1-3 Wandakali minditupa-mane namba yapa lo tale puato, bala aposolo akali enene mindi ata napeya lalaini. Wuane leyai-kola, nambato utupanena pii okone yano peyoto, nambato Akali Andane Jisasa lee-mane andalu, yakamana tombenenga balana piape pimawua atewa-kola, yakama Kitisene wandakali guleai lalawane. Yakama Kitisene wandakali ateyai okomane namba aposolo akali enene mindi ateya lo andawa leya-kola, yakamato namba aposolo akali enene mindi ateyo nembo teyai okoni. Namba aposolo akali mindi atoto, mangene mindi pukale nembo tewando, nambato mangene okone katulo piyawane. *Ap 22:17-18; 26:16; 1Ko 15:8-9; 2Ko 3:2-3

4-7 Pitapi, aposolo akali waka tupapi, Akali Andane okona amene tupapi, utupane-mane Kitisene wanda kee lalu, utupane towa atu epoko pua atoto, Gotena piape pua atalaini. Banapasa nalipato wuane teke pipakale nembo tepa-yale, nalipato katulo wuane pepa-yale teke. Dee, akali apito ami piape puato, yole mia napene kondalanepe. Apito ee mindi yoko yandoto, ee okonena tomo mandu nanene kondalanepe. Apito bulumako kambua ati puato, utupanena andu ipane nanene kondalanepe. Wandakali-mane wuane na-piyaini. Tene okonena, wamba Banapasa nalipato Gotena piape pua atepale okonena, nalipato Kitisene wandakali tupa lamawuato, nalipa tomo ipapi nolane tupa nalipana yole gulo giyapape lepa-yale, mana okone katu lea-yale teke. Pee, nalipato angu piape waka mindi tako pua puato, yole moto, nalipana tomo nolane tupa kamboto, nape-penepe. *Lk 10:8-9

8 Nambato wandakali tupana nembo-tene tupa angu wato minuto, piape akali mindimane yole miape-pene leya lo yakamato nembo na-talapape. Gotena loo pepa pelene eya mindimane wuane teke leya. 9 Wamba Mosesato Gotena loo mindi pepa peyoto, yia bulumako mindimane balana kee-mane witi dini tupa ango andaku pua, nimbana piape pingeando, balato witi dini minditupa nolane nembo toto, nimbato balana nee asia oko yake pua tambuya naene kondape layene eya leaipia. Bulumako tupamane angu piape puato, yole meakale nembo toto, Goteto wuane leaipiape. Jia. *Lo 25:4; 1Ti 5:17-18

10 Balato nanima nembo toto, wuane leaipia. Ee yandoyale yuu ayalaini wandakali tupapi, tomo mandiyaini wandakali tupapi, nanima pitaka-mane yole molopeyama nembo toto, piape pua atalapale nayuto, Goteto loo okone yata ya-kola, Mosesato pii okone pepa peleaipia. *2Ti 2:6 11 Wuaneko, wamba Sailasa nalipato Gotena pii oko yakama languato, nalipa yakamana ee yandalapale akali gulo atepa okonena, nalipato tomo mandipakale nembo toto, yakamato yole giyapa laipa-yale, okone katu lapia-yale. *Lom 15:25-27

12 Andipa Gotena piape akali waka tupamane yakama moyoto, piape pua ateyai-kola, yakamato utupane yole maiyaini. Wuane pua teke, wamba nalipato yakama moyoto, Gotena piape pua atema okone angi, yakamato nalipa yole geai-yale, okone katu wete lapia-yale tekeko, yakamato yole giyapa nalepa. Jia. Wamba nalipato Jisasa Kataisana pii layene epene oko yakama langu atepa-angi, nalipato yole giyapa lepa-yale, yakamato yole gii napimakale nembo toto, pii okone nanima langi napene kondalu, pulupa lolaini nembo tepa. Yakamato nalipa kondalu pulupa lolaini nembo toto, nalipato yole giyapa nalene, minditaka kambua jia yo atoto, kenda-pene kambua awuato, Gotena pii oko yakama langu atepa. *Ap 20:34; 2Ko 11:7-9

13 Juta yame wandakali tupamane sipisipi tupapi, bulumako tupapi, okonetaka tupa Gote lo opa mayai-kola, pitisa akali tupamane minjuni minditupa Gotena alata toko okona yangoto, yakama tane minditupa tale pua neaini lo yakamato nembo nateyaipe. *Lo 18:1-3 14 Wuane pua teke, wamba Akali Andane okomane mana mindi yata wato, Kitisene wandakali tupamane Gote lo opa maulai-kola, Gotena pii layene epene lamai-yaini akali tupamane opa muni tupana minditupa yole moto, tomo kambo nape-pene leaipia. *Mt 10:7-10; Lk 10:6-7; Ga 6:6

15 Balato mana okone yata ya-kola, nambato yole miape-pene tekeko, nambato yakama moyoyale piape puato teke, yole mia na-piyawane loto, namba tanena gene oko laiyu lalawane. Wandakali mindimane namba yole guato, namba tanena gene oko laiyu lalawane asini okone pai lolane nembo toto, namba yole mia napene atoto, ulia yambai-mane omewandopi, okone katu leyo. Wuaneko, andipa yakamato namba yole giyapale nembo nateyo. Jia. Tene waka mindi ateya-kola, nambato yakamana pepa oko peyo epe leyo.

