52
1 Tehu! Tehu etehu; nggụbe Záyọnu!
Yee ike l'ọ bụ uwe!
Yee uwe, e-me; t'ị dụ biribiri l'ẹnya.
Nggụbe Jerúsalemu,
bụ mkpụkpu ono, dụ nsọ ono.
Ndu akpapyị; ẹphe lẹ ndu, aasọ nsọ
ta abatakwa l'ime ngu ọdo.
2 Jịshia udzudzu, nọ ngu nụ!
Gbeshi; nọdu anọdu;
nggụbe Jerúsalemu!
Tụfu ẹgbirigba, a tụru ngu l'olu;
nggụbe ada Záyọnu ono,
a kpụru lẹ ndzụ ono!
3 Ọwaa iphe Ojejoje ekfu: “L'e shi ree unu erere; ọphu a natadu aswa ishi unu. Ọo ya bụ l'e tee gudekwanu okpoga agbata unu.” 4 Ishi iya abụru l'ọo iphe Nnajiufu, bụ Ojejoje ekfu ndọ-ọ: “L'ọdungu; bẹ ndibe mu shi laa Íjiputu je eburu. Tẹmanu yọ bụ-worua bẹ ndu Asiriya shi akpa ẹphe ẹhu.” 5 Ọwaa iphe Ojejoje ajịkwanu ndọ-ọ: “?Bụhunu ngụnu dụ ẹge-a. Nta-a b'a kpụkoru ndibe mu l'ẹ b'ọ dụ iphe ẹphe meru. Tẹmanu ndu ishi ẹphe egude ẹphe eme iphe-ọchi.” Ọ bụ iphe Ojejoje ekfu ndono. “Iphe bụ mkpụrumkpuru bẹ ẹphe ekfubyishi ẹpha mu tekenteke. 6 Ọo ya bụ lẹ ndibe mu a-maru ẹpha mu. Mbụ l'o be mbọku ono bẹ ẹphe a-maru l'ọ bụ mbẹdua kfuhawaru iya!” Iye. Ọ bụ mbẹdua gẹdegede.
7 Ọ kwanu iphe ùgvù;
o shi l'eli ugvu ugvu;
phụ onye gude ozi-ọma abya;
mbụ onye ezi ozi nchị ọdu ndoo;
onye, ozi ọ byaru ezizi dụ mma;
onye byaru ozi kẹ ndzọta; l'asụje Záyọnu:
“L'ọ kwa Nchileke ngu bụ ishi!”
8 Gebeduduphu!
Ndu nche ngu atụkwa ụzu.
Ẹphe tụko atụ okokooko
kẹ l'ẹphe e-gude ẹnya ẹphe
phụ Ojejoje teke ọo-nọdu alata lẹ Záyọnu.
9 Unu byiswekota egvu
ẹhu-ọtso-ẹna ugbo lanụ
unubẹ mkpọkpo iphe nọ lẹ Jerúsalemu;
kẹle Ojejoje dụwaru ndibe iya ike.
Ọ dzọwaru Jerúsalemu.
10 Ojejoje a-rụkota ẹhu;
gude ike iya, dụ nsọ dzọo ndibe iya;
iphe bụ mgboko a-phụkota iya.
11 Unu gbeshi!
Unu gbeshi!
Unu wụfu l'ẹke ono!
Unu be ebyikwa ẹka l'iphe aasọ nsọ!
Unu sefukwa iya ẹka!
Unu mekwaa onwunu
emekwa;
emekwa;
unubẹ ndu ono,
mbụ unubẹ ndu ono,
evuje ngwokongwoko
eze-ụlo Nchileke!
eze-ụlo Nchileke!
12 Obenu l'unu ta alakwa lẹ
gburugburu;
gburugburu;
ọphu unu 'agbakwa phuphuphu ala;
kẹle Ojejoje e-vutaru unu ụzo.
Mbụ l'ọ bụ Nchileke kẹ ndu
Ízurẹlu a-bụru onye e-kperu unu azụ.
Iphe, nọru Nwozi ono
13 “Lekwa; nwozi mu e-mekwa
umere onye maru iphe.
Aa-pali iya eli; gụ-lia ya
oreke-imeli; shi ẹge ono palia ya ifu nshinu.
14 Ọ bụ ẹge ọ gbaru ụgbugba meru;
ẹkpa-oyi anyịa ndu,
dụ l'igwe, phụru iya nụ.
Ẹ ta phụbua onye gbaru ẹge ono;
mbụ l'ẹ tọ dụkpodua
l'ọ bụ madzụ lẹ phuu.
15 Ọ kwaphu ẹge ono;
bẹ ọo-dụ igweligwe
mbakeshi biribiri.
Ndu eze bẹ ọo-kpọ okfu;
kẹ l'ẹphe a-phụ iphe
ẹ te kfuduru ẹphe.
Ẹge ono bẹ iphe ẹphe ta
nụbudua lẹ nchị e-do ẹphe ẹnya.”*52:15 Róm 15:21.