48
Jékọpu agọru Manásẹ yẹle Ífuremu ọnu
1 Yo be ujiku lanụ; a bya ezia Jósẹfu lẹ nna iya bẹ ẹhu ta dụdu mma. Yo duta ụnwegirima iya ẹphe ẹbo, bụ iya bụ Manásẹ; mẹ Ífuremu; yọ bụru ẹphe ejeje. 2 Ẹphe erua; e je ezia Jékọpu lẹ nwatibe iya; mbụ Jósẹfu bẹ byakwaru iya ajịji. Yo keshia ẹhu gbeshi bya anọdu l'oshi-azẹe ya.
3 Jékọpu asụ Jósẹfu:
“Lẹ Nchileke,
bụ Ọkaribe-Kakọta-Ike
byakfutaru yẹbe Jékọpu lẹ Luzu
l'alị Kénanu; bya agọoru iya ọnu l'ẹke ono;
4 sụ iya: ‘Lẹ ya e-me iya tẹ ya zụa azụzu;
ya ha l'igwe.
Lẹ ya e-me iya tẹ ya bụru
mba k'ẹka iya; nụ iya alị-a
t'ọ bụru òkè-iphe ndu eri iya
jeye lẹ tutu yoyo.’
5 “Ụnwegirima labụ ono,
ọ mụtaru lẹ Íjiputu tẹmanu ya abyadẹ ono;
bụ iya bụ Ífuremu mẹ Manásẹ
bẹ ya gụwaru yeru ụnwu
kẹ yẹbe Jékọpu.
Ífuremu yẹle Manásẹ bụwa
ụnwu iya ẹge ono, Rúbẹnu;
mẹ Símiyọnu bụ iya ono.
6 Ọ bụ ndu ọphu aa-mụtaru ngu nta-a
tsobe ndu ọwaa a-bụru ụnwu ngu.
Òkè-alị, ẹphe a-hata bẹ e-shi l'ẹka
unwunne ẹphe ono, bụ iya bụ
Ífuremu; mẹ Manásẹ.
7 Ọ bụ lẹ ya shi Padanu alata;
bẹ ụmuruku mụru iya;
kẹle Rechẹlu nahụru iya nwụhu
lẹ Kénanu l'ẹphe nọkwaduru l'ụzo
lẹ mgboro Efuratu.
Ya eworu iya lia l'iku ụzo ono,
eeshi eje Efuratu ono,
bụ iya bụ Bẹ́tulehemu.”
8 Ízurẹlu aphụlephu ụnwu Jósẹfu ono; jị iya: “?Bụ ndu ole ndọ-ọ?”
9 Jósẹfu asụ iya: “L'ọ kwa ụnwegirima, Nchileke nụru iya l'ẹke-a.”
Ízurẹlu asụ iya t'o dutaru iya ẹphe tẹ ya gọoru ẹphe ọnu.
10 Teke ono bẹ nka lawaru Ízurẹlu l'ẹnya; t'ọ phụfuhe ụzo ọhuma. Jósẹfu abya eduta ụnwegirima ono donyabe iya ntse; nna iya ono abya etsuta ẹphe ọnu; nmaa ẹphe akpa.
11 Ízurẹlu asụ Jósẹfu: “Lẹ ya te shikwa arịkwadu lẹ ya a-phụkwadu ngu ifu ọdo; Nchileke abya emewa nụ nta-a; ya egbe phụfua ụnwu ngu yekobe iya.”
