4
Ndu nweru ọkwa l'ọchichi Sólomọnu
1 Ya ndono; eze, bụ Sólomọnu abụru eze ndu Ízurẹlu l'ẹphe ha. 2 Ọwaa bụ ndu ọkwa ẹphe ha nshinu l'ọchichi iya:
Azariya Zadọku bụ onye
achịjeru Nchileke ẹja.
3 Elihorefu yẹle Ahíja, bụ
ụnwu Shisha bụ ẹphe
ederu eze ẹkwo.
Jehoshafatu Ahiludu bụ onye
akwakọbeje iphe.
4 Benáya Jehoyada bụ
onye ishi ndu sọja.
Zadọku; mẹ Abiyáta abụru
ndu achịjeru Nchileke ẹja.
5 Azariya Nétanu bụ yẹbedua
elekota ndu achị ọnu-ogo.
Zabudu Nétanu abụru
onye achịjeru Nchileke ẹja;
l'agbazikwaruphu eze ụzo.
6 Ahisha bụ onye ishi l'ufu-eze.
Adoniramu Abuda abụru onye
ishi ozi mkpọ-nyi-ẹnya.
Ndu ọ-chị-ọha; mẹ ọnu-ogo, ẹphe achịgbaa
7 Sólomọnu bẹ nweru gọvano iri l'ẹbo, achị ndu Ízurẹlu l'ẹphe ha. Yọ bụru ẹphe ewotajeru eze yẹle ndibe iya nri, ẹphe eri. Onye lanụ ewotajeru iya nri l'ọnwa lanụ l'afa. 8 Ọwaa ẹpha ndu ọ-chị-ọha ono:
Nwatibe Họru bụ ọ-chị-ọha
ọnu-ogo ugvu Ífuremu.
9 Nwatibe Deka bụ ọ-chị-ọha
ndu Maakazu;
ndu Shalubimu;
ndu Bẹ́tu-Shẹmeshi;
mẹ ndu Elọnu-Bẹ́tu-Hananu.
10 Nwatibe Hesedu bụ
ọ-chị-ọha ndu Arụbotu.
Soko; mẹ alị Hefa l'ọ ha
abụkotaru nk'iya.
11 Nwatibe Abinadabu,
aha Tafatu alụ nwatibe
Sólomọnu; bụru
ọ-chị-ọha ndu Nafọru-Dọo.
12 Bana Ahiludu bụ ọ-chị-ọha
ndu Ténaku; ndu Megido;
mẹ ndu Bẹ́tu-Shanu l'ẹphe ha.
Mbụ ẹke ono, nọ-nyabe
Zaretanu; nọdukwaphu
lẹ nsụda Jézerilu; tsube lẹ
Betishanu je akpaa lẹ
Ébẹlu-Mehola;
je eswee Jokumeyamu ono.
13 Nwatibe Géba bụ ọ-chị-ọha
ndu Rámọtu-Gíledu.
Ẹke Jayi Manásẹ shi buru
lẹ Gíledu l'ọ ha bẹ bụkota
nk'iya; mẹ ọnu-ogo Agọbu
l'alị Báshanu; mbụ oke
ụkporo mkpụkpu ẹto ono,
e gude ụpho-mkpuma
kpụ-phetagbaa
mgburumgburu; bya egude
igodo ope tụ-chia ọnu-ụzo iya atuchi ono.
14 Ahinadabu Ido bụ ọ-chị-ọha
ndu Mahanayimu;
15 Ahimazu abụru ọ-chị-ọha
ndu Náfutali. Yẹbedua alụ
nwatibe Sólomọnu ọphu aha Basumatu.
16 Bana Hushayi bụ ọ-chị-ọha
ndu Ásha; mẹ ndu Alọtu.
17 Jehoshafatu Paruwa bụ
ọ-chị-ọha ndu Ísaka;
18 Shimeyi Ela abụru ọ-chị-ọha
ndu Bénjaminu;
19 Géba Úri bụ ọ-chị-ọha ndu Gíledu. Ọ bụ ẹke ono; bẹ Sihọnu shi, shi bụru eze ndu Amọru; eze ndu Ogu; mẹ kẹ ndu Báshanu. Ọ bụ yẹbedua nwẹnkinyi iya shi bụru gọvano ndu Júda.
