1 Namba Pita. Namba Jisasa Kataisana aposolo akali mindi ateyo. Wamba Goteto yakama balana wandakali atalapale lata ya-kola, yakamato yakamana yuu tene tupa tepa alu poto, Pondasapi, Galesiapi, Kapatosiapi, Esiapi, Bitiniapi, yuu utupanena peai okoni. Andipa nambato yuu utupanena opene ateyai wandakali yakamana pepa oko peyo epe leyo.

2 Wamba Ayiane Goteto nembo toto, matili Jisasa Kataisana tundupa okomane yakamana koo tupa wasa-wasa peyo apola-kola, yakamato balana pii oko wato minalapale nembo teaipia. Wuane nembo toto, balato yakama balana wandakali tupa atalapale lata ya-kola, balana Oli Sipitisa okomane yakama Gotena wandakali tupa gulaya yaepia. Andipa Goteto yakama ondo wete wato, wayumane moyoto, yakamana yamapane mo tambo laya yakale lo pote leyo.*Lom 8:28-30; 2Tes 2:13-14

3-4 Nanimato nanimana Akali Andane Jisasa Kataisana Ayiane Gote okona gene oko laiyu lo atamakale. Anu peakale nanimato wuane pua atamakalepe. Goteto nanima ondo wete wato, Jisasa Kataisa malinga ika laya yane okonemane nanima mo wenene gulaya yane. Balato wuane peane okonena, matili nanimato Kataisanga minditaka epene wete mindi molopeyama lo maliyo ateyama. Nanimana minditaka epene wete Goteto ati kenga yatawa ando ateya okone tamuapi, koyopi, alu puapi mindi napene, epene wete yapowa yolopeya.*Kol 1:12-14

5 Matili yuu koyo puyale pula-angi, kenda-pene kambua epolopeya. Okone angi, Goteto yakama molo-peke lolane asini oko panakame yolopeya. Goteto yakama molo-peke lolopeya loto, yakamato Kataisa lo bilipi leyai-kola, Gotena tai-lene okomane yakama moyo ando atalane.*Jo 10:28-30; 17:11-12 6 Tene okonena, yakama epelewa ateyai tekeko, kenda-pene waka-waka kambua yakamanga epeando, andipa oto ukupini ateyama tupana yakamato kenda-pene utupane awua atoto, tandaka no yamapane kendawa atape-pene atolopeyai.*1Pi 5:9-11; Jem 1:2-3

7 Anu peakale kenda-pene utupane yakamanga epolo-peyape. Matili Jisasa Kataisa bala ama tombenga panakame epola-angi, yakamana bilipi okone angini guleando, Goteto yakama towa epele wato, gene andane mindi yakama giyu, tii-pene oko giyu, pulupeya. Goteto wuane pukale nembo toto, wandakali-mane golo mindi enene guleyape lo andoyale itanga yangoto makande piyaini pua teke, Goteto yakamana bilipi oko enene guleyape lo andoyale, kenda-pene waka-waka kambua yakamanga epeakale lalane. Golo bala epene tekeko, golo koyalane. Yakamana bilipi okonemane golo tupa sia minuto, epene wete eya.*Man 17:3; Sak 13:9; Mal 3:3; Jem 1:2-3

8-9 Wamba yakamato Jisasa Kataisa anda napeaini tekeko, yakamato bala towa epelewa yamapane yo atalaini. Andipapi yakamato bala anda napene ateyai tekeko, yakamato bala lo bilipi leyai okonena, Goteto yakama molo-peke leya. Tene okonena, yakama epele andane wete wa ateyai-kola, yakamana epele ene andane wete okone wandakali-mane waka minditaka mindi towa katulo mandeke napulu-peyai.*Jo 20:29; 2Ko 5:6-7

10-11 Wamba Kataisana Sipitisa okomane potopesa akali tupa lamawuato, matili Kataisato wandakali tupa ondo wato, utupane molo-peke loyale, tandaka nalu, gene andane mindi molopeya leaipia. Kataisana Sipitisa okomane wuane lea-kola, potopesa akali utupane-mane Gote tipa piki puato, mangene aki mindi pula-kola, Kataisato wuane pulu-peyape. Andoko angi Kataisato wandakali tupa molo-peke lolo-peyape leainipia.*Mt 13:16-17; Sam 22; Ais 53; Lk 24:25-27

12 Enjole tupamanepi pii utupane mana miaima lakae lo nembo talaini. Potopesa akali tupamane pii utupane Gote tipa piki peai-kola, Oli Sipitisa okomane utupane lamawuato, yakama ateyai-angi, Kataisa bala ini naepolo-peya leaipia. Matili wandakali waka minditupa atolai-angi, bala epolopeya. Yakamato wandakali matili atolai utupane moyoyale, potopesa pii loto, pepa peyalaini leaipia. Wuane lea-kola, matili Goteto Oli Sipitisa oko lamawuato, nimba poto, nambana piape akali tupa minu tai laya ape leaipia. Oli Sipitisa okomane Gotena piape akali tupa minu tai laya ya-kola, utupane-mane balana pii layene epene oko andipa ateyai wandakali yakamanga langeai okoni.

