32
1 Nggụbe igwe; ngabẹnuru mu nchị
tẹ mu kfua okfu!
Nggụbe alị; nụkwaa okfu, shi mu l'ọnu!
2 T'iphe, mu ezi chịkwaa mgu l'ọ bụ mini l'obu.
T'okfu, shi mu l'ọnu dakwaa l'ọ bụ iji.
T'ọ chịkwaa yẹshiyeshi
l'ọ bụ mini, ada l'iru ẹgbudu;
mbụ l'ọ bụ oke mini,
ada yọyoyo l'eli iru oshi.
3 Mu a-rakwa ẹpha Ojejoje arara.
Unubẹdua; unu jakwaa ẹpha
Nchileke ayi ono ajaja;
kẹ l'ọ ha nshinu!
4 Ọ bụ Ojejoje ono bụ Agbara-Mkpuma!
Iphe bụ iphe, oome;
bẹ ntụpo ta anọjedu;
Ụzo iya kfụru ntụmu.
Nchileke evudoshije ike l'iphe,
o kfuru; ọphu ọ dụdu iphe,
ẹ-ta kfụduru ntụmu, oomeje.
O doberu ẹka ndoo;
bụru onye obu gụru iphoro.
5 Ẹphe watawaru ome iphere,
rehuru erehu l'ẹke ọ nọ.
Ntụpo, nọ ẹphe l'ẹhu mewaru;
ẹphe ta bụhe ụnwu iya.
Ẹphe bụ ọgbo,
a chiliru ẹka l'ẹjo iphe;
ọgbo, ụzo ẹphe gberu nggọ.
6 ?Bụ egbe iphe ọwaa;
bẹ unu gude akfụ Ojejoje ụgwo;
unubẹ ndu-a, bụ ndu eswe;
unu te nwe egomunggo-wa?
?Tọ bụdunua ya bụ
nna unu, bụ iya keru unu?
?Tọ bụdunua ya
kpụru unu; bya emee unu t'unu
ngụru angụru?
7 Unu nyatakwa teke ndiche!
Unu rịa ọriri;
nyata ọgbo ọphu swetawaru nụ!
Unu jịa nna unu phẹ
t'ẹphe kọoru iya unu!
Unu ajịkwaa ya phụ
ndu bụ ọgurenya unu;
t'ẹphe kọoru iya unu!
8 Teke Ọkaribe-Kakọta-Nụ
keshiru mbakeshi òkè-iphe ẹphe;
mbụ teke o keshiru ụnwu eliphe;
b'ọ tụ-bugbaaru ẹphe ẹke
ókè-alị ẹphe a-kpa l'ẹhu l'ẹhu;
l'ẹge ụnwu Ízurẹlu ha;
9 kẹ l'òkè-iphe kẹ Ojejoje bụ ndibe iya.
Jékọpu abụru òkè-iphe ọphu ọ fọtaru.
10 L'echi-ẹgu b'ọ chọ-vuru ẹphe.
Mbụ l'ọo alị, abụru swanmangu,
bụ ẹjo ọra anọduje ada iya;
b'ọ nọ-pheru ẹphe mgburumgburu;
l'eleta ẹphe ẹnya.
Ẹnya iya nọ l'ẹke ẹphe nọ;
l'ọ̀ bụ̀ nwandodo-ẹnya iya.
11 Ọ bụ ẹge ono, ugo anọduje
ephephe l'ẹkfuna iya;
l'eruphe l'eli ụnwu iya-a;
mbụ ẹge ono, ọojakaje ẹ́bà iya
pakọo ụnwu iya; paru ẹphe
l'igburumọnu ẹ́bà iya ono;
12 bẹ Ojejoje nwẹnkinyi iya duru ẹphe;
ọphu o nwedu agwa ndu ọhodo,
yeru iya ẹka.
13 O doberu ẹphe l'ẹke ha l'eli
lẹ mgboko-a; t'ẹphe bụru ishi;
bya egude akpụru iphe, shi l'ẹgu
nụa ẹphe nri.