Iphe, eewotajeru Sólomọnu l'ujiku lanụ
20 Ndu Júda; mẹ ndu Ízurẹlu aha l'igwe l'ọbu eveve mgbogidi ẹnyimu. Ẹphe shi nweru nri-eriri; nweru iphe angụngu; ẹhu atsọ ẹphe. 21 Sólomọnu, bụ eze achịa alị ono l'ọ ha shita lẹ Ẹnyimu Yufurétusu je akpaa l'alị Filisutayịnu; je akpaa l'oke ẹphe lẹ ndu Íjiputu. Ndu alị ono iche iche shi nọdu Sólomọnu l'ẹka; l'atụ akịriko anụ iya jeye l'oge nka-ezekuna nk'iya.
22 Iphe, e shi ewotajeru Sólomọnu l'ụboku bụ ụkporo ẹkpa witu l'ẹkpa witu iri, e tsuru etsutsu; ọwaa ụkporo ẹkpa witu ẹto, a kwọru akwọkwo; 23 eswi iri, gbaru ẹ̀bà; ụkporo eswi, akpa l'onwiya; ụkporo atụru ise; mẹwaru ele; mgbada; anyịgo; mẹ ọku, phuru l'ẹnya. 24 Sólomọnu achịa alị, nọkota l'ụzo ẹnyanwu-arịba Ẹnyimu Yufurétusu l'ọ ha; mẹkpo ndu eze, bukota l'ụzo ẹnyanwu-arịba ẹnyimu ono; mbụ shita lẹ Tifuza je akpaa lẹ Gáza. To nwe ndu obutobu iya, ọgu dajẹru ẹphe l'iya.
25 Teke Sólomọnu nọ ndzụ bẹ ndu Júda; mẹ ndu Ízurẹlu buru lẹ nchị-odoo; tsube lẹ Dánu je akpaa lẹ Besheba. Onyenọnu enweru mgbo vayịnu; mẹ oshi figu nk'iya.
26 Sólomọnu shi nweru ụkporo ụnu ụlo ise,*4:26 Iphe ọ bụ bụ 4,000. bụ ẹke oodobeje ịnya, l'akpụru iya ụgbo-ịnya iya; bya enweru ụkporo ụnu madzụ iri,†4:26 Iphe ọ bụ bụ 12,000. bụ ndu agbaru iya ịnya.
27 Ọ bụ ndu ọ-chị-ọha ono shi ewotajeru eze, bụ Sólomọnu yẹle ndu ọonu nri nri. Onyenọnu bẹ ewotaje nk'iya l'ọnwa ọphu o ruberu iya. Ẹ to nwedu iphe, ẹphe shi ekweje t'ọ kọo ya ụko. 28 Ẹge ono kwaphu bẹ ẹphe shi ewotaje balị; mẹ ẹswa witu, ịnya-ọgu; mẹ ịnya mmanu ọdo atajẹ bya edobe l'ẹke gbaru nụ. Onyenọnu shi ewotaje iphe, gbaru iya l'ewota.
Mmamiphe Sólomọnu
29 Nchileke nụru Sólomọnu mmamiphe; bya emee t'iphe doje iya ẹnya ọhuma. Ọ nụkwaru iya phụ egomunggo, dụ egvu. 30 Sólomọnu bẹ mmamiphe iya kangokotaru mmamiphe kẹ ndu ụzo ẹnyanwu-ahata l'ẹphe ha; kangokwaaphu kẹ ndu Íjiputu l'ẹphe ha. 31 Mmamiphe iya bẹ kangokotaru kẹ madzụ l'ọ ha. Ọ ka kẹ Etanu, bụ onye Zera; ka kẹ Hemanu; ka kẹ Kalụkolu; mẹ kẹ Dada, bụ ụnwu Maholu. Ẹpha Sólomọnu atụko iphe bụ mbakeshi, nọ-pheru iya mgburumgburu dee kfụkakfuka.
32 Ẹtu ẹtu, ọ nmashịru dụ ụnu ẹtu ẹsaa l'ụkporo ẹtu iri;‡4:32 Iphe ọ bụ bụ 3,000. bya agụa ụnu egvu labụ l'ụkporo egvu iri l'egvu ise.§4:32 Iphe ọ bụ bụ 1,005. 33 Ọ maru ẹnya oshi; mbụ tsube l'oshi sida Lébanọnu je akpaa l'ẹswa isopu, efuje l'ụpho-mkpuma. Ọ kwaphu ẹge ono b'ọ maru ẹnya ụnwu anụ jeye lẹ ndu ọphu awụ l'ẹpho; ụnwu ẹnu; mẹ k'ẹma.
34 Ndu eze, achị ẹke, dụgbaa iche iche lẹ mgboko anụa kẹ mmamiphe Sólomọnu; yetsua ndu e-je anụta okfu mmamiphe, shi iya l'ọnu.