Jop
Äma täga kubä wäpi Jop uwä komi butewaki nadäŋkuk
38
Jop 38:1-11
Yawetä Jop iwet yabäk täŋkuk
1 *Mat 15:14; Rom 1:22; 1Ti 1:7, 6:4; 2Pi 2:12 Täŋpäkaŋ Yawetä mänit ibäm gänaŋ Jop kowata ŋode iwet yabäŋkuk;
2 Wa! Gäk äma jidewanitä näkŋo nadäk tawaŋta nadäwätäk täyan? Nadäŋ guŋguŋ täk täyan unita unitäŋo mebäri yäŋahätan?
3 Unita, gäk äma bureni itan u täŋpäwä akwikaŋ gäwet yabäk täŋira kowata kaŋ näwet.
4 *Stt 1:1; Hib 1:2,10 Eruk, gäk de kuŋariri kome pähap täŋo jäwäri peŋkut? Nadäwi tärewäwä kaŋ näwet!
5 Ba ŋode käwep nadätan? Kome unitäŋo taŋini netätä nadäwän tärewäpäŋ uterakgän täŋpäŋ peŋkuk? Ba netätä käroŋini kawän täreŋkuk?
6-7 Ba netätä kome täŋo beki äneŋirän guktä kaŋpäŋ meni kubägän peŋpäŋ kap teŋkuŋ? Ba netätä mobä pähap kome mebäriken peŋirän aŋerotä kaŋpäŋ oretoret terak gera yäŋkuŋ?
8 *Jer 5:22 Ba gwägu pähaptä kome täŋo koki gänaŋ nanik dätpeŋ äbäŋirän netätä äneŋi nämo äpmokta yäma ukätkuk?
9 Nadätan? Kadäni uken gwägu pähap uwä gubam kubiri kubiripäŋ tektä-yäŋ uwäk täŋkut.
10 Täŋkaŋ gwägu täŋo bagani peŋ yämiŋpäŋ yäma ukät iwatpäŋ täŋ-täpäneŋpäŋ peŋkut.
11 Täŋpäŋä ŋode iwetkut; Ärowani täŋkaŋ tokätpäŋ baga irepmitpeŋ ŋo käda nämo äben yäŋ iwetkut.