20
Ọnu, Zofa eye
1 Tọ dụ iya bụ; Zofa, bụ onye Nema abya eyee ọnu; sụ:
2 “Iphe ono, iikfu ono
agbakwa mu ẹhu gharaghara;
mu ta adụ ike nọdu
tẹ mu be eyeru ngu ọnu.
3 Iphe ono, iikfu ono;
bẹ iphere iya gbe dụ mu.
Yọ bụru ẹge mu mataberu;
bẹ mu eme tẹ mu yee ọnu.
4 T'ị madụ lẹ tsube l'oge ndiche;
mbụ keshinu e meru madzụ
dobe lẹ mgboko-a;
5 bẹ ẹhu-ọtso-ẹna kẹ onye,
bụ ẹjo madzụ emejelephu tsọ-kengu;
mbụ l'onye ẹ -ta madụ
Nchileke te etejedu ẹswa
nọo ọphu, barụ ishi.
6 Onye ọbu tsee k'ọphu ootsu l'igwe;
ishi iya l'akpa l'urukpu;
7 bụ ẹge nshị, ọ nyịru
ereshịhuje; bụ ẹge yẹbedua
e-rekashihu; phuhu.
Ndu shi aphụje iya nụ
awata ọji ẹge o jeru iya.
8 Ọ bụ ẹge nrọ ephukahuje
bụ ẹge oo-phukahu;
ta aphụhe iya ọdo;
yo mee phuchangu l'ọ bụ
àphụ̀, a phụru l'ẹnyashi.
9 Ndu, shi aphụje iya nụ;
aphụ-buhu iya;
ndibe iya taa aphụhe iya.
10 Yọ bụru ụnwu iya
e-mekochaa kfụa ndu
ụkpa ụgwo iphe,
ọ nakọru ẹphe.
Ẹphe egude ẹka ẹphe
kfụ-phukota ẹku ono azụ.
11 Ike ono, o shi nweru l'okorọbya ono
etsoru iya baa l'ẹja.
12 Ẹjo iphe atsọtabeje iya ẹna;
k'ọphu bụ l'ọokpujeru
ẹjo iphe l'ọnu;
gude ire domia ya.
13 Ẹ tọo dụjedu ike haa ẹjo iphe t'o swee.
Ọokpujeru iya akpụru l'ọnu.
14 Obenu lẹ nri, o riru
nọwa iya l'ẹpho shihu ụka;
ghọo ẹra ẹjo agwọ kwaa ya l'ẹhu.
15 Ọ bụ teke ono;
bẹ ọo-gbọshikota ẹku ono,
o shi ele wọo wọo ono.
Nchileke e-me t'ọ
gbọshikota iya l'ọha.
16 Ọnu-mini agwọ;
bẹ ọo-mị amịmi.
Yọ bụru ẹra ẹjo agwọ;
bẹ e-gbu iya nụ.
17 Ẹ tọo nọdudu ndzụ;
phụ nggele manụ olivu;
tọo phụ ẹnyimu ono,
manụ-ẹngu;
mẹ ẹra-eswi atsọ gborogboro ono.
18 Iphe ono,
o seru akanya iya ono;
bẹ ọo-nụ-phukota azụ;
ẹ too ridu iya l'ọnu.
Uru, o ritaru l'aswa,
ọ zuru ta byadụ bya atsọ iya ẹna.
19 Mkpata iya abụru l'ọ
kparu ndu ụkpa ẹhu;
mee ẹphe; ẹphe abụru ụkpa-mkpẹre;
bya egude ike nakọta
ndiphe ụlo, ẹ tọ kpụdu.
20 Ẹpho ta abyadụ bya
eji iya l'ẹnya-nkomunko iya ono;
ọphu ẹku iya ono 'adzọkwanu iya.
21 Iphe o nweru b'o rifuru lẹ pyaapyaa;
Ẹku iya ono ta dụkwa ẹke ọo-nọ-bebe.
22 Ọ bụ teke ẹku iya
jiru ejiji bẹ iphe-ẹhuka
a-tụ iya l'ụkfu.
Yọ baa lẹ hị́í-tọ̀ò.
23 Ọ bụ teke ẹpho jideru iya;
bẹ Nchileke a-tụko oke
ẹhu-eghughu iya byabẹ iya l'ishi;
tsua ya pyaapyaa.
24 Ọ -vuta ọso tẹ ya
gbalaaru mgbọ-ígwè;
akfụ, e gude ope mee akụta iya tụa.
25 O -je tẹ ya mịfuta arwa ono
l'okpurukpazụ iya;
ọnunu iya, acha too eje angụru iya lẹ meji.
Teke ono; egvu eria ya l'ẹhu.
26 Iphe, bụ iphe o dzutaru edzuta
a-bụru iya kpurupyata.
Ọku, ẹ-ta bụdu madzụ
yeru iya abya ekepyashia ya;
tsukota iphe, phọduru l'ụlo iya.
27 Ẹjo iphe, o mekotaru;
bẹ akpamigwe e-kpuha tụa ya too.
Alị egbeshi gbaa ya ekebe.
28 Iphe, bụ iphe o nweru enweru l'ụlo iya;
bẹ utso a-bya ekpukota mbọku,
Nchileke a-tụ-koshi iya
oke ẹhu-eghughu iya.
29 Ono bụ nggo,
Nchileke ebuje ndu ẹjo madzụ.
Yọ bụru iya bụ òkè,
ruberu ẹphe l'ẹke Nchileke nọ.”