5
Egvu-aphụ l'ẹhu ndu Ízurẹlu
1 Unu ngabẹkwa nchị;
nụa okfu-a;
unubẹ ndu ọnu-ụlo Ízurẹlu;
mbụ egvu-aphụ ẹhu unu-a, ya agụ-wa:
2 “Ndu Ízurẹlu ono,
ya yeru obu ono;
bẹ dawaru nụ darua alị;
ẹ too gbeshihekwa ọdo.
A gbadowaru iya l'alị l'ẹke, ọ daburu;
to nwe onye abya iya apali.”
3 Ọwaa iphe Ọkaribe-Kakọta-Nụ ekfu:
“Lẹ mkpụkpu, shi lẹ Ízurẹlu
zifu ụnu ndu sọja ẹbo
l'ụkporo iri t'ẹphe je ọgu;
bụ ụkporo ndu sọja ise nwẹnkinyi a-lata.
Mkpụkpu ọphu zifuru
ụkporo ndu sọja ise
abụru ndu sọja iri a-lata.”
4 Ọwaa iphe Ojejoje ekfuru ndu Ízurẹlu ndọ-ọ:
“Unu chọo ya; k'ọphu unu
a-nọdu ndzụ.
5 Unu ba achọkwa Bẹ́telu;
ọphu unu ejekwa Gíligalu!
Unu ba atụgbukwa jeshia Besheba;
kẹle ndu Gíligalu;
bẹ aa-kpụkwa lẹ ndzụ;
bya e mee ndu Bẹ́telu;
t'ẹ b'o nwe iphe ẹphe a-bụ.”
6 Unu chọkwaa Ojejoje;
nọdu ndzụ;
ọdumeka; bẹ ọo-dzụkwa
ọnu-ụlo Jósẹfu l'ọbu ọku.
Ọo-dzụ dzụfu;
to nwe onye Bẹ́telu a-dụ ike egbota iya.
7 Nshọo unubẹ ndu ono,
ewojeru ikpe, dụ maa
mee iphe atsọ ile ono;
l'ewojeru odobe-ẹka-ndoo fua l'alị ono.
8 Onye ono, bụ iya meru
mkpọ-kpodo Puleyadesu; mẹ kẹ Orayọnu;
mbụ onye emeje ọchi;
yọ bụru iphoro nchi-abọhu;
l'emeje eswe; yo jikputa;
ghọo ẹnyashi;
mbụ onye ekuje mini,
dọru l'eze ẹnyimu oku;
yọ bya eworu iya chịaru
eliphe mgburumgburu:
onye ono bụ Ojejoje bụ ẹpha iya.
9 Oowotaje ndu ike nọ gwee egwegwe;
gwee jeye l'ẹke bụru ẹphe
a-gbabe-a-dzụru.
10 Onye ikpe iya vudo
nhamụnha bụ onye unu akpọje ashị;
to nwe iphe unu agụbeje
onye ekfu ire-lanụ.
11 Unu anọduje adzọ ndu ụkpa tọlitoli;
l'eyebutaje ẹphe t'ẹphe nụ unu ereshi.
A makwaru-a l'unu washịru
mkpuma gude kpụshia ụlo unu;
obenu l'unu te ebudu iya.
A makwaru-a l'unu kọshiru
mgbo vayịnu, dụ ugvu l'ẹnya;
obenu l'unu ta angụdu mẹe, shi iya nụ;
12 kẹle ya maru ẹge unu chọta-beru okfu;
bya amakwarụphu ẹge
iphe dụ ẹji, unu meshiru hatabe nshinu.
Unu anọduje akpa ndu
doberu ẹka ndoo ẹhu;
l'ana ẹka-azụ;
ọphu unu 'ekpejedu ndu ụkpa ikpe,
dụ maa l'ụlo ikpe.
13 Ọo ya meru iphe onye
nweru egomunggo adajẹ ashị
m'ọ -dadẹwa ẹge ono;
kẹ l'oge teke ono bụkwa ẹjo ụboku.
14 Unu chọje iphe du mma;
unu ba achọjekwa iphe dụ ẹji;
k'ọphu unu a-nọdu ndzụ.
Ọ bụ teke ono; bẹ Ojejoje; mbụ Nchileke,
bụ Ọkaribe-Kakọta-Ike
a-nọo;
swiru unu ẹge ono,
unu asụje l'ọ nọ swiru unu ono.
