɨtakurumɨka nʉʉrʉ hasuuhu!’
8 Igʉrʉ wa gayo arabhona amacha gʉʉsi rusikʉ rʉmwɨ,
amacha gu uruku, gɨ ɨkɨrɨrʉ na gɨ ɨnzara.
Ararichwa no omorero,
kʉ kʉbha Ʉmʉkʉrʉ Mungu wʉnʉ akʉmʉtɨnɨra anʉ ʉbhʉnaja.”
9 Abhatɨmi bhɨ ɨɨsɨ bhanʉ bhakosebheeta nawe na kugwatana ubhuniibhi bhwazɨ, bhararɨra na kwarama ʉrʉbhɨri rurya hanʉ bharaarore umwʉki gu ukurika kwawe. 10 Bhariimɨɨrɨra kore nʉ ʉrʉbhɨri ruyo ku kwʉbhaha ɨnyaakʉ yaazɨ. Bhararɨra bharabhuga, “Horeera, horeera ʉrʉbhɨri ʉrʉkʉrʉ Bhaabhɨɨri, ʉrʉbhɨri rwa amanaga! Ɨtɨnɨrʉ yaazʉ ihikirɨ kwa bhwangʉ bhʉkʉngʼu.”
11 Abhasuruja bha kʉʉsɨ bharamʉrɨrɨra na kumwaramɨra, kʉ kʉbha bhatareeho abhaatʉ bhʉ ʉkʉgʉra ebhegero bhyabhʉ. 12 Atareeho ʉmʉʉtʉ naatu wʉ ʉkʉgʉra ebhegero bhyabhʉ bhyɨ ɨzahaabhu, zimpirya, ruuru na amabhwɨ gu ubhwera. Atareeho ʉmʉʉtʉ wʉ ʉkʉgʉra zengebho zɨnzʉmu za zambaraawɨ, za hariri na zi imbiriiri. Atareeho ʉmʉʉtʉ wʉ ʉkʉgʉra ebhegero bhyɨ ɨmɨtɨ ju ubhwera, nʉʉrʉ ebhegero bhɨnʉ bhɨkʉrirwɨ na zehembe, bhya amatɨ ga riguri, nʉʉrʉ bhyɨ ɨshabha, ichʉma hamwɨ marumaru. 13 Atareeho ʉmʉʉtʉ wʉ ʉkʉgʉra ʉmʉdarasiini, ɨbhɨrʉngʉ, umurumbasʉ, manɨmanɨ, nʉʉrʉ idivaayi, amaguta gʉ ʉmʉzɨyituuni, ubhutu ubhwɨrʉ nɨ ɨnganʉ. Na atareeho ʉmʉʉtʉ wʉ ʉkʉgʉra zengʼombe, zɨngʼʉndu, zɨfaraasi, zɨtʉrʉʉri yu ukurutwa na zɨfaraasi, bhambʉʉsa nʉʉrʉ ubhwikari bhwa abhaatʉ.
14 Abhasuruja bharabhuga, “Ebhegero bhɨnʉ waarɨ ukwigomba bhʉkʉngʼu bhiruureho. Bhyʉsi bhyɨ ɨkɨtɨrɨɨganʉ na bhyi ikiniibhi bhibhurirɨ. Bhɨtareeho na ʉtakʉtʉra kobhebhona kwikɨ.” 15 Abhasuruja bhanʉ bhakaniibha kwewe, bhariimɨɨrɨra kore ku ukwʉbhaha ɨnyaakʉ yaazɨ, bharaarama na kʉrɨra. 16 Bharabhuga, “Horeera, horeera, icharʉ ɨkɨkʉrʉ! Waarɨ wiibhʉhirɨ zengebho zɨnzʉmu bhʉkʉngʼu, za zambaraawɨ na zi imbiriiri. Waarɨ uriitonera kʉzahaabhu, amabhwɨ gu ubhwera ni iruuru. 17 Nawe ubhuniibhi bhuyo bhwʉsi bhurikiibhwɨ kwa bhwangʉ bhʉkʉngʼu.”
