40
Aadụ ndu kẹ Nchileke ike
1 Unu dụnua ndibe mu ike!
Unu dụa ẹphe ike!
Ono iphe Nchileke unu ekfu ndono.
2 Unu kfuaru ndu Jerúsalemu okfu bẹlebele.
Unu emee t'ẹphe maru
l'ozi-ike ono, ẹphe eje ono;
bẹ gvụwaru nụ.
L'a gụwaru ẹphe nvụ
l'iphe dụ ẹji, ẹphe meshiru.
L'ewere, ẹphe nataru l'ẹka
Ojejoje
hakwa l'ọ bụ iphe dụ ẹji, ẹphe meru;
mbụ l'ọ ha l'ọ bụ iya ugbo labụ.
3 O nweru onye echi mkpu; sụ:
“Unu waarụ Ojejoje ụzo l'echi-ẹgu.
T'a chịkwaaru Nchileke eze ụzo l'echi-ẹgu.*40:3 Mát 3:3.
4 Ẹke, dụ nsụda nsụda;
e nwuchikota iya enwuchi.
Iphe bụ eze ugvu;
mẹ ugvu nshịi;
a kpọ-zekota iya.
Ẹke, dụ nsụkutu-nsụkutu;
a razee ya t'ọ yịko ayịko.
Ẹke dụ
nkwọgodo-nkwọgodo;
e mee ya t'ọ daburu pongu;
5 k'ọphu ee-kpuha ọdu-biribiri Ojejoje t'a phụ iya.
Iphe bụ madzụ a-phụ iya;
kẹle Ojejoje gudewaa ọnu iya kfua ya.”
6 O nweru olu, sụru:
“Tẹ mu chia mkpu!”
Mu ajị iya:
“?Bụ mkpu ngụnu;
bẹ mu e-chi?”
Yọ sụ mu: “Tẹ mu sụ l'iphe,
bụ madzụ dụkota l'ọ bụ ẹgbudu.
L'ọ bụ ẹge ono, ẹgbudu
amajẹ ono bụ ẹge madzụ
amajẹ.
Ọoduje l'ọ bụ igu oshi, nọ l'ẹgu.
7 Ẹgbudu -nwụa kpaa; igu iya erishihu
teke Ojejoje tụshiru ẹphe ume.
Ishi iya bụlephu lẹ madzụ bụ ẹgbudu.
8 Mbụ l'ẹgbudu -nwụje kpaa;
igu iya erishihu.
Obenu l'okfu Nchileke ayi
a-nọ gbururu jeye.”†40:6-8 1 Pyit 1:24-25.
9 Je evudo l'eli eze ugvu;
nggụbe Záyọnu, byaru
ozi-ọma.
Nggụbe Jerúsalemu,
byaru ozi-ọma;
wolia olu chia mkpu!
Wolia olu; ba atsụkwa egvu!
Kfuru mkpụkpu, nọtsua
lẹ Júda-a:
“Nchileke unu ndọ-ọ!”
10 Unu lekwa! Nnajiufu,
bụ Ojejoje gudekwa ike l'abya.
Ọ bụ ike iya; bẹ oo-gude chịa.
Unu lekwa! Obunggo; nọkwa iya l'ẹka;
ọkfu ụgwo etsoru iya.
11 Ndu awụ etso iya nụ;
bẹ ọonoduje eche l'ọ bụ onye eche atụru.
Ọ nọdu achịkobeje ụnwu
atụru ono heru l'ẹka;
mbụ ọo-nmakụbe ẹphe l'ọkpoma iya.
Ẹge ono bẹ ọo-nọdu atọje
nwẹhu edu ndu ọphu he nwa.
12 ?Bụ onye dụjewaru ike gbaa
ẹka okophoro gude tụ̀a
mini, nọ lẹ mgboko atụ̀tù;
m'ọ bụ gude nkwo-ẹka tọo akpamigwe l'ọ ha?
?Bụ onye dụjewaru ike
kpokoo udzu, nọ lẹ mgboko lẹ nkata;
m'ọ bụkwanu pata eze ugvu
tụ̀a l'iphe aatụ̀je ẹra iphe;
13 ?Bụ onye tụjeru Ojejoje iphe oo-me?
?Bụ onye kpọ-zijeru iya ụzo;
sụ iya l'ọwaa bụ iphe oo-me?
14 ?Bụ onye bẹ Ojejoje
jejekporu ọkpata ishi iphe?
?Bụ onye zijeru iya ụzo
ọphu bụ ọkpobe iya?
?Bụ onye b'ọ bụ;
mbụ onye ziru iya iphe ọ maru;
mbụ bụ onye koshiru iya
ụzo, oo-shi t'iphe doo ya ẹnya?
15 Ishi iya bụlephu l'iphe bụ mbakeshi gbaa
mgburumgburu halẹphu
l'ọ bụ mini, tadaru l'efere.
Iphe a gụberu ẹphe bụ-a
udzu, nọ l'iphe aadaje iphe.
Ẹke, bụ ikfuli; bẹ ọotuje
l'ọ bụ onye atụ udzu.
16 Mbụ l'ọswa, nọ l'ugvu ugvu
