8
Jisọsu bụ onye ishi ndu achịjeru Nchileke ẹja nk'ayi
1 Iphe bụ ishi iphe ono, ayi ekfu ono bụ l'ayi nweru egbe onye ishi ndu achịjeru Nchileke ẹja ọphu, bụ iya bụ Kuráyisutu; onye ọphu nọ anọno l'imigwe l'ẹka-ụtara aba-eze Ọkaribe-Kakọta-Nụ. 2 Yẹbedua eje ozi k'ọchiru Nchileke ẹja nk'iya l'ẹke Nchileke nọ gẹdegede, bụ iya bụ l'eze-ụlo Nchileke ọphu nọ l'imigwe. Ụlo onanu ta bụdu madzụ gude ẹka mee ya. Ọ bụ̀rú Nchileke l'onwiya meru iya.
3 Nchileke fọtaru iphe bụ ndu ishi ndu achịjeru iya ẹja; t'ẹphe nụje iya iphe ndiphe nụru iya; ọdo bụ t'ẹphe chịjekwaru iya phụ ẹja. Ọo ya bụnu l'ọ gbaru t'o nweru iphe onye ishi ndu achịjeru Nchileke ẹja nk'ayi, bụ iya bụ Kuráyisutu e-gudenu chịaru Nchileke ẹja. 4 Ndẹge Kuráyisutu ono nọ lẹ mgboko-a; mẹ ta g'e kwekpokwaanu t'ọ bụru onye ishi ndu achịjeru Nchileke ẹja; keshinu ndu achịjeru Nchileke ẹja kẹ mgboko-a achịjeru iya ẹya l'ẹge a tụru iya l'ekemu ndu Ju. 5 Iphe ẹphe emeje l'ẹke aachịjeru Nchileke ẹja kẹ mgboko-a bụkwa iphe yeru ọphu onye ishi ndu ono, achịjeru Nchileke ẹja nk'ayi ono eme l'imigwe. Kẹ mgboko-a bụkwa nwonyonyo iya nk'iya l'imigwe. Lẹ teke Mósisu shi eme t'ọ kpọbe ụlo-ẹ́kwà ono, e shi achịjeru Nchileke ẹja ono teke ndiche bẹ Nchileke sụkwaru iya: “Nyatakwa; mekota ụlo ono t'ọ dụlephu ẹge ono, ya tụru ngu ọnu iya l'eli ugvu ono.” 6 Obenu l'ẹge ọ dụ nta-a bẹ Nchileke ziwaru Jisọsu oje ozi kẹ ọchijeru Nchileke ẹja; mbụ ozi ọphu ọkwa iya kfụbe ọswa ka nshinu ma lẹ kẹ ndu ọphunanu, bụlephu ndu achịjeru Nchileke ẹja phụ. Ọ kwaphu ẹge ono bẹ ọgba-ndzụ ọphu shi iya l'ẹka, o gude jigbabe Nchileke; mẹ madzụ kfụbe ọswa ka akahụ iya phụ mma; keshinu ọphu o shi l'ọgba-ndzụ ọwaa; kwee ayi ụkwa iphe ka mma ma l'ọphu o shi l'ọphunanu kwee.
7 Ndẹge ọ -bụ l'ụta ta nọdu l'ọgba-ndzụ kẹ ọdungu phụ; m'ẹ tọ ge ejekwa iya edocha; k'ọphu oo-je ọgba ndzụ ọdo. 8 Obenu lẹ Nchileke taru ndu nk'iya ụta teke ndiche ono; sụ ẹphe:
“L'o nwekwaru-a teke
aa-nọnyaa;
aa-nọnyaa;
yẹbedua yẹle ndu Ízurẹlu;
mẹ ikfu Júda agbaa ndzụ
ọphu a-bụru k'ọphungu.
9 Ono ta adụhedu l'ọ bụ
ndzụ ọphu yẹle ndiche
ẹphe gbaru teke ono,
ya kpụtaru ẹphe l'ẹka;
kpụfuta lẹ Íjiputu ono.
L'e mekochakwaaru;
ẹphe emebyia ndzụ,
ẹphe l'iya gbaru.
ẹphe l'iya gbaru.
Yọ bụru iya meru iphe
ya te yeheduru ẹphe ọnu.”
Ono iphe Nnajiufu ekfu ndono.
10 Nnajiufu asụkwaphu:
“Ọwaa bụ ndzụ yẹle ndu
ọnu-ụlo Ízurẹlu a-gba
m'o -rulephu teke ono:
Ekemu iya bẹ ya a-tụshi;
ye ẹphe l'egomunggo;
dee ya ode ẹkwo l'obu ẹphe;
k'ọphu ẹphe a-majẹru iphe
ya sụru t'ẹphe mee.
Ya a-bụru Nchileke ẹphe;
ẹphe abụru ndibe iya.
11 Ẹ to nwehedu onye
ejekwadu ozi ibe iya;
m'ọ bụ zilahaa nwunne iya
t'ọ ‘Maru Nnajiufu.’
Ishi iya abụru l'ẹphe l'ẹphe
ha; a-tụkowa maru iya;
mbụ iphe bụ ẹge ẹphe ha:
nwata l'ọgurenya.
nwata l'ọgurenya.
12 Ya a-phụru ẹphe imiko
l'emeswe,
l'emeswe,
ẹphe mesweshiru iya;
To nwehe lẹ ya
anyatakwadụ iphe dụ ẹji,
ẹphe meshiru iya ọdo.”
13 Keshinu ọphu Nchileke kweshiru ụkwa iphe ọphu dụ ẹge ono l'ọgba-ndzụ ọphu bụ k'ọphungu; bụnu iphe ọ bụ bụ lẹ k'ọdungu phụ b'o wowaru nwuchi l'ọ bụ iphe kahụwaru akahụ. Tẹmanu bẹ iphe bụ iphe kahụwaru akahụ; tsụwa ụme te nwekwa ẹge ọo-nọ-bebe; yo chihu.