4
Ọnu, Elifazu eye
1 Tọ dụ iya bụ; Elifazu,
bụ onye Témanu abya
eyee ọnu; sụ:
2 “A -sụkwanu tẹ ya yee ọnu;
?to ghudu ngu nụ eghughu.
Ọbu; ?bụ ẹge iphe adụje
ndọ-ọ;
ndọ-ọ;
madzụ edobe ọnu ndoo.
3 Lewaru; nggụbe onye
zikotaru ndu ọdo iphe;
ndu ike gvụru
b'i gbọ-likotaru.
4 Ndu ụkfu dụru
b'i kfuru okfu nụ;
okfu ngu ono agbọ-lia ẹphe.
Ikpere ngwọrinaka b'i meru; yọ kfụru.
5 Nta-a bẹ iphe-ẹhuka byaru nggụbedua;
tii mahẹ ụzo, ii-shi iya.
Ọ zụru ngu lẹ gbirimu;
meji atọfu ngu.
6 Egvu ono, ịitsu Nchileke ono;
?tọ bụdunua ya ga bụ agbarike ngu;
ụta ono, ẹ-ta lẹ ndzụ ngu ono;
abụru ẹke ịi-ga achịru ẹnya ye.
7 Rịnua ya arịri; ?nanụ onye
iswi dụ mma, lajẹru l'iyi.
?Ị phụjeru l'onye doberu
ẹka ndoo chịhuru nụ lẹ mgboko?
8 Iphe, mu phụwaru gbe
bụ-chikwaaru lẹ ndu akọ
ẹjo iphe l'ọ bụ okfu;
l'akụ ẹjo iphe akụku;
bụkwa iya phụ bẹ ẹphe akpatajẹ.
9 Nchileke -zụa ume;
ẹphe abụru kpurupyata.
Ẹhu-eghughu iya
-swọ-lihu; ẹphe abụru iyi.
10 Ọobujekwa agụ degee ekiri;
yo mee ẹnari.
Obenu l'oke agụ
bẹ aaswọje eze.
11 O -nwedu iphe agụ e-ri;
ẹgu egbua ya;
ụnwu iya agbakashịhu.
12 A byaru bya atakpeeru mu okfu;
mu anụ-sweta iya anụ-sweta.
13 Mu anọdu l'arọ ẹjo nrọ
l'ẹnyashi teke ono,
ndiphe adajẹwa
nda-mgbẹnya ono;
14 Mu awata ọtsu egvu;
ẹhu anmalahaa mu anmanma;
k'ọphu bụ l'ọkpu,
nọ mu l'ẹhu nmahụru mu jijiji.
15 Yo nweru maa,
byaru bya alọo swaa;
shia mu l'ifu sweta.
Ẹhu anwụle mu phụ kpaa.
16 Yọ bya anmagaru;
ọle mu ta adụkwanu
ike kọo ẹge ọ gbaru.
Ọ bụlephu l'o nweru
iphe, vudo mu l'ifu.
Ẹke ono adalẹphu shịkongu.
Yo nweru olu, jịru mu; sụ:
17 ‘?O nweru ẹge ee-menua
tẹ madzụ mmanu bya aka
Nchileke odobe-ẹka-ndoo?
?O nweru ẹge ọo-dụnua
tẹ madzụ bya adụebe mma
l'ifu onye keru iya nụ?
18 Ọ -bụru lẹ Nchileke te
gudedu ire ndu ejeru iya ozi ẹka;
l'abajẹru ojozi-imigwe iya
m̀bà l'iphe, ẹphe mesweru;
19 ?bụchia madzụ, bu l'ụlo ẹja,
bụ ẹja b'e gude tụa ọkpa iya;
adzọ-gbu iya aka ntse
malẹ ọdzo-gbu erukfuru.
20 Tsube l'ụtsu jeye l'urẹnyashi;
b'e gwewaru madzụ ogwe uri;
t'o nwe onye ẹnya iya e-ru iya;
yọ bụru kpurupyata.
21 Ọ -bụru l'agbabufuru eri,
gude ndzụ ẹphe;
?ẹphe ta anwụhudu
l'ẹphe ẹ-be enwe egomunggo.’ ”