Ọ nụkwaruphu ẹphe manụ-ẹngu,
shi lẹ mkpuma; bya anụ ẹphe manụ,
shi l'alị, dụ ekfu-ekfu.
14 O gudekwaphu manụ-ẹra eswi;
mẹ mini-ẹra atụru; mẹ nwatụru,
gbaru ẹba; mẹ ebyila; mẹ elu,
shi l'alị Báshanu; mẹ eghu;
mẹ ọkpobe witu zụ-jia ẹphe ẹpho.
Ẹphe ngụkwaruphu mẹe uswe,
shi l'akpụru vayịnu.
15 Ọle; Jeshurunu datsụleruphu
okporokpo; bya ekwefu íkè.
Ọ daru okporokpo;
dụwa bogiri-bogiri.
Ọ tsụwaru onwiya ẹba;
bya ajịka Nchileke, keru iya nụ.
Yọ bụru Agbara-Mkpuma ono,
dzọfutaru iya nụ ono; b'ọ jịkaru.
16 Ẹphe eshi ẹge ono mee;
yo kolahaaru agwa ndu
ọhodo ono okopho.
Mbụ l'ẹphe gude agwa ono,
bụkota akpamara ono;
mee; ẹhu eghulahaa ya eghughu.
17 Ẹphe awata ogwo ngwẹja l'anụ
agwa, ẹ-ta bụdu Nchileke.
Mbụ agwa, ẹphe ẹ-ta mabụa.
Agwa ono bụ agwa,
ẹphe dobegbaaru k'ọphungu;
mbụ agwa,
nna unu oche phẹ ta atsụbua egvu.
18 Agbara-Mkpuma ono, zụfutaru unu ono;
bẹ unu gbadoru.
Mbụ l'ọo Nchileke ono, bụ
iya mụru unu ono; bẹ unu zaharu.
19 Ojejoje abya aphụa iphe ono,
ẹphe eme ono; tsọlahaa ẹphe oyi;
kẹ l'ụnwu iya ndu k'unwoke;
mẹ ndu k'ụnwanyi;
bẹ kpatsuru iya
ẹhu-eghughu.
ẹhu-eghughu.
20 Yọ sụ: “Lẹ ya e-wofu ẹnya
l'ẹke ẹphe nọ;”
phụedukpoo iphe,
ẹphe e-mekochaa bụru.
Ishi iya abụru l'ẹphe bụ ọgbo,
ụzo ẹphe gberu nggọ;
bụru ụnwegirima,
ẹ-te evudoshijedu ike
l'iphe, ẹphe kfuru.
21 Ẹphe gude iphe, ẹ-ta bụdu
Nchileke mee tẹ ya wata oko okopho;
gude ụnwu agwa, bụ iphe-mmanu
akpatsu iya ẹhu-eghughu.
Ya e-gudekwanu mba,
ẹ-ta bụdu mba;
ẹ-ta bụdu mba;
ye ẹphe okopho l'ẹhu;
gude ọha, eme eswe
kpatsua ẹphe ẹhu-eghughu;
22 kẹ l'oke ẹhu-eghughu iya;
bẹ gbanwuhuwaru ọku.
Ọku ọbu e-ke gbururu jeye;
yo kerua ime ime alị-maa.
Oo-kekota mgboko; kee iphe,
a kpataru akpata dobe iya;
bya eworu ọku tụa l'ẹke ugvu futaru.
23 “Ya e-wota iphe-ẹhuka byabẹ ẹphe;
chịta arwa iya byibe ẹphe l'ẹhu.
24 Ẹjo ẹgu a-bya;
ẹnya ekoroshihu ẹphe;
okpomọku, a-nọdu erebushi ẹphe anụ;
ẹjo iphe-ememe,
abya egbushia ẹphe.
Ya e-zi ẹjo anụ-ẹgu-ẹgbudu
t'o gude ẹpyi iya byakfuta ẹphe;
zia ẹjo agwọ, awụ l'alị;
t'ọ bya atagbushia ẹphe.
