1 *2Kin 24:18-20; 2Sto 36:11-13 Juda täŋo intäjukun äma Sedekaia u obaŋ 4 komepak 5 ude intäjukun äma piä wäp yäpmäŋpäŋ irirän, eruk obaŋ u gänaŋ profet kubä Gibeon yotpärareken nanik wäpi Hanania, Asu täŋo nanaki unitä man kubä näwetkuk. Näk kudupi yot gänaŋ, bämop äma ba ämawebe iŋamiken irira ŋode näwetkuk; 2 Yawe kehäromi mähemi, Isrel täŋo Anutu u ŋode yäŋkuk; Babilon täŋo intäjukun äma unitäŋo kehäromini uwä yäpmäŋ äpäkinik täŋkuro unita komi piäjin u api tärewek. 3 Obaŋ yarä nämo täreŋirän kudupi yot täŋo tuŋum säkgämän Babilon täŋo intäjukun äma wäpi Nebukatnesatä kubo täŋpäŋ komeniken yäpmäŋ kuŋkuko u äneŋi api yäpmäŋ äbet. 4 Juda täŋo intäjukun äma wäpi Jekonaia, Jehoiakim täŋo nanaki ukät Juda ämawebe kuduptagän iwantä Babilon kome yäpmäŋ kuŋkuŋo u imaka, yäŋ-yäkŋat yäpmäŋ api äbet. Bureni, Babilon täŋo intäjukun äma unitäŋo kehäromi yäpmäŋ äpäkinik api täŋpet. Yawe näkä ude yäŋkehärom täyat.

5 Eruk, Hananiatä man ude yäŋirän nadäŋpäŋ profet Jeremaiatä Yawe täŋo yot gänaŋ bämop äma ba ämawebe kudup itkuŋo u iŋamiken ŋode yäŋkuk; 6 Tägagämän yäyan yäk. Yawetä yäyan udegän kaŋ pewän ahäwut. Kudupi yot täŋo tuŋum, ba ämawebe Babilon naniktä yäŋ-yäkŋat yäpmäŋ komeniken kuŋkuŋo u äneŋi kaŋ yäpmäŋ äbän yäŋ nadätat. 7 Upäŋkaŋ apiŋo gäkŋa ba ämawebe kudup näkä man kubä yäwayäŋ täyat ŋo juku peŋpäŋ nadäkot! 8 Näk ba in nämo iritna profet bian itkuŋonitä it yäpmäŋ äbäkaŋ u profet man ŋode yäŋkuŋ; Ämik, tagwän irit ba käyäm wakiinik unitä ahäŋkaŋ ämawebe komeni komeni ba äbot kehäromi nikek mäyap api täŋpän waneŋ yäŋ yäŋkuŋ. 9 Täŋ profet kubätä säkgämän irit täŋo profet man yäweko uwä imaka unita yäweko u bureni ahäŋirän uyaku ŋode täga yäne; U profet bureni, Yawetä pewän äbani. Nämo täŋpäwä, nämo!