22
Ikpe, e kperu ndu ẹjo eze
1 Ọwaa iphe Ojejoje ekfu ndọ-ọ; wo mu: “Tẹ mu jee lẹ kẹ eze ndu Júda je araa ozi-a arara l'ẹke ono: 2 Nggụbe eze ndu Júda; mbụ nggụbe onye ono, nọ l'aba-eze Dévidi ono; nggu lẹ ndu ozi ngu; mẹwaru ndibe ngu, bụ ndu eshije ẹke-a bahụ; unu ngabekwa nchị; nụa iphe Ojejoje ekfu. 3 Ọwaa iphe Ojejoje ekfu: Unu kpeje ikpe, dụ maa; unu emeje iphe ẹ te enyochadu enyocha. Unu dzọjee onye a naru nfụ l'ẹka onye emegbu iya emegbu. Unu ba akpakwa ndu laru alala ẹhu; unu ta akpa iya ndu a tọru ogbe; mẹ ụnwanyi, maa tụfuru. Unu ba adụkwaru ẹphe ẹhuka; ọphu unu 'egbujeshi ndu ẹ-te nwedu iphe ẹphe meru l'ẹke-a, dụ nsọ-a! 4 Kẹ l'ọ -bụru l'unu jiru obu oyi; mee iphe-a, ya sụru t'unu meje-wa; bẹ ndu eze, nọ l'aba-eze Dévidi; ndu ejeru ẹphe ozi; mẹ ndibe ẹphe e-gude ụgbo-ịnya; gude ịnya; shi lẹ nggamgbo ufu-eze-a l'alụfu alụfu; l'abata abata. 5 Obekwanu; l'ọ -bụru l'unu te emedu iphe ya sụru t'unu mee; tẹ ya gudekwa onwiya riaru unu nte; bẹ ẹgbara e-mekochakwaa kfụa l'ufu-eze-wa.” Ono iphe Ojejoje ekfu ndono.
6 Ọwaa iphe Ojejoje ekfu l'okfu ẹhu ufu-eze eze ndu Júda:
A makwaru-a l'ị dụ l'ọ bụ
alị Gíledu l'ẹke ya nọ;
mbụ l'ọ bụ ẹge ugvu ugvu Lébanọnu dụ iya.
Obenu l'ẹ tọ dụ iya e-me;
tẹ ya be eme ngu t'ị bụru echi-ẹgu;
mbụ l'ọ bụ mkpụkpu,
ẹ-te budu ebubu.
7 Ya e-zi ndu
mgbugbu-madzụ;
t'ẹphe byaru ngu ọgu;
onyenọnu;
yẹle ngwa-ọgu nk'iya.
Ẹphe abya egbutsushia
ẹgiri oshi sida ngu ono;
chịru ye l'ọku.
8 “Ndu shigbaa l'ọha, dụ igweligwe e-sweta lẹ mkpụkpu-a; l'ajịtsua ibe ẹphe; sụ: ‘?Bụ ngụnu meru iphe Ojejoje meru egbe iphe ọwaa l'ẹhu eze mkpụkpu-a?’ 9 Aa-sụ ẹphe l'iphe kparu iya nụ bụ okfu l'ẹphe gwọberu ọgba-ndzụ Ojejoje, bụ Nchileke ẹphe; je awata ọkpo ishi l'alị l'anụ agwa; balahakwaaaru iya phụ ẹja.”
10 Unu ba rakwa ẹkwa onye
eze ono, nwụhuru nụ ono!
Ọphu unu 'emekwa ẹkwa iya!
Ọ bụ-chikwa onye unu
a-kwa ẹkwa iya kwashịa ya ike
bụ onye ọphu a kpụru lẹ ndzụ laa ẹka ọdo.
Ishi iya abụru l'ẹ tọo latahẹdu;
ọphu ọophuhedu alị ẹke,
a mụru iya ọdo.
11 Kẹ l'ọwaa kwa ẹge Ojejoje kfuru okfu ẹhu Shalumu Josáya, bụ onye nọ-chiru ẹnya nna iya; bya abụru eze, achị ndu Júda; mbụ onye ono, ẹ-ta nọhedu l'ẹke-a ono: “Ẹ tọo latahẹkwa. 12 Ọ kwa l'ẹke ono, ẹphe kpụru iya lẹ ndzụ laa ono bẹ ọo-nọdu nwụhu. Ẹ tọo phụhekwa alị ẹke-a ẹnya ọdo.”
13 “T'aphụ tsọkwaru onye
gude ụgho l'akpụ ufu-eze iya;
mbụ gude ụzo,
ẹ-te vudodu nhamụnha
l'arụshi ime ụlo k'eli eli;
onye meru ndu alị iya;
ẹphe ejeru iya ozi ẹwoma;
tọ kfụ ẹphe ụgwo ozi ẹphe.
14 Ọosuje lẹ ya a-rụru
onwiya ufu-eze, ha nshinu;
ẹke ime ụlo k'eli eli iya
a-bụgbaa gaga-gvugvu.
Ya abya eyeshia ya windo;
gude oshi sida gbaa ya agbagba;
bya agbaa ya penti uswe.
15 ?Bụ ogude oshi sida kụshia
ụlo e-me t'ị bụru onye eze tọo?
Nna ngu; ?to shidu eri; l'angụ?
?To shidu l'ekpe ikpe, dụ maa;
l'eme iphe gụru iphoro;
iphemiphe ọbule adụru iya lẹ mma.