25 Ee-gude ogu-mbeke egbu ẹphe
pyaapyaa l'etezi;
k'ọphu bụ l'ẹphe -nọdu l'ime ụlo;
bẹ meji te eguduru ẹphe eguru.
Ụnwu-okorọbya; ụnwu-mgbọko;
ụnwegirima nshịi;
mẹ ndu ẹwo furu l'ishi
a-bụkotaru kpurupyata.
26 Ya shi sụ lẹ ya a-chịkashi
ẹphe nanụ nanụ;
mee t'ẹ ba nyatajẹhe ẹphe anyata
lẹ mgboko.
27 Obenu l'ọo ẹjo-ọnu ndu ọhogu ẹphe;
bẹ ya ezeru; mbụ; a -nọnyakwaa;
ndu ọhogu ẹphe ekfua iphe,
ẹphe ẹ-ta madu ishi iya; sụ:
‘L'ọo ẹphebe ndu ọhogu me-kputaru;
l'ẹ tọ bụkwa Ojejoje meeberu
iphemiphe ọbule ono!’ ”
28 Ndu Ízurẹlu bụkwa ọha,
egomunggo swehuru;
iphe te edoje ẹphe ẹnya lẹ phuu.
29 Ndẹge ẹphe, bụ ndu maru iphe;
mẹ ọo-ga e-dokwaa ẹphe ẹnya;
ẹphe amakwarụ ẹge
ọo-mụru ẹphe l'ikpazụ.
30 ?Nanụ ẹge onye lanụ e-shi
achị ụnu ụmadzu ugbo labụ
l'ụkporo madzụ iri ọso.
Ọdo abụru; ?nanụ ẹge ụmadzu ẹbo
e-shi mee ụnu ụmadzu ise;
t'ẹphe wata ọso;
a gụfukwa l'onye ono,
bụ Agbara-Mkpuma ẹphe ono
sefuwaru ẹphe ẹka;
mbụ lẹ Ojejoje mịwaru ẹphe ẹnya?
31 Kẹle mkpuma nk'ẹphe
ta dụkwa l'ọ bụ
Agbara-Mkpuma nk'ayi.
Ndu ọhogu ayi makwaru-a
l'ọo ẹge ọ dụ ndono.
32 Vayịnu nk'ẹphe shi lẹ
vayịnu kẹ ndu Sódomu.
Yọ bụru l'ẹgu ndu Gọmóra;
bẹ akpụru vayịnu ẹphe shi.
Akpụru vayịnu ẹphe bụ nshi l'onwiya;
jọkfujokfu iya abụru age.
33 Mẹe ẹphe bụ ẹra agwọ;
bụru ọnu-mini, shi óghù l'ọnu.
34 “Ya wowaru iphemiphe ọbule ono
kwakọbe; mbụ nmachia ya;
dobe l'ẹke ya akwakọbeje ẹku iya.
35 Ọo yẹbedua agwatajẹ ụgwo iphe;
bụru yẹbedua;
bẹ ọkfu ụgwo nọ l'ẹka.
L'oge iya bẹ ọkpa e-chifua ẹphe.
Mbọku, ụmuruku a-mụru ẹphe nọokwa ntse.
Aphụ abyaakwa ẹphe atsọtso.”
36 Ojejoje a-haru ndibe iya enge.
Ọo-phụru ndu ozi iya imiko;
m'ọ phụlephu l'ike ta dụhedu ẹphe;
mbụ l'ẹ tọ dụhedu onye wuduru nụ:
ohu mẹ amadụ.
37 Ọo-sụ ẹphe: ?Nanụ agwa ẹphe ọbu;
mbụ mkpuma ẹphe ọbu,
ẹphe agbabaje je anọdu zeeru ndzụ?
38 Mbụ agwa, taru ẹ̀bà anụ,
ẹphe gbaru ẹja;
ngụa mẹe ngwẹja ẹphe ono.
T'o gbeshinu bya eyeru unu ẹka!
T'o gbochitanu unu!
39 “Unu lekwaa; ọ kwa yẹbedua
nwẹnkinyi bụ Nchileke.
