Kotäkka pewi maŋpäpäŋ nämo yäwen. Gera taŋigän, womat mämä ude yäŋpäŋ ämawebenaye, Jekop täŋo äbotken nanik momi ba kädet wakini unita kaŋ yäwet.

2 Uwä ŋode näwet täkaŋ; Nin kepma kepma gäk ganiŋoret täkamäŋ. Ba gäkŋo kädetka täga nadäna tärewäpäŋ u iwatta gäripi pähap nadäk täkamäŋ yäŋ yäk täkaŋ.

Ba näkä baga man siwoŋi yäwoŋärekta näwet yabäk täk täkaŋ. Ba gäk dubikaken kukta gärip pähap nadäk täkamäŋ yäŋ yäk täkaŋ.

Upäŋkaŋ jop manman yäk täkaŋ.

3 U ŋode näwet täkaŋ; Ekäni, gäk ganiŋ oretta nakta jop it täkamäŋ upäŋkaŋ imata nämo nibäk täyan? Ba ninin yäpmäŋ äpäŋpäŋ kuŋaritna gäk imata nämo nadäŋ nimik täyan?

Ude yäŋirä näkä kowata ŋode yäwetkut; Ude nämo. In naniŋ orerit injinken gäripjin iwatpäŋ täŋit täk täkaŋ yäk. Ba epän ämajiyeta komi yämik täkaŋ yäk.

4 Naniŋ oretta yäk täkaŋ upäŋkaŋ täktäkjin u inipärik. U ŋode; Man wärät-wärät täŋpäŋ ketjin mugwäjiŋpäŋ notjiye däpmäk täkaŋ. Ude täŋkaŋ näkken yäŋapik man yäŋirä täga nämo api nadäŋ tamet.

5 Jide? Näk naniŋ oretoret kädet iwat täkaŋ uwä nadäŋ nimik täyak yäŋ nadäk täkaŋ?

Tek wakiwaki täŋkaŋ butewaki iŋam dapun ijiŋpeŋ kuŋaritna Yawetä bänep täga nadäŋ nimän yäŋ nadäk täkaŋ? Kudän udewani uwä naniŋ oretoret kädet bureni yäŋ nadäk täkaŋ?

Nämoinik! Kudän udewanita gäripi nämo nadäk täyat.

6 *Mat 25:34-40; Jem 1:27, 2:15-16; 1Jo 3:17-18 Täŋ näkä kudän ŋodewanita nadäŋira naniŋ oretoret kädet bureni täk täyak;

Äma, äma ätu täŋo komi piä terak it täkaŋ unitäŋo bäräpi ketäreŋ yämiŋpäŋ kädet tägatäga täŋ yämik täkot.

7 *Mat 25:35 Ba äma nakta yeŋirä ketem yämik täkot. Ba äma jäwäri, patpat bägupta wäyäkŋek täkaŋ udewani yämagut yäpmäŋ injin yotken ärok täkot. Ba äma teki nämota tek yämik täkot. Ba nägät moräkjiyetä bäräpi kaŋ-ahäŋirä mäde nämo ut yämineŋ.

8 *Sam 112:4; Apos 10:31,35 Täŋ intä kudän udewani näkä gäripi nadäk täyat u tänayäŋ täŋo uwä näkä bäräpijin bäräŋek api datäreŋ tamet, tamimaŋ täŋo peŋyäŋektä bipani täŋo bipmäŋ urani iwat kirek täyak ude. Ude täŋira säkgämän api itneŋ.

Täŋkaŋ Anutujin siwoŋitä intäjukun api täŋ tamek, ba Yawejin täŋo kehäromitä mädejinken watä api it tamek. 9 *Sam 34:15 Täŋpäkaŋ intä näkken yäŋapik man yänayäŋ täkaŋ uwä api nadäŋ tamet. Inä ämata komi yämik-yämik, ba wäpi yäpmäŋ äpäk-äpäk ba yäŋärok man yäwet-yäwet kädet u mäde ut yäminayäŋ täŋo uwä ude api täŋ tamet yäk.