61
Afa, Ojejoje e-koshi ifu-ọma
1 Ume Nnajiufu, bụ Nchileke nọ mu l'ẹhu;
kẹle Ojejoje wụru mu manụ;
tẹ mu je ezia ndu aakpa ẹhu ozi-ọma;
mu eje adụa ndu meji tọfuru ike;
mu je ezia ndu a kpụru lẹ ndzụ;
l'ẹphe e-nweru onwẹphe;
mu ezikwaaphu ndu nọ
lẹ mkpọro l'aa-ha ẹphe.
2 O ziru mu tẹ mu bya
araa ya arara l'afa,
Ojejoje e-meru ndu nk'iya
eze-iphe-ọma ruwaru;
yẹle eswe mbọku, Nchileke
ayi a-gbarụ ndibe iya
ọdzori; dụa ndu aphụ byaru l'ẹphe ha ike.
3 O ziru mu tẹ mu bya etsua
ẹphe ẹka l'obu, bụ ndu
aphụ tsaru lẹ Záyọnu.
Mu eworu okpu,
ama mma kpube ẹphe
l'ọzori ntụ, ẹphe shi kpua onwẹphe.
Mu awụa ẹphe manụ
ẹhu-ọtso-ẹna l'ọzori nggụmaphu;
mu eyee ẹphe uwe
egvu-ọma l'ọzori obu-anmafụ
Iphe aa-nọdu eku ẹphe
bụ achị k'odobe-ẹka-ndo.
Ẹphe a-bụ oshi,
Ojejoje gude ẹka iya dzabẹ;
ẹphe abụru ndu dụ biribiri;
shi ẹge ono koshi ẹge
Nchileke dụbe ugvu.
4 Ẹphe a-kpụkwakota ọkpu-ufu ono,
shigbaa lẹ ndiche ono;
bya achịko ẹke ono,
ẹgbara kfụru ono mekwazikota.
Iphe bụ mkpụkpu ono,
shiwa keshinu ẹnya ẹ te rudu
dakpọshihu adakpọshi ono;
bẹ ẹphe e-mekwazikota.
5 Ọ bụ ndu shi eshishi a-nọdu
echeru ngu eghu mẹ atụru ngu.
Ndu mba ọdo abụru
ndu a-nọdu ejeru ngu
ozi ẹgu yẹle ozi mgbo vayịnu ngu.
6 Iphe aa-nọdu eku unu
bụ “ndu achịjeru Ojejoje ẹja.”
Iphe aa-gụbe unu abụru
“ndu ejeru Nchileke ayi ozi.”
Ọ bụ ẹku mbakeshi;
bẹ unu a-nọdu eri.
Mbụ yọ bụru iphe
enweru-enweru ẹphe;
bẹ unu e-gude eku onwunu.
7 Ndibe mu a-nata òkè-iphe lẹ
ntụkwase l'ẹka ẹphe l'ọzori
iphe-iphere, a ga eme ẹphe.
Ẹphe a-nọdu ete ẹswa l'òkè,
ẹphe hataru; l'ọzori, ifu,
ge ekpu ẹphe lẹ ntụ.
Ẹge ono bẹ ẹhu-ọtso-ẹna
a-bụru nk'ẹphe gbururu jeye lẹ gbururu.
8 “Kẹle mbẹdua, bụ Ojejoje.
Iphe adụje mu mma abụru ikpe, dụ maa.
Iphura; mẹ ẹjo iphe dụ mu ashị.
Mu e-gude ire-lanụ bua ẹphe nggo;
mu l'ẹphe agbaa ndzụ tutu yoyo.
9 Eri ẹphe abụru ndu a maru
amaru l'iphe bụ mbakeshi.
Ẹge ono bẹ ọha a-maru awa ẹphe.
Iphe bụ onye phụru
ẹphe a-majẹleruphu
l'ẹphe bụ ndu Ojejoje keberu k'ọma.”
10 Ẹhu atsọ mu ẹna nshinu
l'iphe Ojejoje meru.
Mbụ l'ẹhu atsọ ẹna l'ime
Nchileke mu;
Nchileke mu;
kẹ l'o yewaru mu ndzọfuta l'ọ bụ uwe;
bya egude odobe-ẹka-ndoo
kwa mu yẹgelengu l'ọ bụ
onye yeru kpowula-kpowula uwe;
l'ọ bụ onye kpu iphe e gude
mamaa memakota l'abya ọlu nwanyi;
mbụ; l'ọ bụ onye, aabya ọla nji;
gude iphe-nchị; iphe-olu;
mẹ mgbalẹka iya kwaa onwiya.
11 Kẹ l'ọ bụ ẹge alị emeje t'iphe fushia;
mẹ ẹge mgbabu emeje t'iphe
a kụru iya kpofushia;
bẹ bụ ẹge Nnajiufu,
bụ Ojejoje e-me tẹ
odobe-ẹka-ndoo;
odobe-ẹka-ndoo;
mẹ ajaja wụfuta l'iphe bụ mbakeshi.