1 *Mat 11:5; Luk 7:22 Yawetä näk äma jopi jäwäri manbiŋam tägagämän yäŋahäŋpäŋ yäwetta iwoyäŋpäŋ olip gakŋi piŋ näbatkuko unita ŋode nadätat; Ekäni Yawe täŋo Munapiktä näk magätak. Täŋpäŋ Yawe uwä ŋode täkta nepmaŋpän kuŋkut; Ämawebe butewaki nadäwätäk terak kuŋarani u bänepi yäpätägakta, ba äma komi piä terak irani ŋode yäwetta; Anututä täŋkentäŋ tamiŋirän jop api äpämaŋ kuneŋ. 2 *Mat 5:4; Luk 4:18-19 Ba ŋode yäŋahäŋpäŋ yäwetta nepmaŋpän kuŋkut; Yawe Anututä ämawebeniye oraŋ yämiŋpäŋ iwaniye däpmäkta kadäni ahätak. Täŋkaŋ ämawebe täŋbute täŋtäŋ kuŋarani u yäniŋ kawatakta naniŋ kireŋkuk. 3 Bureni, Saion ämawebe konäm butewaki terak itkaŋ u täŋkentäŋ yämiŋira butewakini paoränkaŋ oretoret api täneŋ. Ba täŋkentäŋ yämiŋira butewaki kap peŋpäŋ oretoret kap api teneŋ. Täŋkaŋ ämawebe uwä päya kehäromi Yawetä ini piwani bumik api itneŋ. Uwä kehäromigän itkaŋ kudän siwoŋi täŋpeŋ api kuŋatneŋ. Ude täŋpeŋ kuŋatnayäŋ täŋo uwä Anutu täŋo mebäri säkgämän kwawak irirä api iniŋ oretneŋ.

4 Täŋpäkaŋ ämawebe inä yot yäpmäŋ äreyäwani u äneŋi api täŋkodak utneŋ. Ba yotpärare waŋkuŋo u äneŋi kome ket utpäŋ api yäpä-täganeŋ. 5 Täŋkaŋ äma ban naniktä äbä yawakjiye watäni api it yämineŋ. Ba äma kome kubäken naniktä äbäŋpäŋ ketem epänkät wain epänjin api täŋ tamineŋ. 6 *Kis 19:6; Rom 12:1; 1Pi 2:5,9; Rev 1:6 Täŋpäkaŋ kadäni uken irit mebäri kubä api itneŋ. Inta Yawe täŋo bämop äma, ba Anutu täŋo watä äma yäŋ ude api täwetneŋ. Täŋkaŋ äma äbot komeni komeni täŋo tuŋum terak itkaŋ moneŋ tuŋum unita biŋam api yäneŋ.

7 *Sam 16:11; 2Te 2:16 Täŋpäkaŋ mäyäk terak itkuŋo upäŋkaŋ komejinken äneŋi itkaŋ bian itkuŋo u irepmitpäŋ ahäŋ bumbum terak api itneŋ. Bureni, jiraŋ ude itkuŋo upäŋkaŋ oretoret tärek-täreki nämo api täneŋ.

8 U imata, Yawe näkä kudän siwoŋita gäripi nadäk täyat. Iwantä ämawebenaye täŋyäkŋarani täŋpäŋ imakani kubota täŋ yämiŋkuŋo unita gaŋani pähap nadäk täyat. Unita yäŋkehärom taŋkuro udegän ämawebenayeta gwäki täga yämiŋpäŋ ukät topmäk-topmäk tärek-täreki nämo api täŋpet. 9 Ude täŋ yämiŋira äma komeni komenitä kodakiniye täŋo biŋam api nadäneŋ. Bureni, ämawebe komeni komeni äbotnaye u yabäŋpäŋ-nadänayäŋ täkaŋ uwä ŋode api yäneŋ; Äma äbot ŋo Yawetä iron taŋi täŋ yämani yäk.

10 *Rom 5:10; Plp 3:9; Rev 7:14 Täŋpäkaŋ Jerusalemtä ŋode yäyak; Yaweta gäripi pähap nadäk täyat. Bänepnatä Anutunata oretoret täŋ imik täyat. U imata, u nämagutkuko unita. Unitäŋo täktäki siwoŋitä tek säkgämän ude täŋ namik täyak. Ba unitäŋo täŋkentäktä ämawebe kodakitä epnayäŋ tek epmäget säkgämän täk täkaŋ ude täŋ namik täyak. 11 Bureni, kome terak päya dätäki imätpäŋ käruk abäk täkaŋ, ba epänken ketem tokän käruk tädot täkaŋ udegän Yawe ärowani täŋo meni jinom terak kudupi irit säkgämän api ahäneŋ. Täŋpäkaŋ äma äbori äbori iŋamiken iniŋ oretoret api ahäwek.