12 Jósẹfu abya edufuta ụnwegirima ono l'ụtakfu*48:12 L'okfu Híburu bụ “ikpere” b'a kwata dee l'ẹka-a. Obenu l'okfu kẹ Ikwo bụ “l'ụtakfu” bẹ eeheje nwata. Iphe “ikpere” ono kwata bụru l'ome-l'alị kẹ ndu Híburu bụ l'ọ bụwa amụpyabe bẹ Ízurẹlu mụpyaberu ụnwunwa iya ono ẹphe ẹbo. Ẹ te egbe agbanwehedu iya agbanwe ọdo. Phụ iphe e gude chịa Mbụ 24:2 ẹka l'azụ. Ízurẹlu; bya efurita; wota ifu kpube l'alị; 13 bya esekputa ẹphe ẹbo; gude ẹphe ẹge ono machịaru Ízurẹlu. Ífuremu b'o sekpu l'ẹka-ụtara; nụ iya Ízurẹlu l'ẹka-ibyita. Manásẹ b'o sekpu l'ẹka-ibyita; nụ iya Ízurẹlu l'ẹka-ụtara. 14 Obenu lẹ teke Ízurẹlu wataru ẹphe ọgoru ọnu; b'ọ kụ-swiberu ẹka iya akụ-sibe; woru ẹka-ụtara iya byibe Ífuremu, bụ onye kẹ nwata l'ishi; woru ẹka-ibyita iya byibe Manásẹ, bụ ọkpara.
15 Yọ bya agọoru Jósẹfu ọnu; sụ:
“Tẹ Nchileke ono, nna iya oche phẹ,
bụ iya bụ Ébirihamu;
mẹ Áyizaku tsoru ụzo iya ono;
mbụ Nchileke ono, shi keshinu
ya bụ nwata chee ya jeye ntanụ-a ono;
16 mẹ Ojozi-imigwe ono, dzọkotaru iya nụ
l'iphe, bụ iphe-ẹhuka ono, byaru iya nụ ono;
gọkwaru ọnu-ọma nụ ụnwegirima-a.
T'e kujekwa ẹpha ụnwegirima-a laa l'ẹpha
kẹ yẹbe Jékọpu yẹle kẹ nna iya oche phẹ,
bụ Ébirihamu; mẹ Áyizaku;
ẹphe azụa ịnyinwuruku lẹ mgboko-a.”
17 Jósẹfu aphụlephu lẹ nna iya byiberu Ífuremu ẹka-ụtara l'ishi; ẹhu adaa ya kọo. Yo je azụ nna iya l'ẹka; tẹ ya lọfuta iya ẹka ono, o byiberu Ífuremu l'ishi ono byibe iya l'ishi kẹ Manásẹ. 18 Jósẹfu asụ iya: “Wawakwa nna; ọ kwa onye ọphu bụ ọkpara ndọ-ọ. Ọ kwa yẹbedua bẹ ii-byibe ẹka-ụtara l'ishi!”
19 Obenu lẹ nna iya jịkaru; sụ iya: “Nwa mu; ya marua. Ya marua. Ọo-zụ-a azụzu; bụru mba k'ẹka iya; bya aha nshinu. Obenu lẹ nwunne iya kẹ nwata a-ka iya; ẹge ono kwaphu bẹ eri iya abụru igweligwe mba.” 20 Yọ bya agọoru ẹphe ọnu mbọku ono; sụ:
“Ndu Ízurẹlu l'e-gudeje ẹpha
ngu agọ ọnu; sụ:
‘Tẹ Nchileke mekwaa ngu
t'i dụ l'ọ bụ Ífuremu yẹle Manásẹ.’ ”
Ya ndono; yo mee;
Ífuremu aka Manásẹ.
21 Ízurẹlu abya asụ Jósẹfu: “Lẹ ya abyaakwa anwụhu; ọbule Nchileke e-swikwaru-a unu; dulaa unu azụ l'alị nna unu. 22 Ya nụwaru ngu ókè-alị lanụ t'i gude ka unwunne ngu phẹ. Alị ono bẹ ya gude ogu-mbeke; mẹ akfụ lụta l'ẹka ndu Amọru.”
*48:12 48:12 L'okfu Híburu bụ “ikpere” b'a kwata dee l'ẹka-a. Obenu l'okfu kẹ Ikwo bụ “l'ụtakfu” bẹ eeheje nwata. Iphe “ikpere” ono kwata bụru l'ome-l'alị kẹ ndu Híburu bụ l'ọ bụwa amụpyabe bẹ Ízurẹlu mụpyaberu ụnwunwa iya ono ẹphe ẹbo. Ẹ te egbe agbanwehedu iya agbanwe ọdo. Phụ iphe e gude chịa Mbụ 24:2 ẹka l'azụ.