Abhakʉrʉ bhʉʉsi bhu ubhwatʉ, abhagɨndi bhʉʉsi, abhakangati bhu ubhwatʉ, na abhahocha bhe emeremo bhʉʉsi bhu ubhwatʉ, bhariimɨɨrɨra kore. 18 Hanʉ bhaarʉʉzɨ umwʉki gwu ukurika kwawe, bhakarɨra kwiraka bharabhuga, “Rʉtareeho ʉrʉbhɨri ʉrʉndɨ nchʉ ʉrʉbhɨri ʉrʉkʉrʉ rʉnʉ!” 19 Bhakarɨra na kwarama, bhakiiyitɨrɨra urutu kumitwɨ na kʉgamba, “Horeera, horeera, ʉrʉbhɨri ʉrʉkʉrʉ! Rʉkatokora itwʉsi bhu ubhwatʉ tʉbhɨ abhaniibhi igʉrʉ wu ubhuniibhi bhwazɨ. Nawe ʉrʉbhɨri rwʉsi rurikirɨ kwa bhwangʉ bhʉkʉngʼu.”
20 Mozomerwe igʉrʉ waazɨ, imwɨ bhanʉ mukwikara mwisaarʉ. Mozomerwe abharɨndu bha Mungu, abhatumwa na abharʉʉtɨrɨri, kʉ kʉbha Mungu atiniirɨ ʉrʉbhɨri ruyo kʉgarya rwabhakʉrɨɨrɨ.
21 Akʉmara maraika wʉmwɨ wa amanaga, akanʉnga riibhwɨ ryangɨ ʉrʉbhwɨ, akarɨtaasha mʉnyanza, akabhuga,
“Kwa amanaga maaru chɨmbu,
ʉrʉbhɨri ʉrʉkʉrʉ rwa Bhaabhɨɨri rʉrataashibhwa na kʉbhʉra kɨmwɨ.
22 Mucharʉ muyo bhatakwigwa kwikɨ
riraka rya abhaatʉ kwɨmba,
kotema endono, ekereere hamwɨ rihembe.
Atakʉbhaho mʉkaari wa teemwa yʉyʉʉsi,
bhatakwigwa nʉʉrʉ ʉrʉbhwɨ rʉrasha kwikɨ.
23 Hayo hatakwaka ɨkɨmʉrɨ
na kʉtakʉbha ni iraka rya mukwɨri nʉʉrʉ rya muryakari.
Ʉrʉbhɨri rwa Bhaabhɨɨri rʉrakorwabhu,
kʉ kʉbha abhasuruja bhayo
bhaarɨ abhaatʉ abhakʉrʉ bhɨ ɨɨsɨ,
na kʉ kʉbha ibhyarʉ bhyʉsi
bhɨkangiriibhwɨ nʉ ʉbhʉrʉgi bhwʉ ʉrʉbhɨri ruyo.
24 Mʉrʉbhɨri muyo gakarorekana amasaahɨ ga abharʉʉtɨrɨri
na amasaahɨ ga abharɨndu bha Mungu,
hamwɨmwɨ na amasaahɨ ga abhaatʉ bhʉʉsi bhanʉ bhiitirwɨ kʉʉsɨ.”
*18:2 Bhaabhɨɨri rwarɨ ʉrʉbhɨri kʉʉsɨ ya Mesopotaamiya. Abhaatʉ bhʉ ʉrʉbhɨri ruyo bhaarɨ bharasengera amasambwa na amabhirʉbhirʉ. Rora Danyɨri 3:5‑7. Mʉkɨtabhʉ chu Ubhwɨrɨkibhwa, Bhaabhɨɨri iriimɨɨrɨrɨra abhabhisa bhʉʉsi bha Mungu. Rora Ubhwɨrɨkibhwa 14:8, 16:19, 17:5.