16-17 Wamba nambato Gotena pii layene epene oko wandakali tupa lamai napukale nembo tewa tekeko, Goteto piape oko namba gea-kola, nambato piape okone pua atewane oko mee pua ateyo. Nambato piape okone pua ata napene kondewando, kenda-pene andane mindi nambanga epolopeya. Wuaneko, nambato Gotena pii layene epene oko wandakali tupa lamaipe-pene guleya-kola, nambato lamawua teke ateyo. Tene okonena, nambato Gotena pii layene epene oko wandakali tupa lamai-yawane nembo toto, namba tanena gene oko laiyu lolane tene mindi ata napeya. Wuane tekeko, yakamato namba yole gimakale leyai-kola teke, nambato yole mia napukale loto, mee yakama moyoyale piape pua ateyo okonena, nambana yole waka mindi eya. *Jet 20:9 18 Nambana yole waka okone aki mindi eyape. Nambato yole miape-pene tekeko, namba yole mia napukale nembo toto, yole mia napene ato, mee wete Gotena pii layene epene oko wandakali tupa lamawua atalawane. Nambato wuane piyawane nembo toto, epele wete alawane okone nambana yole waka okone gulo eya.

19 Wandakali mindikipi mindimane nambana piape oko bosa lo ando ata napiyane tekeko, wandakali kambua wete Kataisana yame guleakale nembo toto, nambato yole mia napene atoto, wandakali pitaka moyoyale piape puato, Gotena pii layene epene oko lamai-yawane. 20 Wamba namba Juta yame wandakali tupa towa atu atewa-angi, nambato utupane molo-peke lokale nembo toto, utupanena mana tupa wato minu atewa. Namba tane Juta yamena loo tupana pangosa ata napewa tekeko, loo utupanena anda-pangosa ateaini wandakali tupa molo-peke lokale nembo toto, nambato wandakali utupane towa atu atewa okone angi, nambato Juta yamena loo tupana pangosa gulo atoto, loo utupane wato minu atewa. *Ap 21:20-26

21 Wandakali yame waka tupa Juta yamena loo tupana pangosa ata napeai-kola, nambato utupane towa atu atewa-angi, utupane molo-peke lokale nembo toto, Juta yamena loo tupa wato mina napewa. Wuane tekeko, nambato Gotena loo tupana pangosa atoto, Kataisana loo oko wato minu atewa. 22 Wandakali minditupa Kitisene tai gulo ata napene, mana mindi epene ya, mana mindi koo ya lo wayumane yapa lo tale napeai. Wuaneko, namba utupane towa atewa-angi, utupane molo-peke lokale nembo toto, namba akali okonepene teke gulo atewa. Nambato yame waka-waka utupane pitakana wandakali minditupa molo-peke lokale nembo toto, namba utupane towa atu ataka pewa okone angi, nambato utupanena mana waka-waka minalaini tupa wato minaka pewa. *2Ko 11:29 23 Gotena pii layene epene okomane wandakali waka tupa moyalane pua teke, balana pii okonemane nambapi moyakale nembo teyo. Wuaneko, wandakali-mane Gotena pii layene epene okone bilipi lapiai lakae lo nembo toto, nambato mangene utupane pitaka piyawane.

24-25 Akali mindimane pataisa koyalane mindi yata eya-kola, wandakali kambua-mane pataisa okone mia-makale nembo toto, asini tai wete lamakale loto, utupanena umbaini kuai lo bosa lo ando atoto, wayumane mandeke piyaini. Utupane pitaka asini tai lalaini tekeko, mindiki-mane angu sia minuto, pataisa okone mialane oko yakamato nembo nateyaipe. Goteto pataisa koya napiyane mindi yata eya-kola, nanimato pataisa okone mia-makale nembo toto, nanimana umbaini kuai lo bosa lo ando atoto, wayumane mandeke pua atape-pene. Pataisi okone mia-makale nembo toto, yakamato yakamana umbaini oko kuai lo bosa lo ando atoto, asini tai lalapape. *Pl 3:14; 2Ti 4:7-8; 2:3-5

26 Namba tane pataisa okone miawa lakae lo nembo toto, waka minditaka eya tupa andamo nena pua ata napene, asia oko angu andatawa atoto, asia tai wete lalawane. Akali minditupa-mane bokosene loto, kii momanga-mane mee aimo nena puato, akali mindoko peya na-piyaini tekeko, nambato Gotena piape oko puato, akali utupanena mana okone wato mina na-piyawane. Jia.

27 Nambato Gotena pii layene epene oko wandakali waka tupa lamawua atolowa-kola, utupane-mane pataisa Goteto gukale leya okone katulo molopeyai. Wuane tekeko, namba tane pataisa okone mia napuluwane nayuto, nambato nembo teyo pua nambana umbaini okomane peakale nayuto, nambana umbaini oko wayumane wete bosa lo ando atalawane. *Lom 8:12-13; 13:14