13
1 “Mbẹdua gudeekwa ẹnya mu
phụkota iphe ono l'ọ ha;
bya egudewa nchị mu nụa ya;
yo doo mu ẹnya.
2 Iphe, unu maru;
bẹ mbẹdua makwaru-a.
Ẹ to nwekwa ẹke
ẹnya mu laru l'ẹke unu nọ.
3 Obenu l'ọ dụ mu t'a sụ lẹ mu
e-kfuru nụ
Ọkaribe-Kakọta-Ike.
Tẹ mu lẹ Nchileke l'onwiya tụa ya.
4 Obenu l'unubẹdua gude
ntuphu-ire egbugbo mu.
Unu bụkota mkpọkoro
ndu njibya l'unu ha!
5 Ọ dụ mu t'a sụ l'unu a-tụko
l'unu ha dobe ọnu ndo;
kẹ l'ọ bụ ono g'e-koshi
l'unu bụ ndu, maru iphe.
6 Unu ngabẹwaru nchị
tẹ mu yee ọnu!
Unu ngabẹ nchị;
nụa iphe, mu ekfu!
7 ?Bụ ngụnu meru iphe unu adzụ ẹjo-ire;
sụ l'ọo Nchileke bẹ unu ekfuchitaru.
?Bụ Nchileke;
bẹ unu e-gude ẹregede l'ekfuchitaru tọo.
8 ?Unu eme t'unu gbataru Nchileke tọo.
?Bụ unu a-gbaru iya ọdzori tọo.
9 Nchileke -je unu enyochaa;
?unu adụa ike mee ya eswe
ẹge madzụ emeje ibe iya.
10 Ẹ to nwekwa ẹge ee-me tẹ
Nchileke ba abaru unu mba;
mẹ unu wata ọkpa oke lẹ mpya.
11 Ọdu-biribiri iya;
?te egudedu unu tọo.
?Egvu iya ta akaduru unu oru l'ẹhu.
12 Iphe ono, unu ekfushi ono
tụko bụru ẹtu, laru lẹ ntụ.
Iphe, unu edo t'unu gude
dofu onwunu abụru iphe laru l'ẹpoto.
13 Unu daa ashị; tẹ mu kfua;
ọphu, e-me nụ; t'o mee!
14 ?Bụ ngụnu meru iphe mu
e-gude ndzụ mu tụa ntụ?
15 Ẹ tọ nwekwa m'o -ruhuru;
oogbu mu egbugbu;
bẹ mu a-chịlekwarua ẹnya dobe l'ẹke ọono.
Mu e-vudokwa iya phụ l'ifu kpefu.
16 Ọ bụ iphe ono e-mekochaa dzọo mu;
kẹ l'ẹ tọ dụdu onye,
ẹ-ta atsụdu Nchileke egvu,
a-dụ ike kpọfu iya l'ifu.
17 Unu kpaa iphe lẹ nchị;
nụa iphe-a, mu ekfu-a!
Tẹ iphe-a, mu ekfu-a
bamikwaa unu abami lẹ nchị!
18 Lẹ nta-a, mu chịkobewaru
iphe, mu e-kfu-a; bẹ mu
marua l'ikpe a-laru mu.
19 ?O nweru onye a-bya a-sụ
l'ọo iphe, mu meru ndọ-ọ?
Ọ -dụ ẹge ono; mu adaa ashị; nwụhu.
20 Nggụbe Nchileke;
iphe mu arọ ngu t'i meeru
mu dụ ụzo iphe labụ;
k'ọphu mu a-haa
odomi onwomu edomi l'ẹke ịino!
21 Sefu mu ẹka l'ẹhu;
nggu ahaa mu oyephe egvu
ono, iiye mu ono.
22 Ọ bụ teke ono bụ;
i -kua mu; mu aza ngu.
Teke ẹ-tọ dụdu;
nggu ahaa tẹ mbẹdua
-kfujee ekfukfu;
nggu eyejeeru mu iya ọnu.
23 Ẹjo iphe mu ono;
?bụ ole b'ọ dụ.
?Bụ ugbo ole bẹ mu
mekpooru ẹjo iphe ono.
Koshinu mu ẹke mu chọru okfu;
mẹ ẹke mu mesweru.
24 ?Nanụ ẹge ọ dụ; bẹ iidomi
onwongu edomi l'ẹke mu nọ;
l'ele mu l'ẹ̀ mu bụ ọhogu ngu.
25 ?Bụ mkpẹkwo,
phẹrephere alọnga alọnga;
bẹ ịinu aphụ.
?Bụ ẹswa ọkponku-a;
bẹ ịichi ọso tọo.
26 Kẹ l'iphe, i deshiru lẹ mu
meru bụkota iphe,
eru mu l'anụ;
shi ẹge ono vuta ẹjo iphe,
mu meshiru teke mu bụ
nwokoro byabẹ mu l'ishi.
27 Ị chịwaru mu ọkpa ye lẹ mkpọro;
l'enyo t'ị maru ẹge mu haru ọkpa ha iya;
bya emee mu
iphe-ọhubama l'ichirukfu;
k'ọphu ịi-majẹru ẹke mu dzọru ọkpa.
28 Ọo ya kparu iphe madzụ
eyokashihuje l'ọ bụ iphe rehuru erehu;
mbụ rubashihu l'ọ bụ uwe, nra riru.”