13 Tene okonena, yakamato Gotena mana epene tupa wato minu atamakale nembo toto, yakamana nembo-tene oko mandeke pitawa atalapape. Mandeke pitawa atoto, yakama tane mana minulai tupa kuai lo ando atalapape. Kuai lo ando atoto, matili Jisasa Kataisa bala panakame epola-angi, balato yakama ondo wato moyolo-peya nembo toto, yakamato maliyo atalapape.

14 Wamba Gotena pii mana tupa yakamanga naya-angi, yakamato mana koo yame tupa wato minaima lakae lo nembo teaini tekeko, andipa yakamato mana koo yame utupane wato mina napene, andopane-mane ayianena pii ale alaini pua Gotena pii alewa atalapape.*Lom 12:2; Ep 2:3; 4:17-18

15-16 Yakamato wuane pua atalapale loto, Gotena pii pepa pelene eya mindimane loto, namba yakamana Gote epene tika-pene wete ateyo. Tene okonena, yakamapi epene tika-pene wete atalapape layene eya. Gotena pii okomane wuane leya okonena, yakama ee lo meane Gote okomane mana epene tika-pene tupa angu wato minu atalane pua teke, yakamatopi mana epene tika-pene tupa angu wato minu atalapape.*Pit 11:44-45; Mt 5:48

17 Yakamato pote loto, Gote ando Ayiane lalaini. Ayiane okonemane wandakalina gene oko andoto, yapa lo tale napiyane. Jia. Balato wandakali nanima mindiki-mindiki lo nanimana mana minalamane tupa andoto, nanima yapa lo tale piyane. Tene okonena, yakama yuu okona ateyai-angi, yakama atapowa atolane yuu oko ati kenga eya nembo toto, yakamato Gote yukuwa epelewa atoto, balana pangosa atalapape.*Lom 2:9-11; Lap 2:23

18 Anu peakale yakamato wuane piyapape leyope. Wamba yakamana yumbane tupamane Gotena mana epene tupa wato mina napene, yakama moya napiyane mana minditupa wato minu ateainipia. Andipa ateyai wandakali yakamato yakamana yumbane tupana mana tupa wato minu ateai-kola, Goteto yakama kambo molo-peke leane tekeko, balato golopi, silipapi minditaka koyo piyane okonetaka mindimane yakama kambo molo-peke naleane lo yakamato nembo teyai okoni.

19 Kataisa balanga koopi, tetepi, mindi napene sipisipi andopane epene wete mindi atea-kola, Goteto Kataisana tundupa oko yole andane wete pupe-pene okonemane yakama kambo molo-peke leaipia.*Ap 20:28-29; Ip 9:11-14 20 Wamba wete Goteto yuu ati-la yakale nalenenga, Kataisato yakama kambo molo-peke leakale lo lata ya-kola, matili yuu oko koyo puyale pea-kola, Goteto yakama moyoyale Kataisa mo pana yaepia.*Ep 1:1-4 21 Kataisato nanimana moyoyale piape peane mambele, yakamato Gote lo bilipi leainipia. Goteto Kataisa malinga ika laya wato, gene andane wete mindi bala mayaepia. Tene okonena, balato yakama moyo mangene mindi pukale lo potomisa pii leane okone enene pulupeya nemboto, yakama maliyo ateyai.*Jo 14:6; Lom 5:1-2

22-25 Gotena pii pepa pelene eya mindimane loto, tani tupa kapu teya-kola, dini tupa yuunga tepa alane layene eya. Wuane pua teke, wandakali pitakana gene andane tupa alu piyane tekeko, Akali Andane okona pii layene oko yapowa yalane layene eya. Tomo waini manda talu, alu piyane tupamane yakama mo wenene gulaya nayane. Jia. Gotena pii saka atene oko alu napene, yapowa yalane okomane yakama mo wenene gulaya yane. Wamba akali minditupa-mane Gotena pii saka atene okone yakama langea-kola, Gotena pii okonemane yakama mo wenene gulaya ya okoni. Yakamato Gotena pii enene okone wato minu atalaini mana okonemane Gotena wenonga yakamana ini anda-pangosa kalato yane tupa kunu apea. Kunu apea-kola, yakamato wandakali yangone tupa towa mee epelewa atene ata napiyaini. Jia yakama utupane towa enene wete epelewa atalaini. Andipapi yakamato mana epene okone teke wato minu atoto, Kitisene wandakali yangone tupa wayumane wete epelewa yamapane yo atalapape.*Jo 13:33-35; Lom 12:10; Ais 40:6-8