16 Ndu eje iphe-ẹhuka;
mẹ ndu ẹ-te nwedu ẹge ọ ha
ẹphe; b'ọ gbaru ọdzori;
yọ dụru iya lẹ mma.
?Tọ bụdu iphe ono bụ lẹ
madzụ maru onye ya bụ?
Ono iphe Ojejoje ekfu ndono.
17 “Obenu lẹ nggụbedua;
bẹ ẹnya ngu;
mẹ ọkpoma ngu bụ l'ẹke
i cheberu iya bụ l'ori uru ghẹlegheleghele;
yẹle ogbu ndu ẹ-ta adụdu
iphe ẹphe meru;
omegbu madzụ emegbu yẹle ome-l'iwe.”
18 Ọo ya bụ l'agha; ọwaa kwa iphe Ojejoje ekfu l'okfu ẹhu Jehoyakimu nwatibe Josáya, bụ eze, achị ndu Júda:
“Ẹ to nwedu l'ẹphe araa ẹkwa; sụ:
‘Owe-e nwunne mu nwoke-e!
Owe-e nwunne mu nwanyi-e!’
Ẹ taa rakwa ẹkwa iya; sụ:
‘Owe-e onye nwe mu nụ-e!
Owe-e Ọnyibe!’
19 Ee-li iya l'ọ bụ onye eli nkakfụ-ịgara.
Mbụ l'aa-kpụ iya akpụkpu;
kpụta iya je etufaa l'azụ Jerúsalemu.”
Okfu ẹhu Jerúsalemu
20 “Unubẹ ndu Jerúsalemu.
Unu jekwa l'ugvu ugvu
Lébanọnu je echia mkpu!
Tẹ ndu alị Báshanu nụkwaa olu ngu!
Jekwa je anọdu l'ugvu ugvu
Abarimu chia mkpu;
kẹle ndu nggu l'ẹphe
tụgbaru bụru nanụ;
b'e gbushikotaakwaru
l'ẹphe ha.
21 Ya nmaakwaru ngu
ọkwa teke ono, i shi dobesu
l'ẹ to nwedu iphe byaru
bya eme ngu nụ ono;
nggu asụ l'ẹ tii yedu ọnu.
Ono kwa ẹge i shi teke
ị bụ nwokorọbya meta ndono.
Ẹ tii mebukwaa iphe ya sụru t'i mee.
22 Phẹrephere a-tụko ndu
echeru ngu atụru pata.
A tụko ndu nggu l'ẹphe
tụgbaru bụru nanụ kpụa lẹ ndzụ.
Ono teke iphere e-gude ngu;
woru ngu ifu kpua lẹ ntụ.
Ishi iya abụru iphe dụ ẹji iimebe.
23 Unubẹ ndu bu l'ugvu ugvu Lébanọnu;
mbụ ndu, nọ l'ẹhu-ọtso-ẹna
ụlo, a kụru l'oshi-sida;
egbe ude, unu e-mekochaa
tsụa teke iphe-ẹhuka a-zụ
unu gbirimu;
unu gbirimu;
mbụ melahaa unu ẹhuka
l'ọ bụ nwanyi, ime eme!”
Okfu ẹhu Jehoyakinu
24 Ọwaa iphe Ojejoje ekfu. Ọ sụru: “Kamẹnu; l'ẹ to nwekwa m'o -ruhuru; Jehoyakinu Jehoyakimu, bụ eze ndu Júda bụru echi-ọhubama, ya gba l'ẹka-ụtara iya; bẹ ya a-gbafụlekwa ngu-a. 25 Ya e-woru ngu ye l'ẹka ndu achọ ndzụ ngu; mbụ ndu ịitsu egvu; mbụ l'ẹka Nebukadineza, bụ eze ndu Bábyilọnu yẹle ẹka ndu Bábyilọnu. 26 Ya e-tufakpele ngu phu etufa; nggu lẹ nne, mụru ngu nụ; je eche l'alị ndu ọdo; ẹke ẹ-ta bụdu ẹke a mụru ngu; nggu lẹ nne ngu. Yọ bụru l'ẹke ono bẹ unu 'ẹbo a-nọdu nwụhu. 27 Ẹ to nwedu l'unu alaphuta azụ l'alị ono, a-gụ unu alata ono.”
28 Jehoyakinu-a; ?ọ bụ ite-ụra, tụkpohuru atụkpohu;
a jịka iya ajịka tọo?
Mbụ iphe ẹ-ta dụdu
onye ọ dụ mma?
?Bụ ngụnu kparu iphe
e tufaru yẹle ụnwegirima
iya je eche l'alị ẹke ẹphe ta madụ?
29 Nggụbe alị Júda;
ngabekwa nchị;
nụa iphe Ojejoje ekfu!
30 Ọwaa iphe Ojejoje ekfu
ndọ-ọ:
ndọ-ọ:
“Dee nwoke-wa l'ẹkwo l'ọ bụ
onye ẹ-te nwedu nwa;
onye iphe ta byadụ bya
adụru lẹ mma teke ọ nọ ndzụ.
Ishi iya abụru l'ẹ tọ dụdu
ụnwu iya ọphu iphe
byaru bya adụru lẹ mma.
Ọphu ọ dụdu ẹphe onye
ọphu byaru bya anọdu l'aba-eze Dévidi;
m'ọ kwanụ chịa ndu Júda.”