47
Ozi ẹhu ndu Filisutayịnu
1 Ọwaa bụ iphe Ojejoje ziru Jeremáya lẹ kẹ okfu ẹhu ndu Filisutayịnu; tẹmanu bẹ Fero byadẹru bya etso ndu Gáza ọgu.
2 Ọwaa iphe Ojejoje ekfu:
“Unu lewaru ẹge mini shi l'ụzo
isheli l'abya kulakula.
Oo-mekochaa bụru
utso l'abya kulakula.
Ọo-tsọ-kputa alị;
mẹ iphe bụ iphe nọkota iya nụ;
tsọpyabe mkpụkpu;
mẹ onyemonye ọbule, bu iya nụ.
Ndu ono e-chi mkpu;
iphe bụ ndu bu l'alị ono atụa ụzu-ẹkwa.
3 Mbụ l'ẹphe -nụlephu
igidi-ọkpa ịnya ẹphe;
bya anụa ụzu ụgbo-ịnya ndu ọhogu ẹphe;
yẹle kwọkiri kwọkiri,
ọkpa ụgbo-ịnya ẹphe ono eme
bẹ ndu bụ nna te elehedu
ẹnya l'azụ k'oheta ụnwegirima ẹphe.
Ẹka a-tụlashihu ẹphe.
4 L'oge ruakwaru teke
ee-mebyishikota ndu
Filisutayịnu l'ẹphe.
Ee-me tẹ nwa ndu ọphu
phọduru nụ, bụ ndu gega
eyeru ndu Táya; mẹ ndu Sayịdonu ẹka chịhu;
kẹle Ojejoje abyaakwa
omebyishi ndu Filisutayịnu;
mbụ nwa ndu phọduru nụ
lẹ ndu alị Kafuto.
5 Ndu Gáza kpụshiwaru ishi-aphụ;
ndu Ashikelọnu;
b'a lawaru l'iyi.
Sụa; unubẹ nwa ndu ọphu
phọduru lẹ ndu Enaku;
?unu e-yejashịkpoo onwunu
ẹge-a jeye teke ole?
6 Nggụbe ogu-mbeke Ojejoje;
?bụ teke ole; bẹ ịi-tụta ume?
Kabẹnu mịru onwongu yee l'ọbo!
Tụtanu ume; nọdu nwangijinggiji!
7 Ọlobu; ?nanụ ẹge oo-shi nọdu nwandoo
l'ẹke unu elewaa ẹnya lẹ
Ojejoje tụwaru iya ọtu ekemu
t'e je alụa ndu Ashikelọnu
yẹle ndu iku eze ẹnyimu?
Ọ bụ ẹge ono b'o kfuwaru l'ọo-dụ.”