15 Unu kpọo iphe dụ ẹji ashị;
unu eyeru ome iphe dụ mma obu!
Unu kpeje ikpe, dụ maa
l'ụlo-ikpe t'a maru;
mẹ Ojejoje; mbụ Nchileke,
bụ Ọkaribe-Kakọta-Ike;
?ọo-phụru unu imiko;
mbụ unubẹ nwa ndu ọphu
phọduru nụ l'ikfu Jósẹfu.
16 Ọo ya; bẹ Ọkaribe-Kakọta-Nụ; mbụ Nchileke, bụ Ọkaribe-Kakọta-Ike ekfu; sụ:
“Lẹ ụzu-ẹkwa a-nọdu ada l'iphe bụ esu-ụzo.
Ẹkwa-aphụ a-nọdu ada
l'iphe bụ ẹke ndu ọha edzukoje.
Ee-ku ndu kọru okfu t'ẹphe
bya akwaa ẹkwa;
kua ndu maru ọgu
egvu-anwụhu t'ẹphe
bya akwaa dumobe ọnu.
17 Ụzu-ẹkwa a-nọdu ada
l'iphe bụ ẹke, a kọru mgbo vayịnu;
kẹle ya a-bya eshijahu
ẹke unu dọru ẹbo; sweta.”
Ono iphe Ojejoje ekfu ndono.
Eswe kẹ Ojejoje
18 Aphụ a-tsọkwaru unubẹ ndu
ọ gụ t'a sụ l'eswe kẹ Ojejoje ruwaru!
?Bụ ngụnu kparu iphe eswe
Ojejoje agụ unu agụgu?
Mbọku ono a-bụkwaru ọchi;
ẹ tọ bụkwa iphoro lẹ phuu.
19 Ọo-dụkwa l'ọbu onye, nahụru agụ;
je agbabaru bịye.
Yọ dụ l'ọ bụ onye bahụru l'ụlo iya
je eworu ẹka tụ-kobe
l'ụpho-mkpuma;
agwọ abya ataa ya.
20 Eswe Ojejoje a-bụkwaru ọchi;
ẹ tọ bụkwa iphoro.
Mbụ l'ọo-gbakọta tsịrikitingu;
k'ọphu bụ l'iphoro
ta anọdu ya lẹ phu.
21 Ajị, unu agbaru yẹbe Ojejoje;
bẹ dụkwa iya ashị;
tọ dụ iphe ya gụberu iya.
Edzuko, unu edzukobejeru
iya ta adụ iya mma.
22 Ẹ to nwedu mẹ unu gude
ngwẹja-ukfuru bya egwooru iya;
vuta ngwẹja-nri bya iya agwagwa;
ya gbe anata iya.
Unu -gude m'ọo eswi,
gbaru ẹba bya egwooru iya ngwẹja ẹhu-agu;
?ya gbe agha ẹnya l'ẹke ono.
23 Unu ba agụheru iya egoro ono, unu agụ;
sụ l'ọ bụ egvu ono;
kẹle ya ta angabẹjekwa nchị
k'ọnu iphe nkwa unu ada.
24 Ọlobu; tẹ ikpe, dụ maa watanụ
ọtso l'ọbu nggele;
odobe-ẹka-ndoo awata ọtso
l'ọ bụ ẹnyimu, ẹ ta tahụjedu atahụ!
25 “Unubẹ ndu ọnu-ụlo Ízurẹlu;
ụkporo afa labụ;
bẹ unu gbushiru anụ gude
gwaa nte l'echi-ẹgu.
?O nweru ọphu unu gude gwaa yẹbedua.*5:25 Ndu 7:42-43.
26 Obenu lẹ nta-a bụ iphe unu
woru obu unu tupyoo
bụ nte onye eze unu;
mbụ Sakutu yẹle iteshi unu, bụ Kayịwan;
mbụ mkpọ-kpodo ono,
unu gwọtaru l'onwunu ono.
27 Ọo ya meru iphe aa kpụ
unu lẹ ndzụ je eswee Damásukọsu.”
Ono iphe Ojejoje ekfu ndono; mbụ onye ono, ẹpha iya bụ Ojejoje, bụ Ọkaribe-Kakọta-Ike ono.

*5:25 5:25 Ndu 7:42-43.

© 2014 WBT