Ẹ tọ dụhekwa Nchileke
ọdo, nọnu; a gụfu iya.
Ọo yẹbedua emeje t'a nwụhu anwụhu;
bụru iya emeje t'a nọdu ndzụ.
Ọo yẹbedua emeje tẹ iphe meka madzụ;
bụru iya emeje t'ọ kpọhu;
ọphu ọ dụdu onye adụ ike
anafụ iya onye ya guderu.
40 Ya paliru ẹka iya imigwe; ribua ya:
L'ọ bụ ẹge ya a-nọ gbururu jeye-wa;
41 bẹ ya a-ba ogu-mbeke ya ono,
egbu nwịinwii ono ababa;
gude iya l'ẹka kpee ikpe;
gwata ndu ọhogu iya ụgwo
iphe, ẹphe meru;
mbụ kfụa ndu
mbụ kfụa ndu
ya dụ ashị ụgwo.
42 Ya e-me tẹ mee madzụ
ngụ-goo arwa iya agụ-ngo;
mbụ mee ndu e gburu egbugbu;
mẹ mee kẹ ndu a kpụru lẹ ndzụ.
Ogu-mbeke ya a-tsụ madzụ ọtsu ẹkfu;
mbụ je akpaa l'ishi ndu bụ ishi ndu
ọhogu iya ono.”
43 Unu tee ẹswa; unubẹ mbakeshi!
Unu lẹ ndibe Nchileke tee ẹswa;
kẹ l'ọo-gwata ụgwo ọchi ụnwu iya.
Ndu ọhogu ayi;
bẹ oo-melata ụgwo
iphe, ẹphe meru;
Yọ kfụa ụgwo iphe, dụ ẹji,
ndu nk'iya meru l'alị iya.*32:43 Róm 15:10.
44 Mósisu yẹle Jóshuwa Nunu abya agụkota egvu ono; ndu Ízurẹlu l'ẹphe ha anụkota iya.
45 Tọ dụ iya bụ; Mósisu ekfutsuleruphu ndu Ízurẹlu iphe ono l'ọ ha; 46 bya asụkwaphu ẹphe: “Unu vukwaru okfu-a, ya kfuru ntanụ-a l'obu; k'ọphu unu e-zia iya ụnwu unu t'ẹphe zia obu l'alị; mekota iphe, bụ iphe, e deru l'ekemu-a. 47 Tẹ okfu-a ba bụkwaru unu mkpọkoro okfu; kẹ l'ọ kwa ẹke ono bẹ ndzụ unu nọ. Yọ bụru iphemiphe ọbule ono e-me t'unu kaa nka l'alị ono, unu ada Ẹnyimu Jọ́danu eje alụta t'ọ bụru nk'unu ono.”
Mósisu a-nwụhu l'eli ugvu Nebo
48 Yọ bụru mbọku ono gẹdegede; bẹ Ojejoje kfuru yeru Mósisu; sụ iya: 49 “Nyihu ugvu-a; mbụ Ugvu Nébo l'ugvu ugvu Abarimu-a, nọ l'alị Móabu, chebe ifu lẹ Jériko; phụ alị Kénanu, bụ alị, ya abya ọnu ndu Ízurẹlu t'ẹphe nweru. 50 Ọ bụ l'eli ugvu ono, ii-nyihu ono; bẹ ịi-nọdu nwụhu; lakfu ndibe ngu lẹ maa; ẹge ono, nwunne ngu Érọnu nwụhuru l'ugvu Họru; lakfube ndibe iya ono. 51 Ishi iya abụru l'unu nọ l'ifu ndu Ízurẹlu lẹ mini Meriba kẹ Kadẹ́shi l'echi-ẹgu Zinu kwefuru iya íkè; mbụ l'unu te medu t'a maru ẹge yẹbe Ojejoje dụ-be nsọ l'ẹke ndu Ízurẹlu nọ. 52 Ọo ya meru iphe, bụ ụzenya bẹ ịi-nọdu lee ẹnya l'alị ono, ya anụ ndu Ízurẹlu ono; ọle ẹ tịi tụdu iya ọkpa.”