Lébanọnu te dzukwa
ọburu nkụ oye l'ọku.
Ọphu anụ, nọkota iya nụ
'edzukwaphu t'e gbushia ya
gude gwooru Ojejoje
ngwẹja-ukfuru.
17 Iphe bụ mbakeshi ta dụdu
iphe ẹphe bụ l'ifu iya.
A gụberu ẹphe iphe
mmanu; mbụ l'iphoro
ka ẹphe nshinu.
18 ?Bụ onye bẹ unu a-tụkporu Nchileke yeru?
?Bụ egbe ntẹkpe ngụnu
bẹ unu a-sụ lẹ yẹle iya bụ iphe lanụ?
19 L'a -bya l'iphe a kpụru akpụkpu;
onanu bụ onye eme nka kpụru iya.
Yọ bụru onye akpụ ụzu,
akpụje mkpọla-ododo
wụru iya mkpọla-ododo;
bya emetaru iya
gwọgirigwo mkpọla-ọcha.
20 Onye, akpakpọ ụkpa;
k'ọphu ẹ tọ dụdu ike anụ
Nchileke egbe iphe ono;
ejeje afọta oshi, te eridu
avụrukpa; je achọo onye emenwu nka ẹhu;
yọ bya apyịaru iya ntẹkpe,
ta byadụ afọfu afọfu gvuberu iya.
21 ?Unu ta mahaadụa tọo.
?Unu ta anụbudua ya?
?Te kfubuaru iya unu
shitakpoo lẹ mbụ tọo?
?To dodua unu ẹnya ẹge
e gude tọo ntọ-l'alị mgboko tọo?
22 L'ọ nọ l'aba-eze iya l'ephekerephe;
nọghata eliphe mgburumgburu.
Ndu, nọ iya nụ ahakọtajele
iya phụ l'ọ bụ ụnwu ogu.
Eligwe b'ọ gbasaru l'ọ bụ nchanwụ;
bya eworu iya gesaa l'ọ bụ
ụlo-ẹ́kwà t'e buru l'ime iya.
23 Ndu bụ ishi bẹ oomeje
ẹ tọ dụdu iphe ẹphe abụ.
Yọ bya emee ndu achị
mgboko-a ẹphe abụru iphe-mmanu.
24 Ọobuje; aanọdukwadua akụ iya;
aanọdukwadua adza iya;
ọonodukwadua agbabe akwara;
yọ phụa ya ọnu; yọ nwụa kpaa;
oke phẹrephere abya eruta iya l'ọbu ẹswa.
25 Onye nsọ ono jịru; sụ:
“?Bụ onye bẹ unu a-tụru iya yeru?
?Bụ onye bẹ unu ekfu lẹ yẹle iya ha?”
26 Palinua ẹnya lekota igwe.
?Bụ onye meshiru
iphemiphe ọbule ndu-wa?
Mbụ onye ono, meru
igweligwe mkpọ-kpodo avọshia;
bya ekutsua ẹphe ẹpha l'ẹhu l'ẹhu.
Yọ bụru ike, ha nshinu,
o nweru; mẹ agburu-ẹhu, ha nshinu,
o nweru b'o gude mee
tọ dụ mkpọ-kpodo ono;
m'ọo nanụ ephuhujenu.
27 Unubẹ ndibe Jékọpu;
?nanụ ẹge ọ dụ bẹ unu ekfu egbe okfu ọwaa?
Unubẹ ndibe Ízurẹlu;
?bụ ngụnu kparu iphe
unu agụ aphụ?
Kẹ l'unu ekfu lẹ Ojejoje
ta aphụjedu iphe-ẹhuka, unu eje;
tọo kpa ishi tẹ ya meeru
unu iphe gbaru unu.
28 ?Unu ta mahaadụa tọo?
?Unu ta anụbua
lẹ Ojejoje bụ Nchileke,
a-nọ jeye lẹ tutu yoyo?
Yọ bụru iya meru
mgboko jeye l'ẹke o jebekotaru.
Ike ta agvụdu iya;
ọphu ụvo agvụdu iya;
ọphu ọ dụdu onye
amakọta-gheru ẹge
iphe doberu iya ẹnya.
29 Oomeje; tẹ ike dụ onye meji tọfuru;
bya emee t'ụvo dụ onye
ụvo ta nọdu.
30 Ụnwu ọgbo lanụ ono;
bẹ ike agvụjekwa;
ndu kẹ ụnwu okorọbya
evukota iphe daa;
31 obenu lẹ ndu chịru ẹka
kwẹe lẹ Ojejoje;
bẹ ike a-nọdu aka akaka l'eje.
Ẹphe a-gba ẹ́bà l'ọ bụ ugo.
Ẹphe a-gba ọso;
ike ta agvụ ẹphe.
Ẹphe ejee ije;
nkwo ta atsụ ẹphe ụme.

*40:3 40:3 Mát 3:3.

†40:8 40:6-8 1 Pyit 1:24-25.

© 2014 WBT